મુંબઈઃ (Mumbai) મહારાષ્ટ્ર વિધાનસભામાં (Maharashtra Assambly) મરાઠા આરક્ષણ બિલ સર્વસંમતિથી પસાર થયું છે. જેમાં મરાઠા સમુદાયના લોકોને સરકારી નોકરીઓ અને શિક્ષણમાં 10 ટકા અનામત મળશે. વિધાનસભાના વિશેષ સત્રમાં આ બિલ સર્વસંમતિથી પસાર કરવામાં આવ્યું હતું. વિધાનસભામાં મરાઠા આરક્ષણ બિલ પાસ થતાં જ લોકોએ ઉજવણી શરૂ કરી દીધી હતી. મહારાષ્ટ્ર વિધાનસભાની બહાર પણ લોકો ઢોલ-નગારા સાથે ઉજવણી કરતા જોવા મળ્યા હતા. મહારાષ્ટ્ર વિધાનસભામાં વિપક્ષના નેતા વિજય વડેટ્ટીવારે કહ્યું કે વિપક્ષી દળોનો પણ એ જ મત છે કે મરાઠા સમુદાયને અનામત આપવી જોઈએ.
મુખ્યમંત્રી એકનાથ શિંદેની સરકારે મરાઠા આરક્ષણને લઈને મહારાષ્ટ્ર વિધાનસભાનું વિશેષ સત્ર બોલાવ્યું હતું. મુખ્ય પ્રધાન સાથે નાયબ મુખ્ય પ્રધાનો દેવેન્દ્ર ફડણવીસ અને અજિત પવાર પણ હાજર હતા. સરકારનો ઉદ્દેશ્ય અન્ય સમુદાયોના લાભોને અસર કર્યા વિના મરાઠા સમુદાયને કાયમી અનામત આપવાનો છે. તેને વિધાનસભામાં પસાર કર્યા પછી સીએમ એકનાથ શિંદેએ મહારાષ્ટ્ર વિધાન પરિષદમાં મરાઠા આરક્ષણ બિલ રજૂ કર્યું હતું.
અમે જાતિ કે ધર્મના આધારે વિચારતા નથી – શિંદે
મંગળવારે મુખ્યમંત્રી એકનાથ શિંદેની ગઠબંધન સરકાર દ્વારા મંજૂર કરાયેલ 10 ટકા મરાઠા ક્વોટા બિલ તત્કાલીન દેવેન્દ્ર ફડણવીસ સરકાર દ્વારા રજૂ કરાયેલ સામાજિક અને શૈક્ષણિક રીતે પછાત વર્ગ અધિનિયમ, 2018 જેવું જ છે. એક દાયકામાં આ ત્રીજી વખત છે જ્યારે રાજ્યએ મરાઠા ક્વોટા માટે કાયદો રજૂ કર્યો છે. મુખ્યમંત્રી એકનાથ શિંદેએ વિધાનસભામાં કહ્યું કે હું રાજ્યનો સીએમ છું અને દરેકના આશીર્વાદથી કામ કરું છું. આપણે જાતિ કે ધર્મના આધારે વિચારતા નથી. આપણા વડાપ્રધાન હંમેશા કહે છે કે સબકા સાથ, સબકા વિકાસ.
બિલમાં શું છે?
મહારાષ્ટ્ર રાજ્ય સામાજિક અને શૈક્ષણિક રીતે પછાત વિધેયક 2024 દરખાસ્ત કરે છે કે આરક્ષણ પર તેના અમલીકરણના 10 વર્ષ પછી સમીક્ષા કરી શકાય છે. બિલમાં કહેવામાં આવ્યું હતું કે રાજ્યમાં મરાઠા સમુદાયની વસ્તી 28 ટકા છે. ગરીબી રેખા નીચે જીવતા કુલ મરાઠા પરિવારોમાંથી 21.22 ટકા પીળા રાશન કાર્ડ ધરાવે છે જે રાજ્યની સરેરાશ 17.4 ટકા કરતાં વધુ છે. જાન્યુઆરી-ફેબ્રુઆરી વચ્ચે કરવામાં આવેલા સર્વેમાં એવું પણ જાણવા મળ્યું છે કે મરાઠા સમુદાયના 84 ટકા પરિવારો એડવાન્સ કેટેગરીમાં આવતા નથી. આવા કિસ્સાઓમાં તેઓ આરક્ષણ માટે પાત્ર છે. બિલમાં એમ પણ કહેવામાં આવ્યું છે કે મહારાષ્ટ્રમાં આત્મહત્યા કરનારા કુલ ખેડૂતોમાંથી 94 ટકા મરાઠા પરિવારોના હતા.
