સુરતના (Surat) કોંગ્રેસના ઉમેદવાર નિલેશ કુંભાણીનું નામાંકન નકારી કાઢવામાં આવ્યા બાદ અને અન્ય ઉમેદવારોએ તેમના ઉમેદવારીપત્રો પાછા ખેંચ્યા બાદ ભાજપના ઉમેદવાર મુકેશ દલાલને ગુજરાતની સુરત લોકસભા બેઠક (Loksabha Seat) પરથી બિનહરીફ ચૂંટાયેલા જાહેર કરવામાં આવ્યા હતા. હવે સુરતમાં પુનઃ ચૂંટણીને લઈને સુપ્રીમ કોર્ટમાં અરજી કરવામાં આવી છે. આ માટે મતદારોના NOTA વિકલ્પ પર મત આપવાના અધિકારને આધાર બનાવવામાં આવ્યો છે.
અરજીમાં જણાવવામાં આવ્યું છે કે કોંગ્રેસના ઉમેદવારનું ઉમેદવારી ફોર્મ નકારી કાઢવામાં આવ્યા પછી અને અન્ય ઉમેદવારોએ તેમની ઉમેદવારી પાછી ખેંચી લીધા પછી પણ લોકો પાસે NOTA ને મત આપવાનો વિકલ્પ હતો. ચૂંટણી પંચે મુકેશ દલાલને બિનહરીફ ચૂંટાયેલા જાહેર કર્યા બાદ મતદારોને NOTA વિકલ્પ દ્વારા તેમના મતદાનના અધિકારથી વંચિત રાખવામાં આવ્યા છે. સુપ્રીમ કોર્ટને વિનંતી કરવામાં આવી છે કે NOTA વિકલ્પની વિશ્વસનીયતા જાળવવા માટે ચૂંટણી પંચ દ્વારા સુરતમાં ફરીથી ચૂંટણી કરાવવાનો આદેશ આપવામાં આવે.
અરજદાર પ્રતાપ ચંદ્રાએ જણાવ્યું કે લોકશાહીમાં મતદારોને કોઈપણ વિકલ્પથી વંચિત રાખવું એ લોકશાહી મૂલ્યોનું અપમાન છે. તે મતદારોના અધિકારોનું અવમૂલ્યન પણ છે. સુરત લોકસભા બેઠક પરથી ભાજપના ઉમેદવારને ચૂંટણી પણ કરાવ્યા વિના બિનહરીફ ચૂંટાયેલા જાહેર કરવામાં આવ્યા હોવાથી તે મતદારો પાસેથી NOTA વિકલ્પ છીનવી લેવા સમાન છે. જે કોઈપણ રીતે યોગ્ય કહી શકાય નહીં. તેમના મતે મતદારોના અધિકારના રક્ષણ માટે સુરતમાં ચૂંટણી યોજવી ખૂબ જ જરૂરી છે.
નવી સિસ્ટમ સ્થાપિત કરવાની જરૂર છે
સુપ્રીમ કોર્ટના વકીલ અશ્વિની કુમાર દુબેએ કહ્યું કે અત્યાર સુધી જો માત્ર એક જ ઉમેદવાર મેદાનમાં રહે તો તેને બિનહરીફ ચૂંટાયેલા જાહેર કરવાની વ્યવસ્થા કરવામાં આવી છે. NOTA નો વિકલ્પ આવ્યા બાદ તે દરેક મતદાતાનો બંધારણીય અધિકાર બની ગયો છે. આ અંગે હજુ સુધી કોઈ વ્યવસ્થા નથી. સુપ્રીમ કોર્ટે આ મામલે ચૂંટણી પંચને તેનું વલણ જાણવા નોટિસ પાઠવી છે. આવી સ્થિતિમાં સુપ્રીમ કોર્ટ દ્વારા આ મુદ્દે નવી વ્યવસ્થા અંગે નિર્ણય આવ્યા બાદ જ આ મામલે સ્પષ્ટતા થશે.
અશ્વિની કુમાર દુબેએ જણાવ્યું હતું કે જો કે ઘણી વખત એવું જોવા મળે છે કે સુપ્રીમ કોર્ટ જૂના સંજોગોને ધ્યાનમાં રાખીને નવો કાયદો બનાવે છે અને કેટલીકવાર જૂના મુદ્દાઓને એ જ સંજોગોમાં સાચા માનીને નવા કાયદાને ભવિષ્યની પરિસ્થિતિઓ માટે લાગુ કરવામાં આવે છે. હવે જોવાનું એ રહે છે કે સુપ્રીમ કોર્ટ આ મામલે શું વલણ અપનાવે છે.
