હિમાચલ પ્રદેશના (Himachal Pradesh) અનેક જિલ્લાઓમાં ભારે વરસાદ (Rain) થયો છે. વરસાદ બાદ પહાડો પર આવતા પ્રવાસીઓને મુશ્કેલીનો સામનો કરવો પડી રહ્યો છે. વરસાદ બાદ થયેલા ભૂસ્ખલનમાં અનેક વાહનો ફસાઈ ગયા હતા. ગુરુવારે રાત્રે અને શુક્રવારે સવારે દેશના મોટાભાગના ભાગોમાં ભારે વરસાદ પડ્યો હતો. વરસાદના કારણે પહાડોમાં ભૂસ્ખલન જેવી ઘટનાઓ બની છે. હિમાચલ પ્રદેશની રાજધાની શિમલાની આસપાસ ઘણી જગ્યાએ ભૂસ્ખલન થયું છે. ભૂસ્ખલનના કાટમાળ નીચે અનેક વાહનો ફસાઈ ગયા હતા. જેના કારણે ત્યાં અરાજકતા સર્જાઈ હતી.
પહાડો પરથી પડતા પથ્થરો અનેક વાહનોને અથડાયા
અનેક વાહનો વરસાદ વચ્ચે પહાડો પરથી પસાર થઈ રહ્યા હતા ત્યારે ભારે વરસાદને કારણે પહાડો પરથી મોટા પથ્થરો ખસવા લાગ્યા હતા. રસ્તા પરથી પસાર થતા વાહનો ઉપર પડ્યા હતા. પહાડો પરથી પડેલા કાટમાળમાં 3 થી 4 વાહનો ફસાઈ ગયા હતા. કોઈ રીતે વાહનમાં હાજર લોકોએ પોતાનો જીવ બચાવ્યો હતો.
ઘટના સ્થળે બૂમો પાડ્યા બાદ ત્યાંથી પસાર થતા વાહન ચાલકોએ લોકોનો જીવ બચાવ્યો હતો. તેમજ ઘટના અંગે પોલીસ અને સ્થાનિક પ્રશાસનને જાણ કર્યા બાદ બચાવ કામગીરી હાથ ધરવામાં આવી હતી. ભૂસ્ખલન બાદ રસ્તા પરનો વાહન વ્યવહાર બંધ કરી દેવામાં આવ્યો છે.
હિમાચલમાં વધુ વરસાદનું એલર્ટ
ભારે વરસાદ વચ્ચે પહાડોની મુલાકાતે આવતા પ્રવાસીઓને ભારે મુશ્કેલીનો સામનો કરવો પડી રહ્યો છે. હિમાચલના ઊંચાઈવાળા જિલ્લાઓમાં રસ્તાઓ વધુ પ્રભાવિત થયા છે. સ્થાનિક પ્રશાસને પણ ભારે વરસાદ અને ખરાબ હવામાનને લઈને એલર્ટ જાહેર કર્યું છે. સાથે જ હવામાન વિભાગે કહ્યું કે હિમાચલના ઘણા જિલ્લાઓમાં વધુ વરસાદની સંભાવના છે.
