નવી દિલ્હી: પાકિસ્તાનમાંથી (Pakistan) આઘાતજનક સમાચાર સામે આવ્યા છે. પાકિસ્તાનના ખૈબર પખ્તુનખ્વાના (Khyber Pakhtunkhwa) ડેરા ઈસ્માઈલ ખાન વિસ્તારમાં ફિદાયીન હુમલામાં (Fidayeen attacks) 23 લોકોએ જીવ ગુમાવ્યા છે. આ હુમલો ડેરા ઈસ્માઈલ ખાનના એક પોલીસ સ્ટેશનમાં થયો હતો. અહેવાલ મુજબ વિસ્ફોટના કારણે પોલીસ સ્ટેશનની ઈમારતના ત્રણ રૂમ ધરાશાયી થઈ ગયા છે અને ઈમારતોના કાટમાળમાંથી મૃતદેહોને બહાર કાઢવાના પ્રયાસો થઈ રહ્યા છે. મૃત્યુઆંક હજુ વધી શકે તેવી આશંકા છે.
આ હુમલાની જવાબદારી તહરીક-એ-તાલિબાને (Tehreek-e-Taliban) લીધી છે. આ આતંકવાદી સંગઠન અફઘાનિસ્તાનની (Afghanistan) જેમ પાકિસ્તાનમાં સરકાર બનાવવા માંગે છે. આ કારણોસર તે સતત સરકારી વિભાગો અને અધિકારીઓને નિશાન બનાવી રહી છે.
કેવી રીતે થયો હુમલો?
પ્રાપ્ત માહિતી અનુસાર ફિદાયીન એક વાહનમાં પોલીસ સ્ટેશનના ગેટમાં ઘૂસ્યો હતો. ગેટ પર પહોંચતા જ ફિદાયીને ફાયરિંગ શરૂ કરી દીધું હતું. આ વર્ષે જાન્યુઆરીમાં ખૈબર પખ્તુનખ્વામાં થયેલા હુમલામાં ઓછામાં ઓછા 101 લોકોએ જીવ ગુમાવ્યા હતા. પાકિસ્તાની મીડિયા અનુસાર પોલીસે બે આતંકવાદીઓને ઠાર કર્યા છે.
એક વર્ષમાં પાકિસ્તાનમાં 1000થી વધુ આતંકી હુમલા થયા
છેલ્લા એક વર્ષમાં પાકિસ્તાનમાં આતંકી હુમલાની ઘટનામાં વધારો થયો છે. પાછલા એક વર્ષ દરમિયાન પાકિસ્તાનમાં 1050 આતંકી હુમલાની ઘટનાઓ બની છે. આ હુમલાઓમાં 470 લોકો માર્યા ગયા છે. પાકિસ્તાનના ગૃહ મંત્રાલયના આંકડા અનુસાર છેલ્લા ત્રણ વર્ષમાં આ પ્રાંતના લગભગ 1823 લોકોએ આતંકી હુમલામાં જીવ ગુમાવ્યા છે.
ખૈબર પખ્તુનખ્વા વિસ્તાર અફઘાનિસ્તાનની સરહદે છે. 1050 આતંકવાદી ઘટનાઓમાંથી 419 ઘટનાઓ બંધોબસ્તી જિલ્લામાં બની હતી. જ્યારે ફાટામાં 631, ઉત્તર વજીરસ્તાનમાં 201 અને પેશાવરમાં 61 આતંકવાદી ઘટનાઓ બની હતી.
