વડોદરા : બાપોદ પોલીસ મથકની હદમાં આવેલ ખોડિયારનગરમાં કુખ્યાત બુટલેગર શરાબની 16 બોટલ સાથે પીસીબીના હાથે ઝડપાયો હતો. પીસીબીની ટીમને બાતમી મળી હતી કે, કુખ્યાત બુટલેગર નિલેશ ઉર્ફે નિલુ હરેશભાઈ નાથાણી રહેવાસી :- બી-204 સર્જનમ રેસીકોમ , સત્યમ પાર્ટીપ્લોટ પાછળ, ખોડિયારનગર પાસે, વડોદરાના મકાનમાં દારૂનો જંગી જથ્થો છૂપાવ્યો છે.
પીસીબીની ટીમે છાપો મારતા બુટલેગરના મકાનમાંથી વિદેશી રાબન ફકત 16 બોટલ દારૂનો જથ્થો મળી આવ્યો હતો. પોલીસે એક નંગ મોબાઈલ સહિત બાર હજારનો મુદ્દામાલ જપ્ત કર્યો હતો અને બુટલેગર નિલેશની ધરપકડ કરીને બાપોદ પોલીસ મથકે પ્રોહીબીશનનો ગુનો નોંધાવ્યો હતો. પોલીસ પૂછતાછમાં આરોપીએ જણાવેલ કે, મુંબઈના ઉલ્લાસનગર ખાતે આવેલ વાઈન શોપમાંથી દારૂની બોટલ વેચાણ અર્થે ખરીદી કરી હતી અને લકઝરી બસમાં વડોદરા આવ્યો હતો.
ઉલ્લેખનીય છે કે, નિલેશ આજવા રોડ ખાતે માધવનગરમાં પણ દારૂનો વેપલો કરતો હતો. તાજેતરમાં નિલેશે પોતાનો બર્થ-ડે મનાવવા દારૂની બોટલ વચ્ચે કેક ગોઠવીને ઉજવતો વિડિયો વાયરલ થતાં પોલીસે કાનૂની કાર્યવાહી આદરી હતી. નામચીન બુટલેગર નિલેશ શહેર અને જિલ્લામાં આઠથી વધુ પ્રોહીબીશનના ગુનામાં ઝડપાયેલો છે અને ત્રણ વખત પાસાની સજા પણ કાપી ચૂકયો છે.
