નવી દિલ્હી: ભારત (India) અને ઓસ્ટ્રેલિયા (Australia) વચ્ચે ત્રણ મેચની વનડે સિરીઝની (ODI Series) બીજી મેચ વિશાખાપટ્ટનમના (Visakhapatnam) વાય.એસ. રાજશેખર રેડ્ડી સ્ટેડિયમમાં રમાશે. આ મેચમાં ટીમ ઈન્ડિયા સિરીઝ કબજે કરવાના ઈરાદા સાથે ઉતરશે. આ વર્ષે ભારતીય ટીમે અત્યાર સુધી સતત સાત વનડે જીતી છે. પરંતુ હવામાનની આગાહીએ સૌની ચિંતા વધારી દીધી છે. હવે જો આ હિસાબે બીજી વનડેમાં વરસાદ વિલન બની જાય તો ટીમ ઈન્ડિયાનો વિજય રથ અહીં જ અટકી શકે છે. અગાઉ ભારતે શ્રીલંકા અને ન્યુઝીલેન્ડને 3-3 વનડેમાં હરાવ્યું હતું. આ સાથે જ ટીમ ઈન્ડિયાએ ઓસ્ટ્રેલિયાને પણ એક મેચમાં હરાવ્યું હતું.
હવામાન અપડેટ પર નજર કરીએ તો વિશાખાપટ્ટનમમાં રવિવારે લગભગ અઢીથી ત્રણ કલાક સુધી વરસાદની સંભાવના છે. એટલું જ નહીં, વરસાદની સાથે વાવાઝોડા અને ઝડપી પવનની ચેતવણી પણ આપવામાં આવી છે. હાર્દિક પંડ્યાની કપ્તાનીમાં ભારતે પ્રથમ વનડે પાંચ વિકેટે જીતીને શ્રેણીમાં 1-0ની સરસાઈ મેળવી લીધી છે. નિયમિત સુકાની રોહિત શર્મા પણ બીજી વનડેમાં વાપસી કરવાનો છે. પરંતુ ઈન્દ્રદેવ ભારતીય ચાહકોની યોજના બગાડી શકે છે. વિશાખાપટ્ટનમથી હવામાન અપડેટ બહુ સારું નથી. તાજેતરના અપડેટ મુજબ, આજે એટલે કે શનિવારે જ અહીં 5 કલાક સુધી વરસાદ થવાની સંભાવના છે.
રવિવારે હવામાન કેવું રહેશે?
રવિવારે વિશાખાપટ્ટનમના હવામાનની વાત કરીએ તો અહીં વરસાદની 80 ટકા શક્યતા છે. એટલું જ નહીં, દિવસ દરમિયાન બે કલાક, સાંજે 1 કલાક અને રાત્રે પણ વરસાદની શક્યતા છે. આ સાથે જ જોરદાર પવન અને વાવાઝોડું પણ આવી શકે છે. અપડેટમાં એવું પણ બહાર આવ્યું છે કે 6.6 મીમી સુધી વરસાદ પડી શકે છે. એટલે કે આ વનડે મેચ પર વરસાદનું જોખમ રહેશે. મેચની ટોસ ભારતીય સમય અનુસાર બપોરે 1 વાગ્યે યોજાવાની છે અને લાઇવ એક્શન બપોરે 1.30 વાગ્યે શરૂ થવાની છે. આગાહી અનુસાર, મેચ દરમિયાન વરસાદ પરેશાન કરી શકે છે. બીજી તરફ જો દિવસ દરમિયાન ભારે વરસાદ પડે તો મેચ શરૂ થવામાં વિલંબ થાય તે સ્વાભાવિક છે.
જોકે, વિશાખાપટ્ટનમના આ મેદાનમાં ડ્રેનેજ સિસ્ટમ સારી છે. જો થોડા કલાકો જ વરસાદ પડે તો મેદાન સુકાઈ જાય પછી રમત શરૂ થઈ શકે છે. પરંતુ જો લાંબા સમય સુધી વરસાદ પડશે તો તેની અસર મેચ પર પડી શકે છે. આ અંગે આંધ્ર ક્રિકેટ એસોસિએશનના સેક્રેટરી એસ.આર. ગોપીનાથ રેડ્ડીએ કહ્યું છે કે, વરસાદ બંધ થયા બાદ અમે એક કલાકમાં મેદાન તૈયાર કરી શકીએ છીએ. સુપર સોપર્સ અને ભૂગર્ભ ગટર વ્યવસ્થાની સારી વ્યવસ્થા છે. આ સિવાય માત્ર પીચ જ નહીં અમે આઉટફિલ્ડને પણ કવર કરી રહ્યા છીએ.
ભારતીય ટીમે પ્રથમ વનડેમાં 189 રનના લક્ષ્યાંકને પાંચ વિકેટ ગુમાવીને હાંસલ કરી લીધો હતો. આ મેચમાં ભારતીય ટોપ ઓર્ડર ફ્લોપ રહ્યો હતો. કેએલ રાહુલના 75 અને રવીન્દ્ર જાડેજાના 45 રનની અણનમ ઇનિંગની મદદથી ટીમ ઈન્ડિયાએ શ્રેણીમાં લીડ મેળવી હતી. આ મેચમાં ભારતીય બોલરોએ શાનદાર પ્રદર્શન કર્યું હતું. ખાસ કરીને મોહમ્મદ શમીએ ન તો રન આપ્યા અને ન તો ઓસ્ટ્રેલિયન બેટ્સમેનોને ક્રિઝ પર રહેવા દીધા. તેણે 6 ઓવરમાં 2 મેડન્સ આપીને 17 રન આપીને ત્રણ વિકેટ ઝડપી હતી. હવે જો બીજી મેચમાં એક્શન જોવા મળે છે તો એ જોવાનું રસપ્રદ રહેશે કે શું ટીમ ઈન્ડિયા પોતાની જીતનો સિલસિલો જાળવી રાખી શકે છે કે પછી કાંગારુ ટીમ બદલો લેશે.
