ભારતીય કુસ્તીબાજો કુસ્તીની 57 કિલોગ્રામ વર્ગની પુરુષોની ફ્રી સ્ટાઇલ શ્રેણીની સેમિફાઇનલમાં કઝાખસ્તાનના સનાયેવ નુરીસ્લામને હરાવીને કુસ્તીની ફાઇનલમાં પહોંચી ગયા છે. સેમીફાઇનલમાં વિજય સાથે રવિ દહિયાનું નામ કન્ફર્મ થયું છે.
ભારતીય કુસ્તીબાજ રવિ કુમાર દહિયાએ ટોક્યો ઓલિમ્પિકમાં ભારતના ચોથા મેડલની ખાતરી આપી છે. રવી દહિયા કુશ્તી સ્પર્ધાના પુરુષોની ફ્રી સ્ટાઇલ 57 કિલોગ્રામ વર્ગની સેમિફાઇનલમાં કઝાખસ્તાનના સનાયેવ નુરીસ્લામને હરાવીને ટોક્યો ઓલિમ્પિકની ફાઇનલમાં પહોંચ્યો હતો. આ સાથે, તેણે ઓછામાં ઓછું સિલ્વર મેડલ સુનિશ્ચિત કરી લીધું છે. રવીના સર્વશ્રેષ્ઠ પ્રદર્શનને જોતા એવું કહેવામાં આવી રહ્યું છે કે હવે તે ગોલ્ડ જીતવાના ઇરાદા સાથે ફાઇનલમાં જશે. રવિ દહિયા પહેલા ઘણા કુસ્તીબાજોએ ભારત માટે મેડલ જીત્યા છે. સુશીલ કુમારે 2008 અને 2012 માં દેશ માટે બે મેડલ જીત્યા છે, જ્યારે યોગેશ્વર દત્તે 2012 માં એક અને 2016 માં સાક્ષી મલિકે એક -એક મેડલ જીત્યો છે.
રવિ દહિયાની આ જીતથી સમગ્ર દેશ ગર્વની લાગણી અનુભવી રહ્યો છે. રવિ દહિયાની સોશિયલ મીડિયા પર પણ પ્રશંસા થઈ રહી છે. બીજી બાજુ, હરિયાણાના સોનીપતમાં, રવિ કુમાર દહિયાના પરિવારના સભ્યો અને પડોશીઓ સેમિફાઇનલમાં તેની જીતની ખુશીમાં આનંદિત હતા.
તેના પિતા રાકેશ દહિયાએ કહ્યું કે, “આજે દિવાળી જેવી અનુભૂતિ થઈ રહી છે. તેમણે હરિયાણા, અમારા ગામ નહારી અને દેશને ગૌરવ અપાવ્યું છે. રવિની જીત ભારતની જીત છે. તે આપણા માટે મોટી વાત છે. કાલે ઈતિહાસ લખવામાં આવશે, તે અમારા માટે ગોલ્ડ મેડલ જીતશે. “
