જૂનાગઢમાં આયોજિત કૉંગ્રેસની પ્રશિક્ષણ શિબિરમાં નવનિયુક્ત જિલ્લા પ્રમુખોને માર્ગદર્શન આપવા માટે નેતા વિપક્ષ અને સાંસદ રાહુલ ગાંધી જૂનાગઢ પહોંચ્યા છે. કૉંગ્રેસના સંગઠન સૃજન અભિયાન હેઠળ જૂનાગઢમાં 19 સપ્ટેમ્બર સુધી 10 દિવસીય પ્રશિક્ષણ શિબિરનું આયોજન કરવામાં આવ્યું છે. રાહુલ ગાંધી કેશોદ એરપોર્ટ પર ઉતર્યા બાદ જૂનાગઢ પ્રશિક્ષણ શિબિરમાં પહોંચ્યા હતા. કોંગ્રેસના જિલ્લા પ્રમુખોને રાહુલ ગાંધી માર્ગદર્શન આપશે.
જૂનાગઢની ભવનાથ તળેટીમાં શહેર-જિલ્લા કોંગ્રેસ પ્રમુખની તાલીમ શિબિર ચાલી રહી છે. 12 સપ્ટેમ્બરે રાહુલ ગાંધી જૂનાગઢ પ્રશિક્ષણ શિબિરમાં હાજરી આપવા પહોંચી ગયા છે. અહીં તેઓ કોંગ્રેસ શહેર-જિલ્લા પ્રમુખોને માર્ગદર્શન આપશે. જૂનાગઢ પહોંચતા જ રાહુલ ગાંધીના સ્વાગતમાં પાકિસ્તાની આલ્બમ સોંગ વાગ્યું હતું. પ્રશિક્ષણ શિબિરોનું આયોજન 2027ની વિધાનસભા ચૂંટણીને ધ્યાનમાં રાખીને કરવામાં આવી રહ્યું છે. ગુજરાત કૉંગ્રેસે હાલમાં જ 2027ની વિધાનસભા ચૂંટણી પહેલા જિલ્લા સ્તરે પાર્ટીના સંગઠનને મજબૂત કરવા માટે તમામ જિલ્લા કોંગ્રેસ સમિતિઓના નવા પ્રમુખોની નિમણૂક કરી હતી.
ગુજરાતમાં કોંગ્રેસને ફરી ઉભી કરવા માટે કોંગ્રેસ હાઈકમાન્ડે કમર કસી છે, જેના ભાગરૂપે જૂનાગઢની ભવનાથ તળેટીમાં શહેર-જિલ્લા કોંગ્રેસ પ્રમુખની તાલીમ શિબિર ચાલી રહી છે. કોંગ્રેસના રાષ્ટ્રીય મહાસચિવ કે. સી. વેણુગોપાલે શિબિરમાં હાજર પ્રમુખોને સંબોધિત કરતાં સ્પષ્ટ શબ્દોમાં કહ્યું કે જે પ્રમુખો કામ નહીં કરે, તેમના પદ છીનવી લેવામાં આવશે. તેમણે પર્ફોમન્સ સુધારવા માટે 90 દિવસનું અલ્ટીમેટમ પણ આપ્યું હતું.
અમરેલી જિલ્લા પ્રમુખ પ્રતાપ દૂધાતને હાંકી કાઢવાની તૈયારીઓ ચાલી રહી છે. પ્રતાપ દૂધાતની પ્રશિક્ષણ શિબિરમાં ગેરહાજરી જોવા મળી હતી. સતત બીજી શિબિરમાં તેમની ગેરહાજરીને કારણે હાઇકમાન્ડમાં નારાજગી જોવા મળી રહી છે. ઉપરાંત કોંગ્રેસના રાષ્ટ્રીય અધ્યક્ષે 9 જિલ્લા પ્રમુખોને નિષ્ક્રીય ગણાવી સડેલી કેરી કહ્યાં છે. 41 શહેર અને જિલ્લા પ્રમુખોમાંથી 9 પ્રમુખોના નબળા પ્રદર્શન અંગે નારાજગી વ્યક્ત કરી હતી.
