રિઝર્વ બેન્ક ઓફ ઈન્ડિયા (RBI)એ મુંબઈની ન્યુ ઈન્ડિયા કો-ઓપરેટિવ બેન્કના વ્યવહારો પર પ્રતિબંધ મુક્યો છે. બેન્કના ગ્રાહકો પોતાના રૂપિયા પણ કાઢી શકશે નહીં. કેન્દ્રીય બેન્કે આ બેન્ક પર નવી લોન આપવા, રોકડા જમા કરવા, એફડી વિગેરે સર્વિસ પર પ્રતિબંધ લગાવ્યો છે.
રિઝર્વ બેંકનું કહેવું છે કે બેંકની સ્થિતિ સુધરે ત્યાં સુધી આ પ્રતિબંધો લાગુ રહેશે. રિઝર્વ બેંકના આ આદેશ બાદ શુક્રવારે બેંક શાખાઓની બહાર ગ્રાહકોની ભીડ ભેગી થઈ ગઈ છે.
રિઝર્વ બેંકને આ બેંકમાં કેટલીક અનિયમિતતાઓ વિશે જાણવા મળ્યું છે. આ પછી જ કેન્દ્રીય બેંકે આ પગલું ભર્યું. માર્ચ 2024 ના અંત સુધીમાં આ બેંકમાં કુલ 2436 કરોડ રૂપિયા જમા થયા હતા. જે લોકોના પૈસા આ બેંકમાં જમા છે તેમને ડિપોઝિટ વીમા યોજના હેઠળ 5 લાખ રૂપિયા સુધીનો વીમો મળશે. મતલબ કે, જો બેંક પડી ભાંગે તો પણ તમને 5 લાખ રૂપિયા પાછા મળશે.
RBI એ જાહેરાત કરી છે કે ન્યૂ ઈન્ડિયા કો-ઓપરેટિવ બેંક 13 ફેબ્રુઆરી 2025 થી કોઈ નવી લોન આપશે નહીં. જૂની લોન પણ રિન્યુ કરશે નહીં. નવા રોકાણો કે નવી થાપણો પણ સ્વીકારશે નહીં. કોઈપણ પ્રકારની ચુકવણી કરી શકશે નહીં. તે પોતાની કોઈ મિલકત પણ વેચી શકશે નહીં. આ પ્રતિબંધ 13 ફેબ્રુઆરી 2025થી શરૂ થતા આગામી છ મહિના માટે અમલમાં રહેશે.
રિઝર્વ બેંકે નિયંત્રણો કેમ લાદ્યા?
રિઝર્વ બેંકને જાણવા મળ્યું છે કે આ બેંકની નાણાકીય સ્થિતિ સારી નથી. આરબીઆઈ બેંક પાસે પૂરતા પૈસા છે કે નહીં તે અંગે પ્રશ્નો ઉભા કરી રહી છે. તેથી લોકોને તેમના બચત ખાતા, કરંટ ખાતા અથવા અન્ય કોઈપણ ખાતામાંથી પૈસા ઉપાડવા પર પ્રતિબંધ મૂકવામાં આવ્યો છે. રિઝર્વ બેંકે કહ્યું છે કે ગ્રાહકોના હિતોનું રક્ષણ કરવા માટે આ પ્રતિબંધો લાદવામાં આવ્યા છે.
ગ્રાહકોની ભીડ ભેગી થઈ
શુક્રવારે રિઝર્વ બેંકના પ્રતિબંધના આ સમાચાર જંગલની આગની જેમ ફેલાઈ ગયા. આ બેંકના ગ્રાહકો પોતપોતાની શાખાઓમાં પહોંચ્યા. આમાં, મોટાભાગના લોકો બેંકમાંથી પોતાના પૈસા ઉપાડવા માંગે છે. પરંતુ રિઝર્વ બેંક દ્વારા લાદવામાં આવેલા પ્રતિબંધને કારણે તેઓ આમ કરી શકતા નથી.
સોશિયલ મીડિયા પર આવા ઘણા ફોટા અને વીડિયો સામે આવી રહ્યા છે જેમાં બેંકોની બહાર ગ્રાહકોની ભીડ જોવા મળી રહી છે. બેંકનો દરવાજો બંધ હોવાથી તેઓ તેમાં પ્રવેશ કરી શકતા નથી.
