નવી દિલ્હી: કેન્દ્રમાં વર્તમાન સરકાર સામે અવિશ્વાસ પ્રસ્તાવ પર ચર્ચાનો આજે છેલ્લો દિવસ છે. આજે વડાપ્રધાન નરેન્દ્ર મોદી (PM Modi) લોકસભમાં (Loksabha) સમગ્ર ચર્ચાનો જવાબ આપી રહ્યા છે અને ત્યારબાદ અવિશ્વાસ પ્રસ્તાવ પર મતદાન થશે. આ પહેલા 8 અને 9 ઓગસ્ટના બે દિવસે અવિશ્વાસ પ્રસ્તાવ પર ચર્ચા થઈ હતી. આ ચર્ચાની શરૂઆત કોંગ્રેસના સાંસદ ગૌરવ ગોગોઈએ કરી હતી. ગઈકાલે રાહુલ ગાંધીએ (Rahul Gandhi) મણિપુરના મુદ્દે સરકારને ઘેરવાનો પ્રયાસ કર્યો હતો. તેમણે આરોપ લગાવ્યો કે મણિપુરને બે ભાગમાં વહેંચવામાં આવ્યું છે. બીજી તરફ ગૃહમંત્રી અમિત શાહે સ્પષ્ટ રીતે મણિપુરની સંપૂર્ણ તસવીર ગૃહમાં રજૂ કરી અને કહ્યું કે આ મુદ્દે રાજકારણ ન કરવું જોઈએ.
પીએમ મોદીના સંબોધન બાદ લોકસભામાં અવિશ્વાસ પ્રસ્તાવ પર મતદાન થયું હતું. અવિશ્વાસની દરખાસ્ત ધ્વનિ મતથી પડી. આ પછી સંસદ સવારે 11 વાગ્યા સુધી સ્થગિત કરી દેવામાં આવી હતી.
મોદીએ વધુમાં જણાવ્યું હતું કે ગૃહમંત્રીએ મણિપુરની સ્થિતિ અંગે વિગતવાર વર્ણન કર્યું હતું. પરંતુ વિપક્ષ પાસે રાજનીતિ સિવાય કંઈ કરવાનું નથી. મણિપુરમાં કોર્ટનો નિર્ણય આવ્યો. તેમની તરફેણમાં અને વિરોધમાં પરિસ્થિતિ આવી અને હિંસાનો સમયગાળો શરૂ થયો. ઘણા લોકોએ તેમના નજીકના અને પ્રિયજનોને ગુમાવ્યા, મહિલાઓ પર ગુનાઓ આચરવામાં આવ્યા. કેન્દ્ર અને રાજ્ય સરકારો ગુનેગારોને કડક સજા મળે તે માટે કામ કરી રહી છે. દેશને વિશ્વાસ રાખવા દો, મણિપુરમાં શાંતિનો સૂરજ ચોક્કસપણે ઉગશે. હું મણિપુરના લોકોને પણ કહેવા માંગુ છું કે દેશ તમારી સાથે છે, અમે તમારી સાથે છીએ.
વડાપ્રધાનના ભાષણની વચ્ચે જ રાહુલ ગાંધી સહિત સમગ્ર વિપક્ષે વોકઆઉટ કર્યું હતું. વિપક્ષ પર પ્રહાર કરતા વડાપ્રધાને કહ્યું કે આ લોકો ગાળો આપીને ભાગી જાય છે. પીએમ મોદીએ કહ્યું કે જેને લોકશાહીમાં વિશ્વાસ નથી તે સંભળાવા માટે તૈયાર છે પણ સાંભળવામાં વિશ્વાસ નથી. તેમણે વધુમાં કહ્યું કે વિપક્ષની સમસ્યા એ છે કે પોતાની જાતને જીવંત રાખવા માટે તેમણે NDAનો સહારો લેવો પડશે. તમે NDA ને પણ ચોરી લીધું અને ‘INDIA’ ને I.N.D.I.A. કરી ટુકડા પણ કરી નાખ્યા છે. કોંગ્રેસની ઓળખ સાથે જોડાયેલી કોઈ વસ્તુ તેમની પોતાની નથી. ચૂંટણી ચિન્હથી માંડીને કોંગ્રેસ જે પણ પોતાના હોવાનો દાવો કરે છે તે બધું જ કોઈ બીજા પાસેથી ઉધાર લેવામાં આવ્યું છે.
પીએમ મોદીએ કહ્યું કે ‘દેશના વૈજ્ઞાનિકોએ કોરોનાની રસી બનાવી છે પરંતુ તેઓને ભારતની રસી પર વિશ્વાસ નથી. તેથી જ કોંગ્રેસ પ્રત્યે ભારતની જનતાની અવિશ્વાસની લાગણી ખૂબ ઊંડી છે. તેઓ ભારતની ક્ષમતામાં માનતા નથી. તેઓને ભારતના લોકોમાં વિશ્વાસ નથી. પરંતુ હું આ ગૃહને કહેવા માંગુ છું કે કોંગ્રેસ પ્રત્યે આ દેશના લોકોનો અવિશ્વાસ ઘણો ઊંડો છે. કોંગ્રેસ પોતાના અભિમાનમાં એટલી હદે ચકચૂર થઈ ગઈ છે કે તે જમીન જોઈ શકતી નથી.
વિપક્ષ પર નિશાન સાધતા પીએમ મોદીએ કહ્યું, ‘આ ગઠબંધનમાં દરેકે વડાપ્રધાન બનવું છે. 1991ની પશ્ચિમ બંગાળ વિધાનસભાની ચૂંટણીમાં આ જ ડાબેરી પક્ષે અધીર બાબુ સાથે જે પ્રકારનું વર્તન કર્યું તે આજે પણ ઇતિહાસમાં નોંધાયેલું છે. ગયા વર્ષે કેરળના વાયનાડમાં કોંગ્રેસ કાર્યાલયમાં તોડફોડ કરનારાઓ સાથે આ લોકો મિત્ર છે. સાચી વાત તો એ છે કે દેશની જનતાએ 30 વર્ષ પછી બે વખત પૂર્ણ બહુમતી સાથે સરકારને ચૂંટી કાઢી છે, પરંતુ ગરીબનો દીકરો અહીં કેવી રીતે પહોંચ્યો, અહીં કેવી રીતે બેઠો, આ ત્રાડ આજે પણ તમને પરેશાન કરે છે, તમને ઊંઘવા નથી દેતા. 2024માં પણ દેશની જનતા તમને ઊંઘવા દેશે પણ નહીં.
