સાયણ: (Sayan) ઓલપાડ પોલીસે ઇસનપોર ગામની સીમની એક રેસિડન્સીના મકાનમાં પાર્કિંગ (Parking) કરેલી મહિન્દ્રા કારના ચોરખાનામાં છુપાવેલા રૂ.૧,૧૭,૬૦૦ની કિંમતનો વિદેશી દારૂનો (Alcohol) જથ્થો ઝડપી કારના અજાણ્યા ચાલકને વોન્ટેડ જાહેર કર્યો હતો.
- ઓલપાડના ઇસનપોરમાં પાર્ક કરેલી કારના ચોરખાનામાંથી દારૂ ઝડપાયો
- પોલીસે રૂ.૧.૧૭ લાખનો દારૂ ઝડપી ચાલકને વોન્ટેડ જાહેર કર્યો
સોમવારે મોડી સાંજે ઓલપાડ પોલીસને બાતમી મળી હતી કે, ઓલપાડ-સાયણ રોડ ઉપર ઇસનપોર ગામની સીમમાં આવેલી રોયલ પાર્ક રેસિડન્સી વિભાગ નં-૧ના મકાન નં.૩૮૧ના પાર્કિંગમાં પાર્ક કરેલી મહિન્દ્રા કાર નં.(જીજે-૨૭,બીએલ-૫૬૬૮)માં ચોરખાનું બનાવી વિદેશી દારૂનો જથ્થો ભર્યો છે. જેના પગલે પોલીસે રેઇડ કરતાં કારમાંથી બોટલ નંગ-૩૮૪ કિંમત રૂ.૮૧,૬૦૦ તથા ૩૬ પાઉચમાં ભરેલો રૂ.૩૬,૦૦૦નો દારૂ મળી કુલ રૂ.૧,૧૭,૬૦૦ની કિંમતનો વિદેશી દારૂનો જથ્થો મળી આવ્યો હતો. પોલીસે ગુના સ્થળેથી વિદેશી દારૂ સહિત રૂ.૫ લાખની કિંમતની કાર મળી કુલ રૂ.૬,૧૭,૬૦૦નો મુદ્દામાલ કબજે લીધો હતો. પોલીસે આ ગુનામાં કારચાલકને વોન્ટેડ જાહેર કરી વધુ તપાસ હાથ ધરી છે.
લાડવી સર્વિસ રોડ ઉપર પાર્ક કરેલા ટેમ્પોમાંથી 6.98 લાખનો દારૂ ઝડપાયો
પલસાણા: સુરત જિલ્લા એલસીબીએ બાતમીના આધારે કામરેજના લાડવી ગામે નેશનલ હાઇવેના સર્વિસ રોડ ઉપર પાર્ક કરેલા ટેમ્પોમાંથી 6.98 લાખનો દારૂ સાથે ટેમ્પો ચાલકને ઝડપી પાડ્યો હતો. સુરત એલ.સી.બી.ને બાતમી મળી હતી કે, એક સફેદ કલરનો ટાટા ટેમ્પો નં.(GJ-05-BT-8015)નો ચાલક ટેમ્પોમાં દારૂનો જથ્થો ભરી લાડવીની સીમમાં મુંબઈથી અમદાવાદ જતા ને.હા નં.૪૮ હાઇવે ઉપર ગુરુકુળ વિદ્યાસંકુલ સામે સર્વિસ રોડ ઉપર ઊભો છે. અને દારૂ સગેવગે કરવાની પેરવીમાં છે.
આથી રેઇડ કરતાં ટેમ્પો નં.(GJ- 05-BT-8015) ટેમ્પો ઝડપી પાડી દારૂ કિં.રૂ.૬,૯૮,૪૦૦ સાથે ટેમ્પોચાલક મુકેશ ખેમરાજ સાલવી (ઉં.વ.૨૬) (રહે.,શિવપુર, પોસ્ટ ગાજુના, તા.માંડલ, રાજસ્થાન)ને ઝડપી પાડવામાં આવ્યો હતો. દારૂનો જથ્થો ભરાવનાર મહાવીર સંપતલાલ મેવાડા (રહે.,શિવપુર), દારૂ ભરી ટેમ્પો ભરીને આપવા આવનાર ચાલક અને દારૂનો જથ્થો ભરાવનાર તથા ટેમ્પોમાં સાથે આવનારા બે અજાણ્યા ઇસમને વોન્ટેડ જાહેર કરી પોલીસે ટેમ્પો સહિત કુલ 10,00,340નો મુદ્દામાલ પકડી આરોપીઓ વિરુદ્ધ કાર્યવાહી કરી વધુ તપાસ અર્થે કામરેજ પોલીસ સ્ટેશન ખાતે સોંપવામાં આવ્યા હતા.
ખોજબલમાં વિદેશી દારૂનો જથ્થો ઝડપાયો
ભરૂચ: વાગરાના ખોજબલ ગામની નવી નગરીમાંથી વિદેશી દારૂના જથ્થા સાથે મહિલા સહિત એક ઇસમને વાગરા પોલીસે ઝડપી પાડી કાર્યવાહી હાથ ધરી છે. વાગરા પોલીસે બાતમીના આધારે ખોજબલ ગામની નવીનગરીમાં દરોડા પાડી વિવિધ બ્રાન્ડની ઇંગ્લિશ દારૂની બોટલ મળી કુલ મુદ્દામાલ 15,500 રૂપિયાનો ઝડપી લઇને જયેશ બીપીન વસાવા અને અનીતા હેમંત બજરંગીરાયની ધરપકડ કરી બંને વિરુદ્ધ પ્રોહિબિશન એક્ટ હેઠળ ગુનો નોંધી કાર્યવાહી હાથ ધરી છે.
