નવી દિલ્હી: દેશમાં વરસાદ (Rain) અને ઠંડી (Cold) બાદ હવે ગરમીનો (Heat) અહેસાસ થઈ રહ્યો છે. છેલ્લા કેટલાક દિવસથી તાપમાન ઊંચુ જતા ગરમીનું પ્રમાણ વધ્યું છે. ત્યારે હવે દેશની રાજધાનીમાં વરસાદના કારણે ગુલાબી ઠંડી બાદ ગરમીનું પ્રમાણ જોવા મળી રહ્યું છે. છેલ્લા બે દિવસથી બપોરના સમયે તાપમાનમાં ભારે વધારો નોંધાયો હતો અને તાપમાને નવા રેકોર્ડ બનાવવાનું શરૂ કર્યું છે. જો કે રાત્રી દરમિયાન થોડી ઠંડી પડી રહી છે. હવામાન વિભાગ (IMD) અનુસાર, દિલ્હીમાં હવે ઉનાળાની ગરમી જોવા મળશે અને આગામી દિવસોમાં ગરમીનો પારો ઊંચો જશે. ચાલો જાણીએ, દિલ્હીના હવામાન પર IMD અપડેટ શું છે.
હવામાન વિભાગ (IMD) અનુસાર, રવિવારે દિલ્હીનું મહત્તમ તાપમાન 34.8 ડિગ્રી સેલ્સિયસ અને લઘુત્તમ તાપમાન 15.4 ડિગ્રી સેલ્સિયસ નોંધાયું હતું, જે સામાન્ય કરતાં ચાર ડિગ્રી ઓછું હતું. તે જ સમયે, ભેજનું પ્રમાણ 21 ટકાથી 80 ટકાની વચ્ચે રહ્યું હતું. છેલ્લા કેટલાય દિવસોમાં મહત્તમ તાપમાનમાં આ જોરદાર વધારો છે.
કેવું રહેશે આજે દિલ્હીનું હવામાન?
આજના હવામાન વિશે વાત કરીએ તો, સોમવારે આંશિક વાદળછાયું રહેવાની આગાહી કરવામાં આવી છે, જ્યારે મહત્તમ અને લઘુત્તમ તાપમાન અનુક્રમે 35 અને 16 ડિગ્રી સેલ્સિયસની આસપાસ રહેવાની સંભાવના છે. મંગળવારે પણ હવામાન એવું જ રહેશે. બુધવારની વાત કરીએ તો લઘુત્તમ તાપમાન એક પોઈન્ટ વધીને 17 ડિગ્રી સુધી પહોંચી શકે છે. સપ્તાહના અંત સુધીમાં એટલે કે શનિવાર સુધીમાં લઘુત્તમ તાપમાન વધીને 18 ડિગ્રી સેલ્સિયસ અને મહત્તમ તાપમાન 37 ડિગ્રી સેલ્સિયસ નોંધાઈ શકે છે. પરંતુ આ સમગ્ર સપ્તાહમાં આકાશમાં હળવા વાદળો રહેશે.
હવામાન વિભાગે માહિતી આપી છે
હવામાન વિભાગે જણાવ્યું છે કે આગામી એક સપ્તાહ સુધી હવામાનમાં ફેરફારની કોઈ શક્યતા નથી. આકાશ સ્વચ્છ રહેશે અને તેજસ્વી સૂર્યપ્રકાશ પણ ચમકશે. સોમવારથી શનિવાર સુધી દિવસનું તાપમાન 37 ડિગ્રીને વટાવી જશે. હવામાન વિભાગે કહ્યું છે કે લઘુત્તમ તાપમાનમાં પણ ધીમે ધીમે વધારો થશે અને આ સપ્તાહે તે 18 ડિગ્રી સુધી પહોંચી જશે. હવામાન વિભાગે પહેલેથી જ કહ્યું છે કે એપ્રિલના ત્રીજા સપ્તાહમાં દિલ્હીનું મહત્તમ તાપમાન 40 ડિગ્રી સુધી જશે અને મહિનાના અંત સુધીમાં ગરમીની લહેર પણ શરૂ થઈ જશે.
દિલ્હીમાં હવા પ્રદૂષિત થવા લાગી
દિલ્હી-એનસીઆરમાં ગરમીના વધારા સાથે ફરી એકવાર હવા પ્રદૂષિત થવા લાગી છે. સૂકા પશ્ચિમી ધૂળવાળા પવનોને કારણે, દેશની રાજધાની દિલ્હી અને એનસીઆર વિસ્તારોમાં હવાની ગુણવત્તા ફરી એકવાર 9 એપ્રિલે નબળી શ્રેણીમાં પહોંચી ગઈ હતી. રવિવારે દિલ્હીનો એર ઈન્ડેક્સ 217, ફરીદાબાદ 147, ગાઝિયાબાદ 200, ગ્રેટર નોઈડા 249, ગુરુગ્રામ 166 અને નોઈડા 197 નોંધાયો હતો.
હાલ વરસાદની કોઈ શક્યતા નથી
હવામાન વિભાગે તેની સુધારેલી આગાહીમાં કહ્યું છે કે હવે હવામાન આવું જ રહેશે અને આગામી સપ્તાહ સુધી વરસાદની કોઈ શક્યતા નથી. વિભાગની આગાહી મુજબ, આગામી ત્રણથી પાંચ દિવસ દરમિયાન દેશના મોટાભાગના વિસ્તારોમાં મહત્તમ તાપમાનમાં 3 થી 5 ડિગ્રી સેલ્સિયસનો વધારો જોવા મળશે. વિભાગના જણાવ્યા અનુસાર દિલ્હીમાં ગુરુવારે મહત્તમ તાપમાન 36 ડિગ્રી અને શનિવાર સુધીમાં 37 ડિગ્રી સુધી પહોંચી શકે છે. હવામાન વિભાગના જણાવ્યા અનુસાર દક્ષિણના રાજ્યો તેલંગાણા, તમિલનાડુ અને પુડુચેરીના કેટલાક વિસ્તારોમાં આગામી 5 દિવસ સુધી વરસાદ પડી શકે છે. તે જ સમયે, દેશના અન્ય ભાગોમાં વરસાદની કોઈ ખાસ સંભાવના નથી.
