નવી દિલ્હી: અમેરિકી ગુપ્તચર એજન્સીએ એક રિપોર્ટ અમેરિકી સંસદમાં રજૂ કર્યો છે. આ રિપોર્ટમાં ચીન અને પાકિસ્તાન સાથે ભારતના સંબંધોનો ઉલ્લેખ છે. રિપોર્ટમાં કહેવામાં આવ્યું છે કે મોદી સરકાર પાકિસ્તાની ઉશ્કેરણીનો સૈન્ય બળથી જવાબ આપે તેવી શક્યતા પહેલા કરતાં વધું છે. એટલું જ નહીં, આ રિપોર્ટમાં એવું પણ કહેવામાં આવ્યું છે કે ભારત અને ચીન વચ્ચેના સંબંધો તણાવપૂર્ણ રહેશે.
અમેરિકાના ગુપ્તચર વિભાગના રિપોર્ટમાં કહેવામાં આવ્યું છે કે બે પરમાણુ સંપન્ન દેશો ભારત અને પાકિસ્તાન વચ્ચે વધતો તણાવ ચિંતાનો વિષય છે. ભારત અને પાકિસ્તાન દ્વારા 2021માં સરહદ પર યુદ્ધ વિરામની જાહેરાત કરવામાં આવી હતી. એટલે કે બંને દેશો તેમના સંબંધોમાં હાલની શાંતિને મજબૂત કરવા આતુર છે.
આ રિપોર્ટમાં કહેવામાં આવ્યું છે કે, જો કે પાકિસ્તાનનો ભારત વિરોધી ઉગ્રવાદી જૂથોને સમર્થન કરવાનો લાંબો ઈતિહાસ છે. વડાપ્રધાન નરેન્દ્ર મોદીના નેતૃત્વમાં પાકિસ્તાનની ઉશ્કેરણીનો સૈન્ય બળથી જવાબ આપવાની સંભાવના પહેલા કરતા વધારે છે. કાશ્મીરમાં વધતા તણાવ અને અશાંતિ અથવા ભારતમાં અન્ય આતંકવાદી હુમલાના સંજોગોમાં બંને પક્ષો વચ્ચે લડાઈ થવાની ઉચ્ચ સંભાવના છે.
ભારત અને ચીન વચ્ચે તણાવપૂર્ણ સંબંધો
આ રિપોર્ટમાં કહેવામાં આવ્યું છે કે ભારત અને ચીન વચ્ચે દ્વિપક્ષીય સરહદી વાટાઘાટો થઈ હતી અને અનેક સરહદી બિંદુઓ પર તણાવ દૂર કરવામાં આવ્યો હતો. પરંતુ 2020માં હિંસક અથડામણને કારણે બંને દેશો વચ્ચેના સંબંધો તણાવપૂર્ણ રહેશે. વિવાદિત સ્થળ પર બંને દેશો દ્વારા દળોની તૈનાતી સરહદ વિવાદને લઈને બે પરમાણુ શક્તિઓમાં સશસ્ત્ર જોખમ વધારે છે. ભૂતકાળના સ્ટેન્ડઓફ દર્શાવે છે કે LAC સાથે વારંવાર નાની અથડામણો ઝડપથી વધવાની સંભાવના ધરાવે છે.
ગલવાનમાં હિંસક અથડામણ થઈ હતી
જૂન 2020ના રોજ ગાલવાનમાં ભારત અને ચીની સેના વચ્ચે હિંસક અથડામણ થઈ હતી. આ દરમિયાન ભારતના 20 જવાનો શહીદ થયા હતા. ચીનને પણ ભારે નુકસાન થયું છે. પરંતુ ચીન પર આ આંકડા છુપાવવાનો આરોપ પણ લાગ્યો છે. આ પછી બંને દેશોએ પોતપોતાની સરહદો પર મોટી સંખ્યામાં સુરક્ષા દળો તૈનાત કર્યા હતા. જો કે, આ પછી ભારત અને ચીન વચ્ચે વાતચીતના ઘણા રાઉન્ડ થયા અને બંને દેશોએ ઘણા વિવાદિત વિસ્તારોમાંથી પોતાની સેના હટાવી લીધી.
