આણંદ : આણંદ શહેર – જિલ્લામાં કોરોના મહામારીના પગલે કરફ્યુની પરિસ્થિતિ ઉભી થઇ છે. આ ઉપરાંત પોલીસ દરરોજ સામાન્ય માનવીને કોવિડ ગાઇડ લાઇનના નામે હજારો રૂપિયાનો દંડ ફટકારે છે. બીજી તરફ ધારાસભ્ય, નેતા અને આગેવાનો હજુ ગાંઠતાં નથી. ખંભાતના કલમસર ગામે આવું જ દ્રશ્ય જોવા મળ્યું હતું. ખંભાત ધારાસભ્ય સહિત અનેક ઉચ્ચ નેતાઓની હાજરીમાં હજારો લોકો કોરોનાની ગાઇડ લાઇનના ધજાગરા ઉડાડી ડાયરાની મજા માણતાં હતાં. તો ધારાસભ્ય તો ઉત્સાહી બની સ્ટેજ પર ચડી નોટોનો વરસાદ કર્યો હતો. આ ડાયરાના વાયરલ વિડીયોને લઇ અનેક ચર્ચાએ જોર પકડ્યું છે.
ખંભાતના કલમસર ખાતે કીર્તિદાન ગઢવીના કાર્યક્રમમાં કોવિડ નિયમોના ધજાગરા ઉડતા જોવા મળ્યાં હતાં. આ ડાયરામાં આણંદ જિલ્લા કોંગ્રેસ પ્રમુખ મહેન્દ્રસિંહ પરમાર, ખંભાત ભાજપના ધારાસભ્ય મયુર રાવલ, કિર્તિદાન ગઢવી ઉપર નોટોનો વરસાદ કરતાં નજરે ચડ્યાં હતાં. કોરોના મહામારીમાં નાના માણસોએ માસ્ક ન પહેરવા બાબતે રૂ.એક હજાર જેવો દંડ ભરવો પડે છે. બીજી બાજુ ડાયરામાં રાજકીય આગેવાનો ન તો માસ્ક પહેરેલા હતા કે સોશ્યલ ડિસ્ટન્સનો અમલ કરતાં જોવા મળ્યાં હતાં. આ વિડીયો વાયરલ થતા રાજકીય આગેવાનો ઉપર ટીકાનો વરસાદ થઈ રહ્યો છે. સામાન્ય નાગરિક ઉપર દંડનીય કાર્યવાહી ન કરાતા નાગરિકોમાં સરકારની બેધારી નીતિ બાબતે રોષ વધી રહ્યો છે. આ કાર્યક્રમમાં ધારાસભ્ય મયુર રાવલ, કોંગ્રેસના જિલ્લા પ્રમુખ મહેન્દ્રસિંહ પરમારની હાજરીમાં મોટી સંખ્યામાં ભીડ ઉમટી હતી. અહીં પણ કોરોના નિયમોના સરેઆમ ધજાગરા ઉડ્યા હતા. અહીં કોરોનાના કહેર વચ્ચે અનેક લોકો માસ્ક વગર દેખાયાં હતાં.
