નવી દિલ્હી: કેનેડાના (Canada) વડાપ્રધાન ટ્રુડોના ભારત (India) પ્રત્યે એક વિવાદિત નિવેદન બાદ ભારતના વિદેશ મંત્રાલયના પ્રવક્તાએ વળતો જવાબ આપ્યો છે. એક ઈન્ટરવ્યુમાં જસ્ટિન ટ્રુડોના નિવેદન બાદ ભારતે કહ્યું છે કે ભારતને પણ આશા છે કે કેનેડા ભારત વિરોધી તત્વો સામે કાર્યવાહી કરશે. વિદેશ મંત્રાલયના પ્રવક્તા અરિંદમ બાગચીએ ગુરુવારે કહ્યું હતું કે ભારત સાથે કેનેડાનો મુખ્ય મુદ્દો ત્યાં કાર્યરત ભારત વિરોધી દળોને અપાયેલી પ્રતિરક્ષા છે.
વિદેશ મંત્રાલયના પ્રવક્તા અરિંદમ બાગચીએ પ્રેસ કોન્ફરન્સમાં જણાવ્યું હતું કે ભારત પણ અપેક્ષા રાખે છે કે કેનેડા અલગતાવાદીઓ અને ભારત વિરોધી તત્વો સામે કાર્યવાહી કરે. અરિંદમ બાગચીનું આ નિવેદન ત્યારે આવ્યું છે જ્યારે તેણે બુધવારે એક ઈન્ટરવ્યુમાં કહ્યું હતું કે જ્યારથી અમેરિકાએ ભારત સરકારના એક કર્મચારી પર અલગતાવાદી ગુરપતવંત સિંહ પન્નુની હત્યાનું કાવતરું ઘડવાનો આરોપ લગાવ્યો છે અને ચેતવણી આપી છે, ત્યારથી ભારતના વલણમાં પરિવર્તન આવ્યું છે.
“પન્નૂની હત્યા મામલે ભારતનું વલણ બદલાયું”- ટ્રુડો
અમેરિકાએ એક ભારતીય નાગરિક પર પન્નુની હત્યાના કાવતરામાં સામેલ હોવાનો આરોપ લગાવ્યો છે. જસ્ટિન ટ્રુડોએ કેનેડિયન બ્રોડકાસ્ટિંગ કોર્પોરેશનને આપેલા ઈન્ટરવ્યુમાં કહ્યું હતું કે, “હવે તેઓ (ભારત) સમજવા લાગ્યા છે કે તેઓ આ રીતે આગળ વધી શકતા નથી અને હવે સહકારમાં એક પ્રકારની નિખાલસતા છે અને તેઓ કદાચ પહેલા એટલા ખુલ્લા ન હતા. ટ્રુડોએ વધુમાં કહ્યું કે, “અમે આ સમયે ભારત સાથે કોઈ સંઘર્ષમાં પડવા માંગતા નથી. અમે આના પર કામ કરવા માંગીએ છીએ. “અમે ઇન્ડો-પેસિફિક વ્યૂહરચના પર આગળ વધવા માંગીએ છીએ, પરંતુ કેનેડા માટે લોકોના અધિકારો, લોકોની સુરક્ષા અને કાયદાના શાસન માટે ઉભા રહેવું મહત્વપૂર્ણ છે અને તે જ જગ્યાએ અમે તે કરવા જઈ રહ્યા છીએ.”
પીએમ મોદીએ શું કહ્યું હતું?
બ્રિટિશ અખબાર ફાઈનાન્સિયલ ટાઈમ્સને આપેલા ઈન્ટરવ્યુમાં વડાપ્રધાન નરેન્દ્ર મોદીએ પન્નુ પર લાગેલા આરોપો પર કહ્યું કે વિશ્વની સૌથી મોટી લોકશાહી કાયદાના શાસન માટે પ્રતિબદ્ધ છે અને જો કોઈ માહિતી આપશે તો તે તેની તપાસ કરશે.
તેમણે કહ્યું, “જો આપણા નાગરિકોમાંથી કોઈએ કંઈ સારું કે ખરાબ કર્યું હોય તો અમે તેની તપાસ કરવા તૈયાર છીએ. અમારી પ્રતિબદ્ધતા કાયદાના શાસન પ્રત્યે છે.” પીએમ મોદીએ વધુમાં કહ્યું કે વિદેશમાં સ્થિત કેટલાક ઉગ્રવાદી જૂથોની ગતિવિધિઓથી ભારત ખૂબ જ ચિંતિત છે. કેટલીક ઘટનાઓને બંને દેશો વચ્ચેના રાજદ્વારી સંબંધો સાથે જોડવી મને યોગ્ય નથી લાગતી.
