વડોદરા : વડોદરાજિલ્લામાં છેલ્લા ચાર દિવસથી પડી રહેલા વરસાદને કારણે અનેક ગામોમાં ઘૂંટણ સમાં પાણી ભરાયા છે.જેમાં વડોદરાથી માત્ર પાંચ કિલોમીટરના અંતરે વાઘોડિયા તાલુકાના કેટલાક ગામોનો પાણીમાં ગરકાવ થવા પામ્યો છે.બુધવારે સવારે વડોદરાથી વાઘોડિયા તરફ જવાના માર્ગ પર પાણી ફરી વળતા વાહન વ્યવહાર બંધ કરવાની ફરજ પડી હતી. વાઘોડિયાને જોડતા મુખ્ય માર્ગ પર પાણી ફરી વળતા કલાકો સુધી ટ્રાફિક જામની સ્થિતિ સર્જાઈ હતી. આગામી પાંચ દિવસ રાજ્યમાં હળવા તથા ભારે વરસાદની આગાહીના પરિણામે વડોદરા શહેર-જિલ્લામાં અસર કરતાં ડેમ અને તળાવો તથા તેની આસપાસના ગામોને એલર્ટ કરવામાં આવ્યા છે.
ખાસ કરીને વઢવાણા તળાવ તથા તેની આસપાસના તેર ગામોને એલર્ટ કરી મામલતદાર ટીડીઓ ને સૂચના આપી સલામતીના પગલાં તાત્કાલિક ધોરણે ભરવા અને હેડ કવોટર ના છોડવા આદેશ સાથે દરેક તાલુકા લેવલે કલાસ વન અધિકારીની નિમણૂક કરી મામલતદાર ટીડીઓની ટીમ બનાવવામાં આવી છે અને શહેરના નીચાણવાળા વિસ્તારોમાં પણ સાવચેતીના ભાગરૂપે તાત્કાલિક ધોરણે પગલાં ભરવાની સૂચના આપવામાં આવી છે.હાલ વડોદરા શહેર જિલ્લામાં 64 ટકા વરસાદ વરસી ચૂક્યો છે.સૌથી વધુ પાદરામાં 93 ટકા વરસાદ વરસ્યો છે.
એક તરફ જીલ્લાના ધારાસભ્યો દૂધ ઉત્પાદકો ને ન્યાય અપાવવા મ્યાન માંથી તલવાર કાઢીને વાઢી નાખવા સુધીના નિવેદનો કરતા ફરી રહ્યા છે. જ્યારે તેઓના જ વિધાનસભા મતવિસ્તારમાં રસ્તા પર પાણી ફરી વળ્યાં છે.30 વર્ષથી ધારાસભ્ય રહેલા મધુ શ્રીવાસ્તવના મત વિસ્તાર વાઘોડિયાની હાલત કંઈક એવી હતી કે મુખ્ય માર્ગ પર વરસાદી પાણી ફરી વળતા કલાકો સુધી વાહનવ્યવહાર ખોરવાયો હતો.વાઘોડિયા GIDCમાં નોકરી પર જતાં અને યુનિ.માં અભ્યાસ કરવા જતાં વિદ્યાર્થીઓ પણ અટવાયા હતા.
વાઘોડિયા રોડના ગાયત્રી મંદિરથી પીપળીયા ગામ સુધી એક તરફના માર્ગ પાણીમાં ગરકાવ થયો. પીપળીયા ગામમાં જવાના રસ્તામાં કમર સુધીના પાણી ભરાઈ ગયા હતા.ગામના લોકોને ટ્રેક્ટરમાં અવર જવર કારવાની નોબત આવી હતી. પીપળીયાની નવી નગરી બેટમાં ફેરવાઈ ગઈ હતી.જ્યારે જાંબુઆ નદીમાં પાણી આવતા આસપાસના અનેક વિસ્તારોનો પાણીમાં ગરકાવ થયો હતો.ગામના સરપંચ દ્વારા જણાવવામાં આવ્યું હતું કે જાંબુઆ નદીમાં પુરની સ્થિતિ દર વર્ષે સર્જાય છે.સિંચાઈ વિભાગમાં વારંવારની રજૂઆતો કરી છતાંય ગ્રાન્ટના અભાવનો હવાલો આપી કામ કરવામાં આવતું નથી.
