શુક્રવારે સાંજે મહારાષ્ટ્રના અંબરનાથમાં ફ્લાયઓવર પર થયેલા ભયાનક માર્ગ અકસ્માતે સમગ્ર વિસ્તારને હચમચાવી નાંખ્યો. ચાર લોકોના ઘટનાસ્થળે જ મોત થયા, જ્યારે ચાર લોકો ગંભીર રીતે ઘાયલ થયા.
શિવસેનાના ઉમેદવાર કિરણ ચૌબે તેમના ડ્રાઇવર લક્ષ્મણ શિંદે સાથે ચૂંટણી પ્રચાર માટે બુવા પાડા વિસ્તારમાં જઈ રહ્યા હતા ત્યારે આ અકસ્માત થયો.
હકીકતમાં, આ ઘટના દરમિયાન ડ્રાઇવર લક્ષ્મણ શિંદેને અચાનક હૃદયરોગનો હુમલો આવ્યો. હૃદયરોગના હુમલાથી કાર પરથી ડ્રાઈવરે બેલેન્સ ગુમાવ્યું. અનિયંત્રિત કાર ફુલસ્પીડમાં ડિવાઇડરને ઓળંગી ગઈ અને ચારથી પાંચ સામેથી આવતા વાહનો સાથે અથડાઈ ગઈ. કિરણ ચૌબેએ પોતે પોલીસને આ અંગે જાણ કરી. ટક્કર એટલી ગંભીર હતી કે અનેક વાહનોને ભારે નુકસાન થયું અને રસ્તા પર અરાજકતા ફેલાઈ ગઈ.
આ અકસ્માતમાં ડ્રાઇવર લક્ષ્મણ શિંદે, મ્યુનિસિપલ કાઉન્સિલના કર્મચારી ચંદ્રકાંત અનારકે, 17 વર્ષીય સુમિત ચેલાની અને શૈલેષ જાધવનું મોત થયું હતું. આ દરમિયાન, મોટરસાયકલ ચલાવનાર ચંદ્રકાંત અનારકે ફ્લાયઓવરની વચ્ચે ફેંકાઈ ગયો હતો અને બાદમાં હોસ્પિટલમાં તેનું મૃત્યુ થયું હતું. અકસ્માતના સીસીટીવી ફૂટેજ પણ સામે આવ્યા છે, જે ઘટનાની ભયાનકતા દર્શાવે છે.
અકસ્માત પછી તરત જ ઘટનાસ્થળે હાજર લોકોએ કારનો કાચ તોડીને શિવસેનાના ઉમેદવાર કિરણ ચૌબેને બહાર કાઢ્યા. તેમને ખાનગી હોસ્પિટલમાં દાખલ કરવામાં આવ્યા છે. અન્ય ઘાયલોમાં અમિત ચૌહાણ અને અભિષેક ચૌહાણનો સમાવેશ થાય છે. અકસ્માત બાદ સ્થાનિક પોલીસ ઘટનાસ્થળે પહોંચી અને તપાસ શરૂ કરી. વાહનોની ટેકનિકલ તપાસ હાથ ધરી અને પ્રત્યક્ષદર્શીઓના નિવેદનો નોંધ્યા.
સ્થાનિક લોકોનું કહેવું છે કે કાર અચાનક કાબુ બહાર થઈ ગઈ અને થોડીક સેકન્ડોમાં જ અનેક લોકોને ટક્કર મારી દીધી. હાલમાં બધા ઘાયલોની સારવાર ચાલી રહી છે, અને પોલીસ સંપૂર્ણ તપાસ કરી રહી છે.
