રાજ્યના ડીજીપી વિકાસ સહાયના આદેશ બાદ સુરત ટ્રાફિક પોલીસની હેલ્મેટ નહીં પહેરનાર વિરુદ્ધમાં કાર્યવાહી કરવામાં આવી રહી છે. આજે સવારથી જ સુરતની ટ્રાફિક પોલીસ સરકારી કચેરીઓના ગેટ પર ગોઠવાઈ ગઈ હતી, તેના લીધે સરકારી કર્મચારીઓ નોકરી પર જતા ગભરાયા હતા. હેલ્મેટ પહેર્યા વિના આવેલા સરકારી કર્મચારીઓને અટકાવીને પોલીસે કાર્યવાહી કરી હતી.
સરકારી કચેરીમાં હેલ્મેટ વગર આવનારા વાહન ચાલકોને દંડ ફટકારવામાં આવ્યા છે. પહેલી વાર હેલ્મેટ પહેર્યા વિના ટુ-વ્હીલર ચલાવી ટ્રાફિકના નિયમ તોડનારને 500 રૂપિયાનો દંડ ફટકારવામાં આવી રહ્યો છે. બીજી વાર 1000નો દંડ ફટકારવામાં આવી રહ્યો છે.
હેલ્મેટ પહેરનારને ફૂલ અપાયું
હેલ્મેટ પેહરીને આવનારને ગુલાબનું ફૂલ આપી સ્વાગત કરવામાં આવી રહ્યું છે. આવનારી 15મી ફેબ્રુઆરીએ રાજ્યમાં ફરજિયાત હેલ્મેટનો કાયદો આવી રહ્યો છે. ત્યારે સરકારી કચેરીઓ બાદ ક્રમશઃ તમામ જગ્યાએ હેલ્મેટ ફરજિયાત કરવામાં આવશે. ત્યારબાદ રસ્તા પર પણ દંડ કરવામાં આવશે. જેમાં 500 પ્રથમવાર અને ત્યારબાદ 1000 દંડ લેવામાં આવશે.
ડીજીપીએ શું ટ્વીટ કર્યું?
રાજયના પોલીસ વડા વિકાસ સહાયે આજે એકસ (ટવીટ્ટર) પર ટ્વિટ કરતા જણાવ્યું હતું કે, ગુજરાતના તમામ સરકારી કર્મચારીઓ, રાજ્યના જવાબદાર નાગરિકો તરીકે, તમે બધા અન્ય લોકો માટે આદર્શ બનવાની અપેક્ષા રાખીએ છીએ.
જો તમે બધા આજે ટ્રાફિકના નિયમોનું પાલન કરવા, ખાસ કરીને હેલ્મેટ પહેરવાની પ્રતિજ્ઞા લેશો તો હું તેની પ્રશંસા કરીશ. તમામ પોલીસ એકમોને આવતીકાલથી તેનું પાલન સુનિશ્ચિત કરવા સૂચના આપવામાં આવી છે. કૃપા કરીને સહકાર આપો. જય હિન્દ.
હેલ્મેટ પહેરીને જ સરકારી કચેરીના પરિસરમાં પ્રવેશ કરાશે
- સચિવાલયના તમામ વિભાગો, રાજ્યની તમામ સરકારી-અર્ધસરકારી કચેરીઓ, બોર્ડ, નિગમો, પૂર્ણ કે આંશિક સરકારી અનુદાન લેતી સંસ્થાઓ, સ્થાનિક સ્વરાજ્ય સંસ્થાઓમાં દ્વિચક્રી વાહન (મોટર સાઇકલ, સ્કુટર વગેરે) પર આવતા-જતાં વાહનચાલક તથા પાછલી સીટ પર બેસનાર અધિકારીઓ/ કર્મચારીઓએ ફરજિયાતપણે, નિયત ધોરણસરનું હેલ્મેટ પહેરીને જ સરકારી કચેરીના પરિસરમાં પ્રવેશ લેવાનો રહેશે, અન્યથા તેઓને સરકારી કચેરીના પરિસરમાં પ્રવેશ અટકાવી શકાશે.
- આ સૂચનાઓના યોગ્ય અમલીકરણ માટે સંબંધિત કચેરીના વડાઓએ નિયંત્રણ હેઠળના સર્વે અધિકારીઓ/ક ર્મચારીઓને જરૂરી સૂચના તથા તે અંગે ચકાસણી થાય તેવી વ્યવસ્થા સુનિશ્ચિત કરવાની રહેશે.
