વડોદરા : શહેરના વધુ એક કંપનીના માલિક ઓનલાઇન છેતરપિંડીનો ભોગ બન્યા છે. ભેજાબાજોએ ઈ-સીમની રિકવેસ્ટ મોકલીને એકાઉન્ટ હેક કરી 51 કલાકના સમયગાળામાં 14 વખત બેંક એકાઉન્ટમાંથી અલગ-અલગ રકમ ઉપાડી 46 લાખ પોતાના એકાઉન્ટમાં ટ્રાન્સફર કરી છેતરપિંડી કરી હતી. આ મામલે વેપારીએ શહેર સાયબર ક્રાઇમમાં ભેજાબાજ સામે ફરિયાદ નોંધાવી છે.
શહેરના માંજલપુર વિસ્તારની સાંઈ ચોકડી પાસે આવેલ બાલગોપાલ ટેનામેન્ટમાં પરિવાર સાથે રહેતા સંજયભાઇ ચતુરભાઇ પટેલ મકરપુરા GIDCમાં ક્રાઉન ફેરો એલોયસ પ્રાઇવેટ લિમિટેડ નામની કંપનીમાં પિતા સાથે વ્યવસાય કરે છે. અને મેટલ પાઉડર બનાવે છે. ગત તા. 26 જુલાઇ-2021ના રોજ સાંજના સમયે તેમના મોબાઇલ ફોન પર જીઓ કંપનીના નામે એક મેસેજ આવ્યો હતો. જેમાં લખ્યું હતું કે, આપના દ્વારા ઈ-સીમની રિકવેસ્ટ મેસેજ દ્વારા આપવામાં આવી છે. મેસેજ જોતાની સાથે જ ફોન ડિસકનેક્ટ થઇ ગયો હતો.
ફોન બંધ થઇ જતાં તુરંત જ જીઓ કસ્ટમર કેરમાં ફોન કર્યો હતો. કસ્ટમર કેરમાં મિત્ર ઉંમગ બધેકાના મોબાઇલ ફોન પરથી ફોન કરી તપાસ કરતા કોઈ અન્ય નંબર દ્વારા મેસેજ કરી ઈ સિમ રિકવેસ્ટ કરવામાં આવ્યો હોવાની માહિતી મળી હતી. જે અંગે તપાસ કરતા તેમણે કોઇ મેસેજ કર્યો ન હોવાનું બહાર આવ્યું હતું. આ બાબતે કસ્ટમર કેરમાંથી જવાબ આપવામાં આવ્યો હતો કે, આ અંગે અમે કંઇ કરી શકીશું નહીં. આ અંગે જીઓ સ્ટોરમાં જવાની સલાહ આપી હતી. પરંતુ, રવિવારની રજા હોવાથી જીઓના તમામ સ્ટોર બંધ હતા.
દરમિયાન 26 જુલાઇના રોજ સંજયભાઇએ જીઓ સ્ટોરમાં મિત્ર ઉમંગ બોધેકાને મોકલીને સીમ કાર્ડ લેવા માકલ્યો હતો. જેમાં આખો દિવસ પસાર થઇ ગયો હતો. રાત્ર 9 કલાકે સીમ કાર્ડ ચાલુ થયું તે પહેલાં ભેજાબાજોએ કંપનીના એકાઉન્ટમાંથી 14 વખત ટ્રાન્જેક્શન કરીને રૂપિયા 46 લાખ ઓનલાઇન ટ્રાન્સફર કરી છેતરપિંડી કરી હતી. આ અંગે સંજયભાઇવ બેન્ક ઓફ ઇન્ડિયાના ઝોનલ મેનેજરને રજૂઆત કરી હતી. ત્યારે બેંક મેનેજરે જણાવ્યું કે, તમારું એકાઉન્ટ હેક થઇ ગયું છે. અને તમારા આઇ.ડી. પાસવર્ડનો ઉપયોગ કરી ભેજાબાજે રૂપિયા 46 લાખ ઓનલાઇન ટ્રાન્સફર કરી લીધા છે.
બેંક મેનેજરે ખાતામાંથી ઉપડી ગયેલા નાણાં અંગેની માહિતી આપ્યા બાદ સંજયભાઇએ શહેર સાયબર ક્રાઇમમાં ફરિયાદ નોંધાવી હતી. સાયબર ક્રાઇમે દિપાંકર બાસુ, પંકી રંજન બેનર્જી, સુભાષિશ દે, સુલેખા પ્રિન્ટર્સ એન્ડ એન્ટરપ્રાઇઝ અને સંજયભાઈના નામનું ચાલુ સીમ કાર્ડ ઇસ્યુ કરનાર શખ્સ વિરુદ્ધ છેતરપિંડી અને વિશ્વાસઘાતની કલમો હેઠળ ગુનો નોંધી વધુ તપાસ હાથ ધરી છે.
