લગભગ 15 મહિના સુધી ગાઝામાં વિનાશ મચાવ્યા પછી અને ગાઝા પટ્ટીને બરબાદ કર્યા પછી ઇઝરાયલી સેનાએ હવે ગાઝાથી પાછા ફરવાનું શરૂ કરી દીધુ છે. આ સાથે પેલેસ્ટિનિયનોએ રાહતનો શ્વાસ લેવાનું શરૂ કર્યું છે. તમને જણાવી દઈએ કે ઇઝરાયલી દળોની આ વાપસી હમાસ સાથેના યુદ્ધવિરામ કરાર હેઠળ થઈ રહી છે. તેથી ઇઝરાયલી સેનાએ ગાઝાના એક મુખ્ય કોરિડોરમાંથી પીછેહઠ શરૂ કરી દીધી છે.
રવિવારે એક ઇઝરાયલી અધિકારીએ જણાવ્યું હતું કે યુદ્ધવિરામ કરારના ભાગ રૂપે, ઇઝરાયલ નેત્ઝારિમ કોરિડોરમાંથી તેના સૈનિકો પાછા ખેંચવા સંમત થયું છે. તે જમીનનો એક પટ્ટો છે જે ઉત્તર ગાઝાને દક્ષિણ ગાઝાથી અલગ કરે છે. ઇઝરાયલી અધિકારીએ નામ ન આપવાની શરતે વાત કરી કારણ કે તેમને મીડિયા સાથે સૈનિકોની હિલચાલ અંગે ચર્ચા કરવાનો અધિકાર નહોતો.
પેલેસ્ટિનિયનોને તેમના ઘરે પાછા ફરવાની મંજૂરી આપવામાં આવી
યુદ્ધવિરામની શરૂઆતમાં ઇઝરાયલે પેલેસ્ટિનિયનોને યુદ્ધગ્રસ્ત ઉત્તરમાં તેમના ઘરે પાછા જવા માટે નેત્ઝારીમ પાર કરવાની મંજૂરી આપવાનું શરૂ કર્યું. આ ઉપરાંત વિસ્તારમાંથી સૈનિકો પાછા ખેંચવાથી કરાર પ્રત્યેની બીજી પ્રતિબદ્ધતા પૂર્ણ થશે. રવિવારે ઇઝરાયલે કેટલા સૈનિકો પાછા ખેંચ્યા તે હજુ સ્પષ્ટ નથી. બેતાલીસ દિવસનો યુદ્ધવિરામ હાલમાં અડધો ભાગ પૂર્ણ કરી ચૂક્યો છે, અને બંને પક્ષોએ તેને લંબાવવા માટે હજુ સુધી વાટાઘાટો કરી નથી જેનાથી વધુ ઇઝરાયલી બંધકોને હમાસની કેદમાંથી મુક્ત કરી શકાય.
