હમાસ સામેના યુદ્ધ પછી રવિવારે ઇઝરાયલે પહેલી વાર ગાઝામાં માનવતાવાદી સહાય પહોંચાડી છે. ઇઝરાયલી સેના IDF એ હવાઈ માર્ગે ગાઝામાં લોટ, ખાંડ, દવા અને તૈયાર ખોરાક પહોંચાડ્યો. આ પગલું આંતરરાષ્ટ્રીય સંગઠનો સાથે મળીને લેવામાં આવ્યું હતું.
ઇઝરાયલે ગાઝાના કેટલાક ભાગોમાં યુદ્ધવિરામની જાહેરાત પણ કરી અને સંયુક્ત રાષ્ટ્ર (UN) માટે સલામત માર્ગો બનાવવા માટે પણ જાહેરાત કરી જેથી ત્યાંના લોકોને મદદ પહોંચાડી શકાય. ઇઝરાયલે માર્ચથી મે સુધી ગાઝામાં બાહ્ય સહાય પર પ્રતિબંધ મૂક્યો હતો.
હવે ઇઝરાયલ કહે છે કે તે યુએન સહાયના વિતરણમાં અવરોધ નથી લાવી રહ્યું. ગાઝામાં ઇઝરાયલ-હમાસ યુદ્ધ શરૂ થયાને 22 મહિના થઈ ગયા છે. આ લડાઈને અત્યાર સુધીમાં 124 લોકો ભૂખમરાથી મૃત્યુ પામ્યા છે જેમાંથી 81 બાળકો છે. જુલાઈ મહિનામાં જ 40 લોકો ભૂખમરાથી મૃત્યુ પામ્યા છે જેમાંથી 16 બાળકો છે.
ઇઝરાયલી સેનાએ પુષ્ટિ આપી કે તેણે હવાઈ માર્ગે ગાઝામાં સહાય મોકલવાનું શરૂ કર્યું છે. અગાઉ ઇઝરાયલી સુરક્ષા અધિકારીએ શુક્રવારે સીએનએનને જણાવ્યું હતું કે ગાઝામાં દુષ્કાળના સંકટ પર વધતી આંતરરાષ્ટ્રીય ટીકા વચ્ચે ઇઝરાયલ વિદેશી દેશોને હવાઈ માર્ગે ગાઝામાં સહાય મોકલવાની મંજૂરી આપશે.
અમેરિકામાં ઇઝરાયલના રાજદૂત યેચિએલ લીટરે શનિવારે જણાવ્યું હતું કે ઇઝરાયલી સેના રવિવારથી ગાઝા માટે ‘માનવતાવાદી કોરિડોર’ ખોલશે. તેનો ઉદ્દેશ્ય ગાઝાની વસ્તી માટે માનવતાવાદી સહાય વધારવાનો છે.
