ગાંધીનગર: પીએમ નરેન્દ્ર મોદી તા.26 મી સપ્ટેમ્બરની સાંજે અમદાવાદ આવી પહોચશે. ગુજરાતની બે દિવસીય મુલાકાત દરમિયાન મંગળવારે સાંજે અમદાવાદ એરપોર્ટ નજીક ગુજસેલના ગ્રાઉન્ડમાં મોદીનું મહિલાઓ દ્વારા ભવ્ય અભિવાનદ કરાશે. લોકસભામાં 33 ટકા મહિલા અનામતનું વિધેયક પસાર કરાયું છે, જેના પગલે રાજ્યભરમાંથી પ્રદેશ ભાજપના મહિલા અગ્રણીઓ તથા મહિલા કાર્યકરો દ્વારા પીએમ મોદીનું અભિવાદન કરાશે.
27મી સપ્ટેમ્બરના રોજ સવારે 10 વાગ્યે, પ્રધાનમંત્રી વાઇબ્રન્ટ ગુજરાત ગ્લોબલ સમિટના 20 વર્ષની ઉજવણી નિમિત્તે યોજાયેલા કાર્યક્રમમાં ભાગ લેશે. તે પછી, લગભગ 12:45 વાગ્યે છોટાઉદેપુરના બોડેલી પહોંચશે, જ્યાં તેઓ રૂ. 5200 કરોડથી વધુના પ્રોજેક્ટનો શિલાન્યાસ કરશે.
જો કે બુધવારે પ્રધાનમંત્રી મોદી સાયન્સ સિટી, અમદાવાદ ખાતે વાઇબ્રન્ટ ગુજરાત ગ્લોબલ સમિટના 20 વર્ષની ઉજવણી નિમિત્તે યોજાયેલા કાર્યક્રમમાં ભાગ લેશે. તે ઉદ્યોગ સંગઠનો, વેપાર અને વાણિજ્ય ક્ષેત્રની અગ્રણી હસ્તીઓ, યુવા ઉદ્યોગ સાહસિકો, ઉચ્ચ અને તકનીકી શિક્ષણ કોલેજોના વિદ્યાર્થીઓ સહિત અન્ય લોકોની ભાગીદારીનું સાક્ષી બનશે.
પ્રધાનમંત્રી ‘મિશન સ્કૂલ્સ ઑફ એક્સલન્સ’ કાર્યક્રમ હેઠળ રૂ. 4500 કરોડથી વધુના મૂલ્યના બહુવિધ પ્રોજેક્ટનો શિલાન્યાસ કરશે. હજારો નવા વર્ગખંડો, સ્માર્ટ ક્લાસરૂમ્સ, કોમ્પ્યુટર લેબ, STEM (સાયન્સ, ટેક્નોલોજી એન્જીનિયરિંગ અને ગણિત) લેબ અને ગુજરાતની તમામ શાળાઓમાં બાંધવામાં આવેલ અન્ય ઈન્ફ્રાસ્ટ્રક્ચર પ્રધાનમંત્રી દ્વારા રાષ્ટ્રને સમર્પિત કરવામાં આવશે. તેઓ મિશન હેઠળ સમગ્ર ગુજરાતની શાળાઓમાં હજારો વર્ગખંડોને સુધારવા અને અપગ્રેડ કરવા માટે શિલાન્યાસ પણ કરશે.
પ્રધાનમંત્રી ‘વિદ્યા સમીક્ષા કેન્દ્ર 2.0’ પ્રોજેક્ટનો શિલાન્યાસ પણ કરશે. આ પ્રોજેક્ટ ‘વિદ્યા સમીક્ષા કેન્દ્ર’ની સફળતા પર બાંધવામાં આવશે, જેણે ગુજરાતમાં શાળાઓનું સતત મોનિટરિંગ અને વિદ્યાર્થીઓના શિક્ષણ પરિણામોમાં સુધારો સુનિશ્ચિત કર્યો છે. ‘વિદ્યા સમીક્ષા કેન્દ્ર 2.0’ ગુજરાતના તમામ જિલ્લાઓ અને બ્લોક્સમાં વિદ્યા સમીક્ષા કેન્દ્રોની સ્થાપના તરફ દોરી જશે.
વડાપ્રધાન ક્યા-ક્યા પ્રોજેક્ટનું લોકાપર્ણ કરશે
કાર્યક્રમ દરમિયાન, વડાપ્રધાન વડોદરા જિલ્લાના તાલુકા સિનોરમાં ‘ઓદરા ડભોઈ-સિનોર-માલસર-આસા રોડ’ પર નર્મદા નદી પર બાંધવામાં આવેલા નવા પુલ સહિતની બહુવિધ વિકાસ યોજનાઓ પણ રાષ્ટ્રને સમર્પિત કરશે; ચાબ તલાવ પુનઃવિકાસ પ્રોજેક્ટ, દાહોદમાં પાણી પુરવઠા પ્રોજેક્ટ, વડોદરા ખાતે આર્થિક નબળા વર્ગ માટે લગભગ 400 નવા બનેલા મકાનો, સમગ્ર ગુજરાતના 7500 ગામોમાં વિલેજ વાઇ-ફાઇ પ્રોજેક્ટ અને દાહોદ ખાતે નવનિર્મિત જવાહર નવોદય વિદ્યાલયનું લોકાર્પણ કરશે. પ્રધાનમંત્રી છોટાઉદેપુરમાં પાણી પુરવઠા યોજનાનો શિલાન્યાસ કરશે; ગોધરા, પંચમહાલમાં ફ્લાયઓવર બ્રિજ અને દાહોદ ખાતે FM રેડિયો સ્ટુડિયો કેન્દ્ર સરકારની ‘બ્રોડકાસ્ટિંગ ઈન્ફ્રાસ્ટ્રક્ચર એન્ડ નેટવર્ક ડેવલપમેન્ટ (BIND)’ યોજના હેઠળ બનાવવામાં આવશે.
