કીમ: કીમ પૂર્વ વિસ્તારમાં કીમ માંડવી રોડને અડીને આવેલી ગટરમાં દારૂના નશામાં બે પરપ્રાંતિ યુવકો જાહેર રોડ પર લડતા લડતા ખુલ્લી ગટરમાં પડ્યા હોવાનો વિડીયો સોશિયલ મીડિયામાં વાયરલ થયો હતો.
- ગટરમાં પડ્યા પછી પણ લડાઈ ચાલુ રહી, વિડીયો વાયરલ થયો
- લોકોએ પોલીસ આવવાની બૂમો પાડતાં લથડિયા ખાતા ચાલતી પકડી
ઓલપાડ તાલુકાના કુદસદ ગામની હદમાં ગત સોમવારની સાંજે કીમ માંડવી સ્ટેટ હાઇવે-65 પર દારૂના નશામાં ધૂત બે પરપ્રાંતિ યુવકો ખુલ્લા હાથે મારામારી પર ઊતરી આવ્યા હતા. જો કે, મારામારી એટલી હદે વકરી હતી કે બંને યુવકો લડતા લડતા રોડની સાઈડમાં ખુલ્લી ગટરમાં પડ્યા હતા. બંને યુવકો એકબીજાને મારી નાંખવા માંગતા હોય એમ એક બીજાને ગટરમાં ડુબાડી રહ્યા હતા. પરંતુ લોકોનાં ટોળાં ભેગાં થઇ બૂમાબૂમ કરવા છતાં બંને યુવકો ગટરમાં 20 મિનિટ સુધી લડતા રહ્યા અને જયારે ટોળામાંથી કોઈએ પોલીસ આવીની બૂમ પાડી ત્યારે યુવકોનો દારૂ ઊતરી ગયો હોય એમ બંને ગટરમાંથી બહાર નીકળી અલગ અલગ દિશામાં લથડિયા ખાતા ખાતા ચાલતી પકડી હતી.
