મુંબઈ: હવે મહારાષ્ટ્રનાં નવા મુખ્યમંત્રી એકનાથ શિંદે બનશે. આજે સાંજે 7 વાગ્યે જ શપથ ગ્રહણ સમારોહ યોજાશે. મહારાષ્ટ્રના રાજ્યપાલ ભગતસિંહ કોશ્યારીને મળ્યા બાદ દેવેન્દ્ર ફડણવીસ અને એકનાથ શિંદેએ પત્રકાર પરિષદ યોજી હતી. આ દરમિયાન પૂર્વ મુખ્યમંત્રી ફડણવીસે જાહેરાત કરી હતી કે એકનાથ શિંદે મહારાષ્ટ્રના મુખ્યમંત્રી તરીકે શપથ લેશે. આ દરમિયાન દેવેન્દ્ર ફડણવીસે કહ્યું કે તેઓ સરકારમાંથી બહાર થઈ જશે.
ભાજપ એકનાથ શિંદેને સમર્થન કરશે
દેવેન્દ્ર ફડણવીસે મુખ્યમંત્રીનાં પદ માટે એકનાથ શિંદેનાં નામ જાહેરાત કરી છે. તેમણે કહ્યું છે કે ભાજપ આ સરકારમાં એકનાથ શિંદેને સમર્થન આપવા જઈ રહી છે. આજે સાંજે 7.30 કલાકે એકનાથ શિંદે મુખ્યમંત્રી પદનાં શપથ લેશે. દેવેન્દ્ર ફડણવીસે માહિતી આપી છે કે આજે માત્ર એકનાથ શિંદે જ સીએમ તરીકે શપથ લેવાના છે. બાકીના નેતાઓનો શપથ ગ્રહણ સમારોહ અન્ય ઔપચારિકતાઓ પૂર્ણ થયા બાદ થશે.
અમે મહારાષ્ટ્રનાં વિકાસ માટે આવ્યા છે: એકનાથ શિંદે
એકનાથ શિંદેએ કહ્યું કે અમે મહારાષ્ટ્રના વિકાસ માટે સાથે આવ્યા છીએ. અમને મહાવિકાસ આઘાડી સરકારમાં કામ કરવામાં મુશ્કેલીનો સામનો કરવો પડી રહ્યો હતો. અમે ઉદ્ધવ ઠાકરેને આ વિશે જણાવ્યું હતું. અમે અમારી બાજુ સમજાવવાનો પ્રયાસ કર્યો. ભાજપ સાથે અમારું સ્વાભાવિક ગઠબંધન હતું. જ્યારે આપણે બાળાસાહેબના વિચારોને આગળ વધાર્યા હતા, ત્યારે છેલ્લામાં હિન્દુત્વને લઈને સરકાર દ્વારા કેટલાક નિર્ણયો લેવામાં આવ્યા હતા.
મહારાષ્ટ્રમાં મજબૂત સરકાર જોવા મળશે: એકનાથ શિંદે
એકનાથ શિંદેએ કહ્યું કે હું પીએમ મોદી અને અમિત શાહનો આભાર માનું છું, ફડણવીસ મંત્રી નહીં બને. મોટી પાર્ટી હોવા છતાં ભાજપે મને મુખ્યમંત્રી બનાવ્યો છે. ભાજપે પોતાનું મોટું દિલ બતાવ્યું છે. આગામી દિવસોમાં મહારાષ્ટ્રમાં મજબૂત સરકાર જોવા મળશે. કેન્દ્ર સરકાર જે રીતે મહારાષ્ટ્રને મદદ કરશે તે રીતે મહારાષ્ટ્રનો વિકાસ ઝડપી થશે. આ સરકાર લોકોની અપેક્ષાઓ પૂર્ણ કરવાનું કામ કરશે. તેમણે દેવેન્દ્ર ફડણવીસનો પણ આભાર માન્યો હતો.
મહારાષ્ટ્રના ઈતિહાસમાં પહેલીવાર એવું બન્યું છે કે સરકારના બે મંત્રી જેલમાં છે: ફડણવીસ
દેવેન્દ્ર ફડણવીસે કહ્યું કે જનતાએ મહાવિકાસ અઘાડીને બહુમતી આપી નથી. ચૂંટણી પછી ભાજપ સૌથી મોટો પક્ષ હતો. ભાજપ-શિવસેનાએ ગઠબંધન કરીને ચૂંટણી લડી હતી, પરંતુ શિવસેનાએ કોંગ્રેસ અને એનસીપીની મદદથી સરકાર બનાવી હતી. આ દરમિયાન શિવસેનાએ બાળાસાહેબ ઠાકરેના વિચારોને પણ રોકી રાખ્યા હતા. મહારાષ્ટ્રના ઈતિહાસમાં પહેલીવાર એવું બન્યું છે કે સરકારના બે મંત્રી જેલમાં છે. આવું પહેલા ક્યારેય બન્યું નથી. બાળાસાહેબ હંમેશા દાઉદનો વિરોધ કરતા હતા, પરંતુ ઉદ્ધવ સરકારના એક મંત્રી દાઉદ સાથે જોડાયેલા છે. જેલમાં ગયા પછી પણ તેમને મંત્રી પદ પરથી હટાવવામાં આવ્યા નથી. આ બાળાસાહેબનું અપમાન છે.
