જર્મન ચાન્સેલર ફ્રેડરિક મર્ઝે શુક્રવારે કહ્યું કે તેમનો દેશ હાલમાં ગાઝામાં ઉપયોગમાં લઈ શકાય તેવા કોઈપણ લશ્કરી સાધનોના નિકાસને મંજૂરી આપશે નહીં. આ પ્રતિબંધ આગામી આદેશો સુધી અમલમાં રહેશે. જર્મની દાયકાઓથી ઇઝરાયલનું મજબૂત સમર્થક રહ્યું છે.
પોતાના નિવેદનમાં મર્ઝે ભારપૂર્વક જણાવ્યું હતું કે ઇઝરાયલને હમાસના આતંકથી પોતાને બચાવવાનો અધિકાર છે. તેમણે કહ્યું કે 22 મહિનાથી ચાલી રહેલા સંઘર્ષમાં ઇઝરાયલી બંધકોની મુક્તિ અને યુદ્ધવિરામ માટે નક્કર વાટાઘાટો ‘અમારી સૌથી મોટી પ્રાથમિકતાઓ’ છે. મર્ઝે એમ પણ કહ્યું હતું કે ગાઝાના ભવિષ્યમાં હમાસની કોઈ ભૂમિકા ન હોવી જોઈએ.
ઇઝરાયલી કેબિનેટ દ્વારા ગઈકાલે રાત્રે મંજૂર કરાયેલ ગાઝા પટ્ટીમાં ઇઝરાયલી સેનાની વધુ કડક લશ્કરી કાર્યવાહી, જર્મન સરકાર માટે આ લક્ષ્યો કેવી રીતે પ્રાપ્ત થશે તે જોવાનું વધુ મુશ્કેલ બનાવી રહી છે. મર્ઝે કહ્યું કે આવી સ્થિતિમાં જર્મન સરકાર આગામી આદેશો સુધી ગાઝા પટ્ટીમાં ઉપયોગમાં લઈ શકાય તેવા કોઈપણ લશ્કરી સાધનોના નિકાસને મંજૂરી આપશે નહીં.
7 ઓક્ટોબર 2023 ના રોજ હમાસે ઇઝરાયલના ઘણા ભાગો પર હુમલો કર્યો. જેમાં લગભગ 1200 ઇઝરાયલી નાગરિકો માર્યા ગયા અને લગભગ અઢી લોકોને બંધક બનાવવામાં આવ્યા. તેમાંથી ઘણાના મોત થયા છે, કેટલાકને કરાર હેઠળ મુક્ત કરવામાં આવ્યા છે, જ્યારે કેટલાક હજુ પણ હમાસના કબજામાં છે. આના જવાબમાં ઇઝરાયલે હમાસ સામે યુદ્ધની ઘોષણા કરી. યુદ્ધ શરૂ થયા પછી 60 હજારથી વધુ પેલેસ્ટિનિયનો માર્યા ગયા છે. તેમાંના મોટાભાગના બાળકો અને મહિલાઓનો સમાવેશ થાય છે.
ગાઝાની સમગ્ર વસ્તી વિસ્થાપિત છે અને ભૂખમરાનો સામનો કરી રહી છે. એક દિવસ પહેલા ઇઝરાયલી વડા પ્રધાન બેન્જામિન નેતન્યાહૂએ કહ્યું હતું કે તેમનો દેશ ગાઝા પટ્ટી પર કબજો કરવા માંગતો નથી કે તેને તેના દેશમાં જોડવા માંગતો નથી. તેમનો એકમાત્ર ધ્યેય હમાસનો નાશ કરવાનો અને પછી ગાઝાને કામચલાઉ સરકારને સોંપવાનો છે. વડા પ્રધાન નેતન્યાહૂએ એમ પણ કહ્યું હતું કે યુદ્ધ સમાપ્ત થયા પછી ઇઝરાયલ ગાઝાની સુરક્ષા સંભાળવા માંગે છે.
