મુંબઇ: એર ઇન્ડિયાના (Air India) નવા ચીફ એક્ઝિક્યુટિવ ઓફિસર (CEO) અને મેનેજિંગ ડિરેક્ટર (MD) તરીકે કેમ્પબેલ વિલ્સનને (Campbell Wilson) નિયુક્ત કરવામાં આવ્યા છે. પરંતુ તેમની નિમણૂક માટે હજુ નિયમનકારી મંજૂરી મળવાની બાકી છે. વિલ્સન હાલ સિંગાપોર એરલાઇન્સની (Airlines) સૌથી મોટી કેરિયર સ્કૂટના વડા છે. કેમ્પબેલ વિલ્સન 15 જૂને સ્કૂટના વડા તરીકેના પદ પરથી રાજીનામું આપશે. ટાટાએ (TATA) એવી વ્યક્તિને પસંદ કરી છે કે જેમને બજેટ અને સંપૂર્ણ સેવા કેરિયર બંનેનો અનુભવ છે. કારણ કે તેમની પાસે ચાર એરલાઇન્સ છે – AI અને વિસ્તારા (સંપૂર્ણ સેવા) , AI એક્સપ્રેસ અને એરએશિયા ઇન્ડિયા
ભારતમાં એરલાઇનના CEO તરીકે વિદેશી નાગરિકની નિમણૂક આગળ વધે તે પહેલાં તેને સરકારની મંજૂરીની જરૂર હોય છે. એર ઈન્ડિયાના નવા બોસ તરીકે વિલ્સનની નિમણૂક કરવા પહેલા તુર્કીના ઈલ્કર અયસીની પસંદગી કરવામાં આવી હતી. પરંતુ તેમના અગાઉના રાજકીય સંબંધોને લઈને દેશમાં વિરોધને પગલે તેમણે ઓફરને નકારી કાઢી હતી. ઇલ્કર અયસી તુર્કી એરલાઈન્સ માટે કામ કરતા હતા.
હું વિશ્વ કક્ષાની એરલાઇન બનાવવા માટે તેમની સાથે કામ કરવા આતુર છું : એન ચંદ્રશેખર
ટાટા ગ્રૂપ અને એઆઈના ચેરમેન એન ચંદ્રશેખરને કહ્યું કે મને એર ઈન્ડિયામાં કેમ્પબેલનું સ્વાગત કરતાં આનંદ થાય છે. તેઓ ઉડ્ડયન ઉદ્યોગના અનુભવી છે જેમણે બહુવિધ કાર્યોમાં મુખ્ય વૈશ્વિક બજારોમાં કામ કર્યું છે. તેમજ એર ઈન્ડિયાને એશિયામાં એરલાઈન બ્રાન્ડ બનાવવામાં તેમના વધારાના અનુભવનો લાભ મળશે. હું વિશ્વ કક્ષાની એરલાઇન બનાવવા માટે તેમની સાથે કામ કરવા આતુર છું.
એર ઈન્ડિયા વિશ્વની શ્રેષ્ઠ એરલાઈન્સમાંની એક બનવાની રોમાંચક સફરની ટોચ પર : વિલ્સન
વિલ્સને કહ્યું કે પ્રતિષ્ઠિત એર ઈન્ડિયાનું નેતૃત્વ કરવા અને અત્યંત પ્રતિષ્ઠિત ટાટા ગ્રુપનો ભાગ બનવા માટે પસંદગી પામવી એ સન્માનની વાત છે. એર ઈન્ડિયા વિશ્વની શ્રેષ્ઠ એરલાઈન્સમાંની એક બનવાની રોમાંચક સફરની ટોચ પર છે, જે ભારતીય હૂંફ અને આતિથ્યને પ્રતિબિંબિત કરતા વિશિષ્ટ ગ્રાહક અનુભવ સાથે વિશ્વ-વર્ગના ઉત્પાદનો અને સેવાઓ પ્રદાન કરે છે. તે મહત્વાકાંક્ષાને સાકાર કરવાના મિશનમાં એર ઈન્ડિયા અને ટાટાના સાથીદારો સાથે જોડાવા માટે હું ઉત્સાહિત છું.
કેમ્પબેલ વિલ્સનની કારકિર્દી
ઉડ્ડયન ઉદ્યોગમાં વિલ્સનને લગભગ 26 વર્ષનો અનુભવ છે. તેમણે ન્યુઝીલેન્ડમાં 1996માં SIA સાથે મેનેજમેન્ટ ટ્રેઇની તરીકે શરૂઆત કરી હતી. ઉલ્લેખનીય છે કે, SIA ટાટાની માલિકીની અન્ય એરલાઇન વિસ્તારામાં ભાગીદાર છે. વિલ્સને સિંગાપોર એરલાઇન્સમાં 15 વર્ષથી વધુ સમય પસાર કર્યો. આ દરમિયાન તેણે જાપાન, કેનેડા અને હોંગકોંગ સહિત અનેક દેશોમાં કામ કર્યું. જ્યારે સ્કૂટ પર વિલ્સનનું સ્થાન લેસ્લીયુ થંગ લેશે, જેઓ હાલમાં સિંગાપોર એરલાઇન્સમાં સેલ્સ અને માર્કેટિંગના વરિષ્ઠ ઉપપ્રમુખ તરીકે સેવા આપી રહ્યા છે.
