લોકસભા ચૂંટણી 2024ને (Loksabha Election 2024) લઈને ચૂંટણી પંચ (Election Commission) એક્શન મોડમાં આવી ગયું છે. મંગળવારે એક મોટો આદેશ જારી કરીને પંચે 5 રાજ્યોમાં 8 જિલ્લા મેજિસ્ટ્રેટ અને 12 પોલીસ અધિક્ષક (SP)ની બદલી કરી છે. આ ટ્રાન્સફર બિહાર, ઝારખંડ, ઓડિશા, આસામ અને આંધ્ર પ્રદેશમાં કરવામાં આવ્યા છે. અગાઉ અહેવાલ હતો કે પંચે આંધ્રપ્રદેશમાં 3 કલેક્ટર અને 6 આઈપીએસ અધિકારીઓની બદલી કરી છે. જો કે સાંજ સુધીમાં આ આંકડો વધવા લાગ્યો અને પંચે 5 રાજ્યોમાં ઘણા અધિકારીઓની બદલી કરી દેવામાં આવી.
ઓડિશા સરકારના 8 અધિકારીઓની બદલી
ચૂંટણી પંચે મંગળવારે બે જિલ્લા મેજિસ્ટ્રેટ, પાંચ પોલીસ અધિક્ષક અને પોલીસ મહાનિરીક્ષક સહિત ઓડિશા સરકારના આઠ અધિકારીઓની બદલીના આદેશો જારી કર્યા છે. પંચે કટકના ડીએમ અને જગતસિંહપુર, અંગુલ, બહેરામપુર, ખુર્દા અને રાઉરકેલાના એસપી અને કટકના ડીએસપી અને આઈજી સેન્ટ્રલની બદલી કરી છે. પંચે પોતાના આદેશમાં કહ્યું છે કે આ અધિકારીઓને બિન-ચૂંટણી સંબંધિત પોસ્ટ પર ટ્રાન્સફર કરવામાં આવશે.
બિહાર અને અન્ય રાજ્યોમાં પણ ટ્રાન્સફર
ચૂંટણી પંચે બિહારના ભોજપુર અને નવાદા જિલ્લાના ડીએમ અને એસપી અને ઝારખંડના દેવઘર જિલ્લાના એસપીની બદલી કરી છે. આ સિવાય આંધ્રપ્રદેશના કૃષ્ણા, અનંતપુરમુ અને તિરુપતિ જિલ્લાના ડીએમ બદલવામાં આવ્યા છે. આ સિવાય પ્રકાશમ, પલાનાડુ, ચિત્તૂર, અનંતપુરમુ અને નેલ્લોરના એસપીની બદલી કરવામાં આવી છે. આ ઉપરાંત ગુંટુર આઈજીપીની પણ બદલી કરવામાં આવી છે.
અધિકારીઓની બદલીનો આ નિર્ણય મુખ્ય ચૂંટણી કમિશનર રાજીવ કુમાર, જ્ઞાનેશ કુમાર અને સુખબીર સિંહ સંધુની અધ્યક્ષતામાં નિયમિત સમીક્ષા બેઠકમાં લેવામાં આવ્યો છે. કમિશનની સૂચનાઓ હેઠળ તમામ બદલી કરાયેલા અધિકારીઓને તેમનું કામ જુનિયર અધિકારીઓને સોંપવા માટે કહેવામાં આવ્યું છે. આ અધિકારીઓને સામાન્ય ચૂંટણી 2024ની પૂર્ણાહુતિ સુધી કોઈ ચૂંટણી ફરજ સોંપવામાં આવશે નહીં. સંબંધિત રાજ્ય સરકારોને IAS અને IPS અધિકારીઓના નામોની પેનલ કમિશનને મોકલવા પણ નિર્દેશ આપવામાં આવ્યો છે.
