કોરોનાના લીધે રાજકોટમાં આજે પહેલું મોત નોંધાયું છે. અહીં એક 55 વર્ષીય આધેડનું સિવિલ હોસ્પિટલમાં સારવાર દરમિયાન મોત નિપજયું છે. પાછલા ચાર દિવસથી આધેડને કોરોના થયો હતો. ત્રણ-ચાર દિવસ ખાનગી હોસ્પિટલમાં સારવાર લીધા બાદ ગઈકાલે આધેડને રાજકોટની સિવિલ હોસ્પિટલમાં સારવાર માટે ખસેડવામાં આવ્યા હતા, જ્યાં તેમનું મોત નિપજ્યું હતું. આધેડ હાઈપર ટેન્શન તેમજ ડાયાબિટીસની બિમારીથી પીડિત હતા. આ બિમારી પણ ત્રણ દિવસ પહેલાં જ ડિટેક્ટ થઈ હતી.
રાજ્યમાં કોરોનાના દર્દીઓની સંખ્યામાં દિન પ્રતિદિન વધારો થઈ રહ્યો છે. દરમિયાન રાજકોટમાં કોરોનાના કેસની સંખ્યા સતત વધી રહી છે. રાજકોટમાં કોરોનાના નવા 9 કેસ નોંધાયા છે. જેમાં 3 મહિલા અને 6 પુરુષ દર્દીનો સમાવેશ થાય છે. આ નવા કેસો સાથે રાજકોટમાં કોરોનાના કુલ દર્દીઓનો આંકડો 116 પર પહોંચી ગયો છે, જે ચિંતાજનક સ્થિતિ દર્શાવે છે. આ બધાની વચ્ચે એક સારા સમાચાર એ છે કે આજે 7 દર્દીઓને કોરોનામુક્ત જાહેર કરવામાં આવ્યા છે, જે દર્શાવે છે કે સારવાર બાદ દર્દીઓ સ્વસ્થ થઈ રહ્યા છે.
રાજ્ય સરકાર દ્વારા જાહેર કરવામાં આવેલી માહિતી અનુસાર 9 જૂન સુધી ગુજરાતમાં કુલ 1109 કોરોનાના એક્ટિવ કેસો નોંધાયા છે, જે પૈકી હજુ 33 દર્દી હોસ્પિટલમાં દાખલ છે, જ્યારે 1076 દર્દી OPD સારવાર હેઠળ છે જ્યારે 106 લોકોને ડિસ્ચાર્જ કરી દેવાયા છે. આ સાથે જ ગુજરાતમાં કોરોનાના એક્ટિવ કેસનો આંકડો 1000ને પાર પહોંચ્યો છે. ગતરોજ કોરોનાના નવા 235 કેસો નોંધાયા હતા.
