નવી દિલ્હી: (New Delhi) મોદી સરકારે (Modi Government) આજે એટલે કે ગુરુવારે ઉજ્જવલા યોજનાના લાભાર્થીઓને મોટી ભેટ આપી છે. કેબિનેટે 1 એપ્રિલથી શરૂ થતા આગામી નાણાકીય વર્ષ માટે ઉજ્જવલા યોજના હેઠળ ગરીબ મહિલાઓને એલપીજી સિલિન્ડર પર 300 રૂપિયાની સબસિડી (Subsidy) ચાલુ રાખવાની જાહેરાત કરી છે.
ગયા વર્ષે ઓક્ટોબરમાં સરકારે 14.2 કિલોગ્રામના સિલિન્ડરની સબસિડી દર વર્ષે 12 રિફિલ માટે 200 રૂપિયાથી વધારીને 300 રૂપિયા પ્રતિ સિલિન્ડર કરી હતી. 300 રૂપિયા પ્રતિ સિલિન્ડર સબસિડી વર્તમાન નાણાકીય વર્ષ માટે હતી, જે 31 માર્ચે સમાપ્ત થાય છે. કેન્દ્રીય મંત્રી પીયૂષ ગોયલે કહ્યું કે કેબિનેટ કમિટી ઓન ઈકોનોમિક અફેર્સ (CCEA) એ હવે આ સબસિડીને 2024-25 સુધી લંબાવવાનો નિર્ણય લીધો છે.
આ પગલાથી આશરે 10 કરોડ પરિવારોને ફાયદો થવાની સંભાવના છે અને સરકારને 12,000 કરોડ રૂપિયાનો ખર્ચ થશે. લિક્વિફાઇડ પેટ્રોલિયમ ગેસ (LPG) એ ગ્રામીણ અને વંચિત ગરીબ પરિવારો માટે ઉપલબ્ધ સ્વચ્છ રસોઈ ઇંધણ છે. કેન્દ્ર સરકારે મે 2016માં ગરીબ ઘરની પુખ્ત વયની મહિલાઓને ડિપોઝિટ-ફ્રી એલપીજી કનેક્શન આપવા માટે પ્રધાનમંત્રી ઉજ્જવલા યોજના (PMUJ) શરૂ કરી હતી. આ અંતર્ગત જરૂરિયાતમંદોને વિનામૂલ્યે જોડાણ આપવામાં આવ્યા હતા.
ઉજ્જવલા યોજનાના લાભાર્થીઓને પણ બજાર ભાવે એલપીજી રિફિલ ખરીદવું પડતું હતું. ઇંધણના ભાવમાં વધારો થતાં સરકારે મે 2022 માં PMUY લાભાર્થીઓને સિલિન્ડર દીઠ રૂ. 200 સબસિડી પ્રદાન કરી હતી. ઓક્ટોબર 2023માં તે વધારીને 300 રૂપિયા કરવામાં આવી હતી.
ઉજ્જવલા લાભાર્થીઓ માટે 300 રૂપિયા પ્રતિ સિલિન્ડર સબસિડીને ધ્યાનમાં લીધા પછી કિંમત 603 રૂપિયા હતી જે કનેક્શન ધારકોના બેંક ખાતામાં સીધી ચૂકવવામાં આવે છે. PMUY ગ્રાહકોને એલપીજીના સતત ઉપયોગ માટે પ્રોત્સાહિત કરવા માટે લક્ષિત સમર્થન. PMUY ગ્રાહકોનો સરેરાશ LPG વપરાશ 2019-20માં 3.01 રિફિલ્સથી 20 ટકા વધીને 2021-22માં 3.68 થયો છે. તમને જણાવી દઈએ કે તમામ PMUY લાભાર્થીઓ લક્ષિત સબસિડી યોજના માટે પાત્ર છે.
