ભારતીય મહિલા ક્રિકેટ ટીમે ફરી એકવાર એશિયામાં પોતાનું વર્ચસ્વ સાબિત કર્યું છે. મહિલા એશિયા કપ 2022ની ફાઇનલ મેચ શનિવારે (15 ઓક્ટોબર) ભારત અને શ્રીલંકા વચ્ચે રમાઈ હતી. જેમાં ટીમ ઈન્ડિયાએ શ્રીલંકાની ટીમને 8 વિકેટથી ખરાબ રીતે હરાવ્યું હતું. શ્રીલંકાની હાર સાથે ભારતીય મહિલા ટીમે એશિયા કપના ઈતિહાસમાં 7મી વખત ટાઈટલ જીત્યું છે. જ્યારે મોટી વાત એ છે કે અત્યાર સુધી એશિયા કપની માત્ર 8 સીઝન જ થઈ છે. એટલે કે એક સિઝન સિવાય દરેક વખતે ભારતીય ટીમ ચેમ્પિયન રહી છે. બાંગ્લાદેશ એક વખત એશિયા કપ જીત્યું છે.
તમને જણાવી દઈએ કે આ વખતે મહિલા એશિયા કપ બાંગ્લાદેશની યજમાનીમાં રમાયો હતો. ફાઈનલ સહિતની તમામ મેચ સિલ્હટમાં રમાઈ હતી. શનિવારે રમાયેલી ફાઈનલ મેચમાં શ્રીલંકાની ટીમે ટોસ જીતીને પ્રથમ બેટિંગ કરવાનો નિર્ણય લીધો હતો જે બિલકુલ ખોટો સાબિત થયો હતો. ભારતના બોલરોના આક્રમણ સામે શ્રીલંકાનો એક પણ ખેલાડી ટકી શક્યો નહીં. શ્રીલંકાએ 9 રનમાં બે વિકેટ ગુમાવી દીધી હતી અને તે બંને રનઆઉટ થયા હતા. એટલે કે ફિલ્ડિંગમાં પણ ભારતીય ટીમે શ્રીલંકાની ટીમને બેકફૂટ પર ધકેલી દીધી હતી. ત્યાર બાદ ફાસ્ટ બોલર રેણુકા સિંહે 3 ખેલાડીઓનો શિકાર કરીને શ્રીલંકન ટીમને સંપૂર્ણપણે ઘૂંટણિયે પાડી દીધા હતા. બાકીનું કામ સ્પિનર રાજેશ્વરી ગાયકવાડ અને સ્નેહ રાણાએ કર્યું હતું. બંનેએ 2-2 વિકેટ પોતાના નામે કરી હતી.
શ્રીલંકન ટીમના 9 બેટ્સમેન ડબલ ફિગરને સ્પર્શી શક્યા ન હતા
આ રીતે શ્રીલંકાની ટીમ 9 વિકેટ ગુમાવીને માત્ર 65 રન બનાવી શકી હતી. જેમાં રણવીરાએ 18 અને ઓશાદી રણસિંઘે 13 રન બનાવ્યા હતા. આ સિવાય શ્રીલંકન ટીમના બાકીના 9 બેટ્સમેન દસના આંકડાને પણ સ્પર્શી શક્યા નથી. 66 રનના ટાર્ગેટના જવાબમાં ભારતીય ટીમે 8 વિકેટે મેચ જીતી લીધી હતી.
મંધાનાએ ઝડપી ફિફ્ટી બનાવી હતી
ટીમ ઈન્ડિયાની શરૂઆત ખૂબ જ સારી રહી હતી, પરંતુ 35 રન પર આવ્યા બાદ બે વિકેટ ગુમાવી દીધી હતી. શેફાલી વર્મા 5 અને જેમિમા રોડ્રિગ્સ 2 રન બનાવીને આઉટ થઈ ગઈ હતી. પરંતુ સ્મૃતિ મંધાનાએ કેપ્ટન હરમનપ્રીત કૌર સાથે ઈનિંગને સંભાળી અને મેચ જીતીને વાપસી કરી. મંધાનાએ 25 બોલમાં 51 રનની અણનમ ઇનિંગ રમી હતી. જ્યારે હરમને 14 બોલમાં 11 રન બનાવ્યા હતા. તેની ઇનિંગની મદદથી ભારતીય ટીમે 8.3 ઓવરમાં 2 વિકેટ ગુમાવીને 71 રન બનાવીને મેચ જીતી લીધી હતી.
