નવી દિલ્હી: નેપાળે (Nepal) 16 ભારતીય કંપનીઓની (Indian Companies) દવાઓની (Medicine) આયાત પર પ્રતિબંધ મૂક્યો છે. આફ્રિકન દેશોમાં કફ સિરપના કારણે બાળકોના મોત બાદ WHOએ તેનાથી સંબંધિત દવાઓને લઈને ચેતવણી જાહેર કરી હતી. WHOના એલર્ટ બાદ નેપાળે 16 ભારતીય કંપનીઓની દવાઓની આયાત પર પ્રતિબંધ લગાવી દીધો છે. નેપાળ ડ્રગ રેગ્યુલેટરી ઓથોરિટી દ્વારા બહાર પાડવામાં આવેલી આ યાદીમાં ઘણી મોટી ભારતીય ફાર્માસ્યુટિકલ કંપનીઓ (Indian pharmaceutical companies) સામેલ છે. દિવ્ય ફાર્મસી સહિત 16 ભારતીય ફાર્માસ્યુટિકલ કંપનીઓ નેપાળના ડ્રગ એડમિનિસ્ટ્રેશન વિભાગની યાદીમાં સામેલ છે. Divya Pharmacy યોગ ગુરુ રામદેવની પતંજલિ પ્રોડક્ટ્સનું ઉત્પાદન કરે છે.
આ કંપનીઓની દવાઓ થઈ બેન
નેપાળ દ્વારા જાહેર કરાયેલ પ્રતિબંધિત ભારતીય ફાર્માસ્યુટિકલ કંપનીઓની યાદીમાં રેડિયન્ટ પેરેન્ટેરલ્સ લિ., મર્ક્યુરી લેબોરેટરીઝ લિ., એલાયન્સ બાયોટેક, કેપ્ટબ બાયોટેક, એગ્ગ્લોમેડ લિ., ઝી લેબોરેટરીઝ લિ., ડેફોડિલ્સ ફાર્માસ્યુટિકલ્સ લિ., જીએલએસ ફાર્મા લિ., યુનિજુલ્સ લાઇફ સાયન્સ લિ., કોન્સેપ્ટ ફાર્માસ્યુટિકલ્સ પ્રા.નો સમાવેશ થાય છે.
આ સિવાય આનંદ લાઈફ સાયન્સ લિમિટેડ, આઈપીસીએ લેબોરેટરીઝ લિમિટેડ, કેડિલા હેલ્થકેર લિમિટેડ, ડાયલ ફાર્માસ્યુટિકલ્સ, એગ્ગ્લોમેડ લિમિટેડ અને મેકર લેબોરેટરીઝ લિમિટેડ જેવી મોટી કંપનીઓ પણ પ્રતિબંધની યાદીમાં સામેલ છે. આ કંપનીઓ WHO ના ધોરણોનું પાલન કરવામાં નિષ્ફળ રહી છે. જેના કારણે નેપાળમાં તેમના પર પ્રતિબંધ મુકવામાં આવ્યો છે.
શા માટે પ્રતિબંધ મૂકવામાં આવ્યો?
પ્રવક્તા સંતોષ કેસીએ જણાવ્યું હતું કે ફાર્માસ્યુટિકલ કંપનીઓની ઉત્પાદન સુવિધાઓનું નિરીક્ષણ કર્યા બાદ જેમણે આપણા દેશમાં તેમના ઉત્પાદનોની નિકાસ કરવા માટે અરજી કરી હતી. અમે એવી કંપનીઓની યાદી પ્રકાશિત કરી છે જે WHOના નિયમોનું પાલન કરતી નથી.
ટેસ્ટમાં કંપનીઓ નિષ્ફળ
એપ્રિલ અને જુલાઈમાં વિભાગે દવા નિરીક્ષકોની એક ટીમને ફાર્માસ્યુટિકલ કંપનીઓના ઉત્પાદન એકમોનું નિરીક્ષણ કરવા માટે મોકલી હતી જેણે નેપાળમાં તેમના ઉત્પાદનો સપ્લાય કરવા માટે અરજી કરી હતી. કેટલીક કંપનીઓના ઉત્પાદનો નિયમનકારી આવશ્યકતાઓનું પાલન કરતા નથી અને કેટલીક કંપનીઓ સારી ઉત્પાદન પદ્ધતિઓનું પાલન કરતી નથી. આમાંની કેટલીક કંપનીઓના ઉત્પાદનોનો ઉપયોગ ક્રિટિકલ કેર, ડેન્ટલ કાટ્રિર્ઝ અને રસીઓમાં થાય છે.
