PM મોદી 2 દિવસની મુલાકાતે કુવૈત પહોંચ્યા છે. વડા પ્રધાન નરેન્દ્ર મોદીએ કુવૈત શહેરમાં 101 વર્ષીય ભૂતપૂર્વ IFS અધિકારી મંગલ સૈન હાંડા સાથે મુલાકાત કરી હતી. PM મોદી કુવૈતના અમીર શેખ મેશાલ અલ-અહમદ અલ-જાબેર અલ-સબાહના આમંત્રણ પર કુવૈત શહેરની 2 દિવસની મુલાકાતે છે. છેલ્લા 43 વર્ષમાં ભારતીય વડાપ્રધાનની કુવૈતની આ બીજી મુલાકાત છે. તેમના પહેલા પૂર્વ વડાપ્રધાન ઈન્દિરા ગાંધી કુવૈત ગયા હતા. પીએમ મોદીની આ મુલાકાત દરમિયાન ભારત અને કુવૈતના સંબંધોમાં એક નવો ઐતિહાસિક અધ્યાય લખાય તેવી આશા છે.
તમને જણાવી દઈએ કે કુવૈતની બે દિવસીય મુલાકાતે જતા પહેલા વડાપ્રધાન નરેન્દ્ર મોદીએ શનિવારે કહ્યું હતું કે ભારત અને ખાડી દેશોના પશ્ચિમ એશિયાઈ ક્ષેત્રની શાંતિ, સુરક્ષા અને સ્થિરતામાં સમાન હિત છે. વડાપ્રધાન મોદી એવા સમયે કુવૈતની મુલાકાતે છે જ્યારે બે સપ્તાહ પહેલા સીરિયામાં રાષ્ટ્રપતિ બશર અલ-અસદનું શાસન પડી ભાંગ્યું હતું અને ગાઝા પર ઈઝરાયેલના હુમલા ચાલુ છે. તેમના પ્રસ્થાન પહેલા એક નિવેદનમાં પીએમ મોદીએ કહ્યું કે કુવૈતના ટોચના નેતૃત્વ સાથેની તેમની વાતચીત ભારત અને કુવૈત વચ્ચે ભાવિ ભાગીદારીનું પ્લાનિંગ કરવાની તક પૂરી પાડશે. અમે કુવૈત સાથેના અમારા ઐતિહાસિક સંબંધોને ખૂબ મહત્વ આપીએ છીએ જે પેઢીઓથી ચાલી આવ્યું છે.
મોદીએ જણાવ્યું હતું કે અમે માત્ર વેપાર અને ઊર્જાના ક્ષેત્રોમાં જ મજબૂત ભાગીદારો નથી પરંતુ પશ્ચિમ એશિયામાં શાંતિ, સુરક્ષા અને સ્થિરતામાં પણ અમારું સમાન હિત છે. તેથી તેઓ કુવૈતના અમીર, ક્રાઉન પ્રિન્સ અને વડા પ્રધાન સાથે મુલાકાત કરવા ઉત્સુક છે. આ આપણા લોકો અને ક્ષેત્રના લાભ માટે ભાવિ ભાગીદારીનો નકશો બનાવવાની તક હશે. તેમણે કહ્યું કે હું કુવૈતમાં ભારતીય પ્રવાસીઓને મળવા માટે ઉત્સુક છું જેમણે બંને દેશો વચ્ચે મિત્રતાના બંધનને મજબૂત બનાવવામાં મહત્વપૂર્ણ યોગદાન આપ્યું છે.
