સુરત: સ્પાઇસ જેટ (SPICE JET) એરલાઇન્સ 22 ફેબ્રુઆરીથી સુરતથી પટનાની ફલાઇટ (SURAT T PATNA FLIGHT) શરૂ કરવા જઇ રહી છે. આ ફલાઇટ સપ્તાહમાં બે દિવસ એટલે કે સોમવાર અને શુક્રવારના દિવસે ઓપરેટ થશે. આ ફલાઇટ પટના એરપોર્ટથી 12:30 કલાકે ટેકઓફ થશે અને સુરત એરપોર્ટ પર 14:55 કલાકે લેન્ડ થશે. તે પછી સુરત એરપોર્ટ પર 25 મિનિટ રોકાશે ને ફરી ફલાઇટ 15ઃ25 કલાકે ટેકઓફ થશે અને પટના એરપોર્ટ પર 17:50 કલાકે પહોંચશે.
સ્પાઇસ જેટ એરલાઇન્સ સુરતથી પટનાની વન વે (ONE WAY FLIGHT) અને વિકલી ફલાઇટ ઓપરેટ કરી રહી છે એટલે કે ફલાઇટ મંગળવાર, ગુરૂવાર અને શનિવારના દિવસે ઓપરેટ થાય છે. આ ફલાઇટ સુરત એરપોર્ટથી 12:10 કલાકે રવાના થાય છે અને 14ઃ40 કલાકે પટના પહોંચે છે, 22 ફેબ્રુઆરીને સોમવારથી એટલે કે કાલથી સ્પાઇસ જેટ એરલાઇન્સ સોમવાર અને શુક્રવારના દિવસે ફલાઇટ ઓપરેટ કરશે પછી સુરતથી પટનાની ફલાઇટનો લાભ અઠવાડિયામાં પાંચ દિવસ (FIVE DAYS IN WEEK) મળશે એમ એરલાઇન્સના સુત્રોએ જણાવ્યું હતુ.
સુરત એરપોર્ટથી જાન્યુઆરી 2021માં પેસેન્જર સંખ્યા વધીને 88325 થઇ
સુરતમાં કોરોનાની સ્થિતિ હળવી બનતા સતત પેસેન્જર સંખ્યા વધી રહી છે. ડિસેમ્બર 2020માં 74415 પેસેન્જરોની અવર-જવર રહી હતી. ફ્લાઇટ સંખ્યા વધતા હવે જાન્યુઆરીમાં આ સંખ્યા વધીને 88325 પર પહોંચી છે. એપ્રિલ 2020 પછી સૌથી વધુ પેસેન્જર જાન્યુઆરી 2021માં નોંધાયા છે.
20 ફેબ્રુઆરીથી 22 માર્ચ 2021 સુધીમાં સુરતથી ચેન્નાઇ, જયપુર, જોધપુર અને પટના માટે નવી ફલાઇટ (NEW FLIGHT) શરૂ થઇ જશે. તે સિવાય પણ સુરતને નવી ફલાઇટ મળશે. આખા એરપોર્ટની સફાઇ અને કામગીરીની દેખરેખ માટે મેકેનાઇઝ્ડ સપોર્ટ સિસ્ટમ માટે ટેન્ડર ખૂલી ગયું છે અને વર્કઓર્ડર આપવાની તૈયારી છે. જેથી એરપોર્ટ ડિરેક્ટરે ચેમ્બરને હાકલ કરી છે, અને ચેમ્બર થકી વિવિધ કોન્ટ્રાકટર મેળવવાની દિશામાં એક બેઠકનું આયોજન કરવામાં આવ્યું હતું.
ચેમ્બરે સુરત એરપોર્ટના રનવેની પહોળાઇ 45 મીટરથી વધારીને 60 મીટર કરવાની દરખાસ્ત કરી હતી. તે અંગે એરપોર્ટ ડાયરેકટરે કહ્યું હતું કે, હાલમાં જે 45 મીટરની પહોળાઇ છે તે દુનિયાની સૌથી મોટામાં મોટી ફલાઇટ લેન્ડ થવા માટે પૂરતી છે. એટલે રનવેની પહોળાઇ વધારવાની કોઇ આવશ્યકતા જ નથી. તેમણે વધુમાં કહ્યું કે, એરપોર્ટ ખાતે ટર્મિનલ એકસપાન્શન (TERMINAL EXPANSION) અને પેરેલલ ટેકસી વેનું કામ પણ પૂરજોશમાં ચાલી રહ્યું છે તથા આ બંને કામ ડિસેમ્બર 2021 થી માર્ચ 2022 સુધીમાં પૂર્ણ થઇ જશે.
