વાપી : વાપીના (Vapi) હરીયાપાર્કમાં રહેતી પરિણીતાએ તેની દેરાણી (SisterInLaw) વતન ગઈ હોવાથી તેનો પગાર દેરાણીને ઓનલાઈન (Online) મોકલી આપતા સાસુ તેમજ સસરા વિફર્યા હતા. સાસુએ ગાળો આપી ત્યારે સસરાએ ત્રણથી ચાર તમાચા મારી દેતા મામલો પોલીસ મથકે (Police Station) પહોંચ્યો હતો.
- પરિણીતાએ સાસરિયાંઓ સામે આક્ષેપ કર્યો કે તેઓ અવારનવાર મારા મારી કરી મરી જવાની ધમકી આપતા
- પરિણીતાના ભાઈ પાસે ફ્લેટની માગણી કરી માનસિક અને શારિરીક ત્રાસ આપતા
વાપીના હરીયાપાર્ક કીર્તિ એપાર્ટમેન્ટમાં રહેતી પરિણીતાના લગ્ન ૨૦૧૬માં સુરજ કિરણ બાવીસકર સાથે થયા હતા. મહારાષ્ટ્રના પાલઘરના સરાવલી પરિણીતાનું મૂળ ગામ છે. સુરજ બાવીસકર સાથે પરિણીતાના લગ્ન બાદ ટ્વીન્સનો જન્મ થયો હતો. જેમાં એક પુત્ર અને એક પુત્રી છે. પરિણીતા ભડકમોરામાં કંપનીમાં નોકરી કરે છે. આ બનાવ બન્યો ત્યારે પરિણીતા નોકરી પર ગઈ ન હતી. દેરાણી વતન ગઈ હોવાથી તે સિલાય મશીન પર કામ કરતી હોય તેનો પગાર આવતા તે રોકડા પરિણીતાએ પોતાની પાસે રાખી લઈ દેરાણીને ઓનલાઈન રૂપિયા ૭૫૦૦ મોકલી દેતા આ વાતને લઈને લઈને સાસુ સરલાબેન ઝઘડો કરવા લાગી હતી. ગાળો બોલતા પરિણીતાએ ગાળો નહીં બોલવા કહેતા સસરા કિરણભાઈ અચાનક પરિણીતા તરફ જઈને ત્રણ-ચાર તમાચા મારી દીધા હતા.
પતિ સુરજ હાજર હોવા છતાં કશું બોલ્યો ન હતો. પોતાના ભાઈને ફોન કરવા માટે પોતાના રૂમમાં જતી પરિણીતાને સાસુએ પકડી લાત મારી હતી. તે વખતે પતિ સુરજે પરિણીતાને પકડી રાખી હતી. સાસરિયાઓએ મારવાનું તેમજ ગાળો આપવાનું ચાલુ રાખતા પરિણીતા તેના રૂમમાં જઈને પોતાની સ્કીન માટેની દવા તથા બાળકોને પીવડાવવાની સીરપ લઈને પી ગઈ હતી. પરિણીતાએ સાસરિયાંઓ સામે આક્ષેપ કર્યો હતો કે તેઓ અવારનવાર મારા મારી કરી મરી જવાની ધમકી આપતા હોય પરિણીતાના ભાઈ પાસે ફ્લેટની માગણી કરી માનસિક અને શારિરીક ત્રાસ આપતા ડુંગરા પોલીસ મથકમાં ફરિયાદ નોંધાવી હતી. ડુંગરા પોલીસે પરિણીતાના દિયર આકાશ બાવીસકર, સાસુ સરલાબેન, સસરા કિરણભાઈ બાવીસકર તથા પતિ સુરજ બાવીસકર સામે ગુનો નોંધી તપાસ હાથ ધરી છે.
