રાજધાની દિલ્હીમાં આવતીકાલ એટલે કે 16 ફેબ્રુઆરીથી 20 ફેબ્રુઆરી સુધી ઇન્ડિયા AI ઇમ્પેક્ટ સમિટ 2026 યોજાશે. આ સમિટની રચના મુખ્ય લોકો, ગ્રહ અને પ્રગતિ જેવા ત્રણ મુખ્ય સ્તંભોની આસપાસ રચાયેલ છે. આ એક્સ્પો દિલ્હીના પ્રગતિ મેદાનમાં આવેલા ભારતમંડપમમાં યોજાશે, જે આશરે 75,000 ચોરસ મીટરને આવરી લેશે. આ સમિટનો મુખ્ય ઉદ્દેશ ભારતને ગ્લોબલ એઆઈ હબ બનાવવાનો છે. 100થી વધુ દેશોએ સમિટમાં તેમની ભાગીદારીની હામી ભરી છે. આ સમિટનું ઉદ્ધાટન માનનીય વડાપ્રધાન નરેન્દ્ર મોદી કરશે.
સમિટમાં ગૂગલ, એનવીડિયા, ઓપનએઆઈ જેવી 400 દિગ્ગજ કંપનીઓ ભાગ લેવાની છે. આ સિવાય દેશની સૌથી ટોચની ટેક્નોલોજી કંપનીઓ પણ ભાગ લેવાની છે. આ સમિટમાં ગૂગલના સીઈઓ સુંદર પિચાઈ, ઓપનએઆઈના સેમ ઓલ્ટમેન, એનવીડિયાના જેન્સેન હુઆંગ, એન્થ્રોપિકના ડારિયો અમોડેઈ, ડીપમાઇન્ડના ડેમિસ હાસાબીસ, માઇક્રોસોફ્ટના પ્રમુખ બ્રેડ સ્મિથ અને ક્વાલકોમના સીઈઓ ક્રિસ્ટિયાનો એમોન આ સમિટમાં હાજર રહેશે એવી અપેક્ષા સેવાઈ રહી છે. આ સિવાય આ સમિટમાં 15-20 સરકારના વડાઓ, 50થી વધુ આંતરરાષ્ટ્રીય મંત્રીઓ અને 40થી વધુ ભારતીય અને વૈશ્વિક સીઈઓ પણ આ કાર્યક્રમમાં હાજરી આપશે. આ એક્સ્પોમાં સ્ટાર્ટઅપ્સ અને રોકાણકારોને જોડવા માટે વિશેષ સત્ર યોજાશે. તેમ જ પાંચ દિવસીય આ ઇવેન્ટમાં એઆઈ અને તેની અસરો પર લગભગ 700 જેટલા સેશન યોજાશે.
ઇવેન્ટમાં મુખ્ય રૂપે રોજગારની તકો, પર્યાવરણને અનુરૂપ એઆઈનો ઉપયોગ, આર્થિક વિકાસ પર પણ ચર્ચા કરવામાં આવશે. આ ઉપરાંત ગ્લોબલ નોર્થ અને સાઉથના પ્રતિનિધિઓ મળીને એઆઈને સુરક્ષાને ધ્યાનમાં રાખીને કેવી રીતે ઉપયોગ કરવો એ વિશે ચર્ચાઓ થશે. આ સમિટ યોજાવાના કારણે દિલ્હીની 20થી 30 હજારની ફાઇવ સ્ટાર હોટેલ્સના ભાવ પણ આસમાને પહોંચ્યા છે, જે એક લાખ, બે લાખ નહી પણ 30 લાખ સુઘી પહોંચ્યા છે.
