સુરતઃ (Surat) સહારાદરવાજા ખાતે રહેતા કાકાએ (Uncle) તેની ભત્રીજીને (Niece) મીથુન નામના યુવક સાથે હરવા ફરવા માટે ના પાડી ઠપકો આપ્યો હતો. ત્યારે ભત્રીજીએ તેના બોયફ્રેન્ડ સાથે મળીને જાહેર રસ્તા પર કાકાને પેટમાં ચપ્પુના ઘા ઝીંકી દીધા હતા. ઇજાગ્રસ્ત હાલતમાં કાકાને સ્મીમેર હોસ્પિટલમાં ખસેડ્યા બાદ મહિધરપુરા પોલીસે તેમના નિવેદનના આધારે ભત્રીજી તેમજ તેના બોય ફ્રેન્ડ (Boy Friend) સામે ગુનો નોંધી વધુ તપાસ હાથ ધરી હતી.
- કાકાએ ભત્રીજીને મીથુન સાથે હરવા ફરવા ના પાડી ઠપકો આપ્યો હતો, કાકાને ફોનમાં જે થાય તે કરી લેવા કહ્યું
- પિતા વગરની ભત્રીજીને પ્રેમાલાપ નહી કરવાની સલાહ આપનાર કાકાના આવા હાલ થયા
આ ઘટનાની મળતી માહિતી અનુસાર સહારાદરવાજા સ્થિત સંગમ ટેકરી પાસે 30 વર્ષીય હરકેશભાઈ સતનામ ગુપ્તા રહે છે. બે વર્ષ પહેલાં તેમના મોટા ભાઈ કેસરી સતનામ ગુપ્તાનું બે વર્ષ પહેલા નિધન થયું હતું. તેમના મોટાભાઇના પત્ની વંદનાબેન અને પુત્રી કિંજલ (નામબદલ્યું છે) (ઉ.વ.17) તથા મિત્તલ (નામબદલ્યું છે) (ઉ.વ.15) ગોડાદરા ખાતે રહે છે. હરકેશભાઈની ભત્રીજી કિંજલ સંગમ ટેકરી ખાતે એકલા રહેતા મિથુન નામના છોકરા સાથે લગ્ન કરવા માંગે છે. મીથુન પણ હરકેશની ભાભી વંદનાબેનની સાથે છેલ્લા 6 મહિનાથી રહે છે. કિંજલ મીથુનની સાથે હરતી ફરતી હોવાથી તેને મીથુન સાથે નહીં ફરવા માટે કાકાએ સમજાવી હતી. ગઈકાલે બપોરે કિંજલને ફોન કરીને ફરી એક વખત કાકા હરકેશભાઇએ તેને મીથુન સાથે નહીં ફરવા માટે સમજાવી હતી. ત્યારે ફોન પર કિંજલે તેના કાકાને જે થાય તે કરી લેવા કહ્યું હતું.
રાત્રે જમીને હરકેશભાઈ સહારા દરવાજા ગરનાળા પાસે ફૂટપાથ ઉપર ઊભા હતા. ત્યારે મોપેડ પર મિથુન અને કિંજલ આવ્યા હતાં. જેથી હરકેશે કિંજલને આ રીતે નહીં ફરવા માટે સમજાવી ઠપકો આપ્યો હતો. ત્યારે અચાનક મીથુન અને ભત્રીજી કિંજલે ચપ્પુ કાઢ્યું હતું. કિંજલે કાકા હરકેશને પેટમાં ચપ્પુ મારી દીધું હતું. મીથુને પણ પગના સાથળના ભાગે ચપ્પુ મારી દીધું હતું અને ત્યાર બાદ બંને જણા ભાગી ગયા હતા. થોડીવારમાં તેના પરિવારના સભ્યો અને મિત્રો આવી જતા હરકેશને લોહીલુહાણ હાલતમાં સ્મીમેર હોસ્પિટલમાં ખસેડ્યો હતો. મહિધરપુરા પોલીસે આ અંગે ફરિયાદ દાખલ કરીને વધારે તપાસ હાથ ધરી છે.
