વડોદરા: વોર્ડ નં.3ની કચેરી પાછળ ગરબા ગ્રાઉન્ડમાં મોટર બાઈકની આડશમાં બિન્દાસ્ત વિદેશી શરાબની લિજ્જત માણી રહેલા છ ખાનદાની નબીરા રાજાપાઠમાં ઝડપાયા હતા.
પાણીગેટ પોલીસને રાત્રે 8 વાગે મળેલ બાતમી આધારે ખાનગી ડ્રેસમાં ગરબા ગ્રાઉન્ડ પર તપાસ આદરી હતી. 4 મોટર સાઈકલ તરફ પાર્ક કરીને વચ્ચે છ યુવાનો શરાબની ચૂસ્કીઓ મારી રહ્યા હતા. પોલીસને જોતાં જ ખાનદાની નબીરાઓનો નશો ઊતરી ગયો હતો.
પોલીસે દારૂની અડધી બોટલ, ચાખણા, ખાલી ગ્લાસ, સીંગચણાના પડીકા કબજે કર્યા હતા. નશામાં ઝુમતા સત્યમ હરેશ પટેલ (સુરભી સોસાયટી, ગરબા ગ્રાઉન્ડ સામે, વાઘોડિયા રોડ), કુણાલ કમલેશ ચૌહાણ અને તેનો ભાઈ પ્રિયાંક (બંને રહે.રેવા પાર્ક સોસાયટી) ગરબા ગ્રાઉન્ડ પાછળ, વાઘોડિયા રોડ), હવન પ્રશાંત મહેતા (શ્રીનાથ વિહાર સોસાયટી, કલાદર્શન ફ્લેટની બાજુમાં વાઘોડિયા રોડ), સંતોષ શાંતિરામ સહાણે અને કુણાલ જિતેન્દ્ર કડુની (બંને રહે.વિજયનગર, સંગમ ચાર રસ્તા, હરણી રોડ) પોલીસે ધરપકડ કરી હતી અને બૂલેટ સહિત 4 બાઈક, 6 મોબાઈલ સાથે 3.10 લાખનો મુદ્દામાલ કબજે કરીને તમામ આરોપીઓ વિરુદ્ધ પ્રોહિબિશનનો ગુનો દાખલ કર્યો હતો.
