સુરત (Surat): સુરત શહેરના વેડરોડ વિસ્તારમાં મોડી રાત્રે બે રાઉન્ડ ફાયરીંગની ઘટના બની છે. ફાયરીંગનો કોલ આવતા જ ચોકબજાર પોલીસ દોડતી થઈ ગઈ હતી. પ્રાથમિક તપાસમાં એવી વિગતો બહાર આવી હતી કે, વેડરોડ (Ved Road) ઉપર છ મહિના પહેલા એક યુવક ઉપર મોબાઇલ ચોરીનો (Mobile Theft) આક્ષેપ રાખી તેને રૂમમાં ગોંધી રાખીને નગ્ન વીડિયો (Naked Video) ઉતારી લેવાની ઘટનામાં બે યુવકે રાત્રીના સાડા અગિયાર વાગ્યાના અરસામાં એક યુવક પર બે રાઉન્ડ ફાયરીંગ (Firing) કર્યું હતું.
- 6 મહિના જૂના ઝઘડાની અદાવતમાં વેડરોડ ઉપર બે રાઉન્ડ ફાયરીંગ
- પહેલા અખંડ આનંદ કોલેજની સામે એકવાર ફાયરીંગ કરાયા બાદ ડભોલી પાસે બીજીવાર ફાયરીંગ થયું
- આંશિક અને હેંમત નામના બે યુવકો સામે ગુનો નોંધાયો
પ્રાપ્ત વિગતો મુજબ ડભોલી ચાર રસ્તા નજીક રહેતા હિતેશ સોલંકીએ આશરે છ મહિના પહેલા હેંમત માલી નામના યુવકને મોબાઇલ ચોરીના આક્ષેપ કરીને એક રૂમમાં ગોંધી રાખ્યો હતો. દરમિયાન હિતેશ સોલંકીએ હેંમતનો એક નગ્ન વીડિયો ઉતારી લીધો હતો અને માર મારીને જવા દીધો હતો. જે તે સમયે મોબાઇલ ચોરીની કોઇ ફરિયાદ નોંધાઇ ન હતી. પરંતુ હિતેશ સોલંકી વારંવાર હેંમતને વીડિયો વાઇરલ કરી દેવાની ધમકી આપીને હેરાન કરવાનુ શરૂ કર્યુ હતું.
હિતેશના ત્રાસથી કંટાળી ગયેલા હેંમતે તેના એક મિત્ર નામે આંશિક મોરેને વાત કરી હતી. ત્યારબાદ આ બંને મિત્રોએ હિતેશને પતાવી દઇને તેના ત્રાસમાંથી કાયમી છૂટકારો મેળવવાનું નક્કી કર્યુ હતું. દરમિયાન બુધવારે રાત્રે સાડા અગિયાર વાગ્યાના અરસામાં હેંમત અને આંશિક બંને બાઇક ઉપર નીકળ્યા હતા, બંનેએ હિતેશની રેકી કરીને સૌથી પહેલા અખંડ આનંદ કોલેજની સામે બાઇક ઉપરથી જ ફાયરીંગ કર્યુ હતુ, પરંતુ આ મીસ ફાયરીંગ થતા હિતેશનું ઘ્યાન ગયું ન હતું. બાદમાં હિતેશ ડભોલી પાસે લક્ષ્મી નગર નજીક પહોંચતા જ બંનેએ ફરીવાર ફાયરીંગ કર્યું હતું. પરંતુ હિતેશનું નસીબ જોર કરી રહ્યું હોય તેમ તેને કોઇ મોટી ઇજા થઇ ન હતી. રાત્રીના સમયે જ ફાયરીંગનો કોલ આવતા ચોકબજાર પોલીસ દોડતી થઇ હતી. આ મામલે પોલીસે હિતેશની ફરિયાદ નોંધી હતી અને ફાયરીંગ કરનારા હેંમત તેમજ આંશિકને પકડવાના ચક્રો ગતિમાન કર્યા છે.
