સુરત: (Surat) સુરત શહેર માટે અત્યંત મહત્ત્વનો એવો કન્વેન્શિયલ બેરેજનો પ્રોજેક્ટ મંજૂર થવાની દિશામાં હવે નક્કર શરૂઆત થઇ ચૂકી છે. રૂંઢ અને ભાઠા વચ્ચે નદી પર 13 મીટરની હાઇટનો આ બેરેજ બન્યા બાદ તાપી નદી શહેર વચ્ચેથી માંડીને ગાય પગલાં સુધી છલોછલ ભરેલી દેખાશે. તેથી તાપી નદીના કિનારા (Tapi River Bank) પર બંને બાજુ મળી કુલ 66 કિ.મી.ના વિસ્તારને પિકનિક પોઇન્ટ તરીકે વિકસાવવા માટે સુરતમાં પણ અમદાવાદના રિવરફ્રન્ટ (River front) જેવો નયનરમ્ય રિવરફ્રન્ટ સાકાર કરવાનો પ્રોજેક્ટ (Project) તૈયાર કરાયો છે. જેના 3904 કરોડના અંદાજને સૈદ્ધાંતિક મંજૂરી પણ અપાઇ ચૂકી છે. સુરત માટે મહત્ત્વકાંક્ષી એવા આ તાપી રિવરફ્રન્ટ પ્રોજેક્ટ માટે વિશ્વબેંકે ફંડિંગ કરવા માટે બતાવેલી તૈયારીમાં વધુ એક કદમ આગળ વધાયું છે.
મનપા કમિશનર બંછાનિધિ પાનીએ જણાવ્યું હતું કે, વિશ્વબેંકના પ્રતિનિધિઓ દ્વારા અગાઉ પ્રેઝન્ટેશન જોયા બાદ પ્રથમ વખત ચર્ચા-વિચારણા માટે ઓનલાઇન મીટિંગ માટે તૈયારી બતાવી છે. આ પ્રોજેક્ટમાં પ્રથમ તબક્કામાં 2000 કરોડ ખર્ચાશે, જેમાં વિશ્વબેંક 1400 કરોડ આપશે. જ્યારે રાજ્ય સરકાર અને મનપાના હિસ્સે 300-300 કરોડ આવશે. આ પ્રોજેક્ટ માટે વર્લ્ડ બેંકે પણ લોન આપવા અંગે રસ દાખવ્યો છે. આ લોન લેવા માટે કેન્દ્ર સરકારની વિવિધ વિભાગોની સહમતી હોવી જરૂરી છે. કેન્દ્રના ડિપાર્ટમેન્ટ ઓફ ઇકોનોમિક અફેર્સ સમક્ષ સંબંધિત તમામ વિભાગના અધિકારીઓની ઉપસ્થિતિમાં પ્રેઝન્ટેશન કરાયું હતું. તેમજ આ વિભાગ દ્વારા રિવર ફ્રન્ટના પ્રથમ ફેઇઝ એટલે કે રૂઢથી સિંગણપોર કોઝવે સુધીના 10 કિ.મી. વિસ્તારમાં રિવર ફ્રન્ટ માટે મંજૂરી આપવામાં આવી હતી. ત્યાર બાદ આ પ્રોજેક્ટને વર્લ્ડ બેંક લોન આપે એ માટે નીતિ આયોગે પણ મંજૂરી આપી દીધી છે.
જેમાં પ્રથમ ફેઇઝમાં આશરે 1991 કરોડનો પ્રોજેક્ટ થશે તેમજ તાપી નદીની બંને બાજુ 10-10 કિ.મી. સુધી વિકાસ કરાશે. જ્યારે બીજા ફેઇઝમાં 23 કિ.મી.નો એટલે કે કોઝવેથી ગાય પગલાં સુધી બંને બાજુ મળી 46 કિ.મી.ના વિસ્તારનો સમાવેશ કરાશે. તેમાં પણ આશરે 2000 કરોડનો ખર્ચ છે. જો કે, આ પ્રોજેક્ટ કેન્દ્ર અને રાજ્ય સરકારની મદદ તેમજ વર્લ્ડ બેંકની લોનથી સાકાર થશે. તેમજ પબ્લિક પ્રાઇવેટ પાર્ટનરશિપ કરીને રોકાયેલાં નાણાં પરત મેળવવાનું આયોજન પણ છે. મનપા કમિશનર બંછાનિધિ પાનીએ જણાવ્યું હતું કે, વિશ્વબેંક દ્વારા ચર્ચા-વિચારણા માટે કહેણ મોકલાયું હોય ટૂંક સમયમાં ઓનલાઇન મીટિંગ થશે. તેમજ વિશ્વબેંક અને મનપા દ્વારા સંયુક્ત રીતે ડીપીઆર તૈયાર કરાશે. વિશ્વબેંક દ્વારા ખાસ તાકીદ એ પણ કરવામાં આવી છે કે, આ પ્રોજેક્ટના કારણે પર્યાવરણને કોઇ નુકસાન ના થાય તેનું ધ્યાન ખાસ કરીને આયોજનમાં રાખવું જરૂરી છે.
