સુરત : હનીટ્રેપની ઘટનાઓ દિનપ્રતિદિન વધવા માંડી છે. સુરતમાં યુવકોને સેક્સની લાલચ આપીને ફસાવવાના કિસ્સા પોલીસના ચોપડે ખૂબ નોંધાઈ રહ્યાં છે. અત્યાર સુધી એવું જોવા મળતું હતું કે કોઈ ગેંગ દ્વારા પુરુષોને હનીટ્રેપમાં ફસાવવામાં આવતા હતા પરંતુ સુરતના મોટા વરાછામાં એક દંપતિ દ્વારા સેક્સની લાલચ આપી યુવકોને ફસાવવાનું રેકેટ બહાર આવ્યું છે.
- સુરતના મોટા વરાછામાં હનીટ્રેપનો કિસ્સો સામે આવ્યો
- અબ્રામા રોડના ગોકુળ ધામ સામે મિથીલા હાઈટ્સમાં રહેતા 34 વર્ષીય યુવકને દંપતિએ લૂંટ્યો
- ભાવેશ હીરપરા તથા તેની પત્નીએ સેક્સની લાલચ આપી ફસાવ્યો
- યુવકના નગ્ન ફોટા પાડી તેને સમાજમાં બદનામ કરવાની ધમકી આપી રૂપિયા પડાવ્યા
- યુવકે ફરિયાદ આપતા વરાછા પોલીસે ગુનો દાખલ કરી તપાસ શરૂ કરી
મોટા વરાછા ખાતે આવેલા અબ્રામા રોડ પરની ગોકુળ ધામ બંગલાની સામે આવેલી મિથીલા હાઇટસમાં રહેતા મૂળ અમરેલીની જિલ્લાના ધારી તાલુકાના દૂઘાળા ગામના 34 વર્ષીય યુવકને આરોપી ભાવેશ હીરપરા તથા તેની પત્નીએ શરીર સંબંધ બાંધવાની લાલચ આપી હતી. આ લોકો સાથે અન્ય બે ઇસમોએ યુવાનને ફસાવ્યો હતો. આ યુવાનને વરાછાની ભગીરથ સોસાયટીમાં બોલાવીને તેના ફોટા પાડવામાં આવ્યા હતા. આ યુવાનના નગ્ન ફોટા પાડીને બાદમાં તેને બદનામ કરવાનુ જણાવી પ્રથમ દોઢ લાખ રૂપિયા ત્યારબાદ વધુ એક લાખ રૂપિયાની માંગણી કરવામાં આવી હતી. ભાવેશ હીરપરાની પત્નીએ યુવાનને નાણા ન આપ્યા તો સમાજમાં બદનામ કરવાનુ જણાવતા યુવાન આખરે વરાછા પોલીસને શરણે જતા વરાછા પોલીસે આરોપીઓ સામે ગુનો દાખલ કર્યો હતો.
આ દંપતિએ બીજા પણ અનેક યુવકોને હનીટ્રેપનો ભોગ બનાવી લૂંટ્યા હોવાની આશંકાના પગલે તે દિશામાં સુરત પોલીસ દ્વારા તપાસ હાથ ધરવામાં આવી છે. હાલમાં પોલીસ આરોપી દંપતિને પકડવાના ચક્રો ગતિમાન કર્યા છે. દંપતિ પકડાય ત્યાર બાદ જ આ દંપતિની જાળમાં કેટલાં યુવકો બરબાદ થયા છે તે જાણી શકાશે.
