પુરીમાં ભગવાન જગન્નાથની રથયાત્રા સાંજે 4 વાગ્યે શરૂ થઈ ગઈ છે. સૌ પ્રથમ ભગવાન બલભદ્રનો રથ ભક્તો દ્વારા ખેંચવામાં આવ્યો હતો. થોડા અંતર સુધી ખેંચ્યા પછી રથ થોભી ગયો. પછી દેવી સુભદ્રાનો રથ ખેંચવામાં આવ્યો અને ત્યારબાદ ભગવાન જગન્નાથનો રથ ખેંચાવામાં આવ્યો હતો.
સવારે મંગળ આરતી અને ધાર્મિક પૂજા પછી ભગવાન જગન્નાથને નંદીઘોષ રથ પર, દેવી સુભદ્રાને દર્પદલન પર અને બલભદ્રને તાલધ્વજ રથ પર બિરાજમાન કરવામાં આવ્યા છે. ભગવાનની વિધિવત પૂજા કરવામાં આવી હતી અને રથ પર ભોજન અર્પણ કરવામાં આવ્યું હતું. બપોરે 3 વાગ્યે પુરી રાજવી પરિવારના ગજપતિ દિવ્ય સિંહ દેવે સોનાની સાવરણીથી રથના આગળના ભાગને સાફ કરીને રથયાત્રા શરૂ કરી હતી. રથયાત્રા દરમિયાન ભગવાન જગન્નાથ તેમના ભાઈ બલભદ્ર અને બહેન સુભદ્રા સાથે લગભગ 3 કિમી દૂર ગુંડીચા મંદિરમાં જાય છે. આને તેમના મામાનું ઘર માનવામાં આવે છે.
ભગવાન જગન્નાથના રથ ખેંચવાની પ્રક્રિયામાં દેશ-વિદેશના લાખો ભક્તો ભાગ લઈ રહ્યા છે. ઓડિશાના ડીજીપી વાય.બી. ખુરાનિયાએ જણાવ્યું હતું કે ભારે ભીડને ધ્યાનમાં રાખીને કાર્યક્રમ માટે વ્યાપક સુરક્ષા વ્યવસ્થા કરવામાં આવી છે. શહેરમાં લગભગ 10,000 સુરક્ષા કર્મચારીઓ તૈનાત છે જેમાં કેન્દ્રીય સશસ્ત્ર પોલીસ દળની આઠ કંપનીઓનો સમાવેશ થાય છે.
આ રથયાત્રામાં ભાગ લેવા માટે ઓડિશાના પુરીમાં આવેલા જગન્નાથ મંદિરમાં ભક્તોની ભારે ભીડ ઉમટી છે. જગન્નાથ રથયાત્રાને રથ મહોત્સવ અથવા શ્રી ગુંડિચા યાત્રા તરીકે પણ ઓળખવામાં આવે છે. તે ઓડિશામાં દર વર્ષે ઉજવવામાં આવતો એક મુખ્ય હિન્દુ તહેવાર છે.
ભગવાન જગન્નાથ, બલભદ્ર અને સુભદ્રા નવ દિવસના રોકાણ માટે રવાના
ભગવાન જગન્નાથ, તેમના ભાઈ બલભદ્ર અને બહેન સુભદ્રા આજે તેમના 12મી સદીના ગુંડિચા મંદિરમાં નવ દિવસના પ્રવાસ માટે નીકળ્યા છે. તેમના આશીર્વાદ લેવા માટે લાખોની સંખ્યામાં ભક્તો રસ્તા પર તેમની રાહ જોઈ રહ્યા છે. હજારો ભક્તો મંદિરમાં પૂજા સમયે પણ હાજર રહ્યા હતા.
ત્રણેયના રથોના નામ શું છે?
આનંદિત ભક્તો ભગવાન જગન્નાથ, બલભદ્ર અને સુભદ્રા, એટલે કે નંદીઘોષ, તાલધ્વજ અને દર્પદલનના રથોને ગુંડિચા મંદિર સુધી લગભગ ૩ કિમી સુધી ખેંચશે. દંતકથાઓ અનુસાર તે ચતુર્ધ મૂર્તિ (ભગવાન જગન્નાથ, ભગવાન બલભદ્ર, મા સુભદ્રા અને સુદર્શન) નું જન્મસ્થળ માનવામાં આવે છે.
પાંચ-સ્તરીય સુરક્ષા રિંગમાં રથયાત્રા
નવ દિવસના રથયાત્રા ઉત્સવ માટે પવિત્ર શહેર પુરીને પાંચ-સ્તરીય સુરક્ષા રિંગ હેઠળ મૂકવામાં આવ્યું છે. રથયાત્રા માટે પવિત્ર દરિયાકાંઠાના શહેરમાં પોલીસ દળની 200 પ્લાટૂન અને બોર્ડર સિક્યુરિટી ફોર્સ, સેન્ટ્રલ રિઝર્વ પોલીસ ફોર્સ વગેરેની આઠ કંપનીઓ તૈનાત કરવામાં આવી છે. રથયાત્રા દરમિયાન પુરી અને શહેરની આસપાસ ઓડિશા પોલીસ, સેન્ટ્રલ આર્મ્ડ પોલીસ ફોર્સ અને હોમગાર્ડ્સના લગભગ 10,000 કર્મચારીઓને તૈનાત કરવામાં આવ્યા છે.
આ નવી સુરક્ષા વ્યવસ્થા
આ વર્ષે પહેલીવાર સ્થાપિત કરાયેલી સંકલિત કમાન્ડ-એન્ડ-કંટ્રોલ સિસ્ટમ અને અન્ય સબ-કંટ્રોલ રૂમમાં તૈનાત પોલીસ અધિકારીઓ ઉત્તરા સ્ક્વેરથી પુરી ટાઉન, સમગ્ર શહેરમાં અને પુરીથી કોણાર્ક સુધી સ્થાપિત લગભગ 275 AI-સક્ષમ CCTV માંથી લાઇવ ફીડ દ્વારા ટ્રાફિક અને ભીડની ગતિવિધિઓનું નિરીક્ષણ કરશે.
