નવી દિલ્હી: ખાલિસ્તાની આતંકવાદી હરદીપ સિંહ નિજ્જરની યાદમાં કેનેડાની સંસદમાં થોડી મિનિટોનું મૌન પાળવામાં આવ્યું હતું. જેના પર ભારતીય વિદેશ મંત્રાલયે શુક્રવારે જડબાતોડ જવાબ આપ્યો હતો. વિદેશ મંત્રાલયના પ્રવક્તા રણધીર જયસ્વાલે કહ્યું કે અમે સ્વાભાવિક રીતે જ એવા કોઈપણ પગલાનો વિરોધ કરીએ છીએ જે ઉગ્રવાદ અને હિંસાની તરફેણ કરનારાઓને રાજકીય સ્થાન આપે છે.
અગાઉ 1985માં ખાલિસ્તાની આતંકવાદીઓ દ્વારા ભારતીય નાગરિક વિમાનને ઉડાવી દેવાની ઘટનાને યાદ કરતાં ભારતે કેનેડાનું નામ લીધા વિના કહ્યું હતું કે ભારત આતંકવાદનો સામનો કેવી રીતે કરવો તે સારી રીતે જાણે છે. ભારતીય દૂતાવાસે કહ્યું છે કે આતંકવાદની સમસ્યાનો સામનો કરવામાં ભારત સૌથી આગળ છે અને આ વૈશ્વિક ખતરાનો સામનો કરવા માટે તમામ દેશો સાથે મળીને કામ કરી રહ્યું છે. નાગરિક ઉડ્ડયનના ઈતિહાસમાં સૌથી ભયંકર આતંકવાદી હવાઈ આપત્તિ એવા કનિષ્ક બોમ્બ વિસ્ફોટને યાદ કરીને વાનકુવરમાં ભારતના કોન્સ્યુલેટ જનરલે કેનેડાનું નામ લીધા વિના તેને યોગ્ય જવાબ આપ્યો છે.
તમને જણાવી દઈએ કે 23 જૂન 1985ના રોજ મોન્ટ્રીયલ-નવી દિલ્હી એર ઈન્ડિયા ‘કનિષ્ક’ ફ્લાઈટ નંબર 182માં લંડનના હીથ્રો એરપોર્ટ પર લેન્ડિંગના 45 મિનિટ પહેલા વિસ્ફોટ થયો હતો જેમાં સવાર તમામ 329 લોકો માર્યા ગયા હતા. આમાંના મોટાભાગના ભારતીય મૂળના કેનેડિયન હતા. આ બોમ્બ બ્લાસ્ટનો આરોપ ખાલિસ્તાની આતંકવાદીઓ પર લગાવવામાં આવ્યો હતો. આ વિસ્ફોટ કથિત રીતે સુવર્ણ મંદિરમાંથી આતંકવાદીઓને ખતમ કરવા માટે 1984માં હાથ ધરવામાં આવેલા ‘ઓપરેશન બ્લુસ્ટાર’નો બદલો લેવા માટે કરવામાં આવ્યો હતો.
