નવી દિલ્હી: જાણીતા મોટીવેશનલ સ્પીકર (MotivationalSpeaker) વિવેક બિન્દ્રા (VivekBindra) ડોમેસ્ટેકી વાયોલન્સના (DomesticViolence) કેસમાં ફસાયા છે. વિવેક બિન્દ્રાનો એક વીડિયો સોશિયલ મીડિયામાં વાયરલ થયો છે, જેમાં તેઓ જાહેર રસ્તા પર પોતાની પત્નીને માર મારતા નજરે પડે છે.
ઉત્તર પ્રદેશના ગૌતમ બુદ્ધ નગર જિલ્લામાં નોઈડાના સેક્ટર-126 પોલીસ સ્ટેશનમાં પ્રખ્યાત મોટિવેશનલ સ્પીકર વિવેક બિન્દ્રા વિરુદ્ધ તેમની પત્ની પર હુમલો કરવા બદલ કેસ નોંધવામાં આવ્યો છે. પત્નીના ભાઈ એટલે કે સાળાએ આ કેસ દાખલ કર્યો છે. પોલીસ સ્ટેશનમાં નોંધાયેલા કેસ મુજબ, મારપીટ બાદ મહિલાની દિલ્હીની એક ખાનગી હોસ્પિટલમાં ઘણા દિવસો સુધી સારવાર કરવામાં આવી હતી.
આરોપ છે કે આ મારપીટના લીધે બિન્દ્રાની પત્નીના કાનનો પડદો ફાટી ગયો છે. બિન્દ્રાએ પત્નીના વાળ પણ ખેંચ્યા હતા. તેના શરીર પર ઈજાના નિશાન દેખાઈ રહ્યા છે. નોઈડા પોલીસે તપાસ શરૂ કરી છે. પોલીસ તમામ પાસાઓને ધ્યાનમાં રાખીને કેસની તપાસ કરી રહી છે.
એક મહિના પહેલાં જ લગ્ન થયા હતા
ગાઝિયાબાદના ચંદર નગરમાં રહેતા વૈભવ ક્વાત્રાએ સેક્ટર-126 પોલીસ સ્ટેશનમાં આપેલી ફરિયાદમાં સાળા વિવેક બિન્દ્રા પર ગંભીર આરોપો લગાવ્યા છે. પોલીસને આપેલી ફરિયાદમાં વૈભવે જણાવ્યું છે કે 6 નવેમ્બરે બહેન યાનિકાના લગ્ન સેક્ટર-94ના સુપરનોવા વેસ્ટ રેસિડેન્સીમાં રહેતા વિવેક બિન્દ્રા સાથે થયા હતા. લગ્નના લગભગ એક મહિના બાદ 6 અને 7 ડિસેમ્બરે સવારે 2:30 થી 3 વાગ્યાની વચ્ચે વિવેક તેની માતા પ્રભા સાથે ઝઘડો કરતો હતો. આરોપ છે કે જ્યારે વિવેકે તેની પત્ની યાનિકાનો બચાવ કર્યો ત્યારે તેણે તેને રૂમમાં બંધ કરી દીધી હતી. વિવેકે યાનિકાને માર મારતા તેની સાથે દુર્વ્યવહાર કર્યો હતો.
વિવેકે તેની પત્નીનો મોબાઈલ પણ તોડી નાખ્યો હતો. ઈજાગ્રસ્ત યાનિકાને દિલ્હીના કરકરડુમાની હોસ્પિટલમાં સારવાર આપવામાં આવી હતી. વિવેક બિન્દ્રા વિરુદ્ધ કેસ નોંધવામાં આવ્યો હોવાની વાત સોશિયલ મીડિયા પર ટ્રેન્ડ થવા લાગી હતી. આ મામલામાં કેટલાક યુઝર્સે નોઈડા પોલીસ પાસે આરોપીઓની ધરપકડની માંગ કરી છે.
આ પોસ્ટને ઘણા લોકો દ્વારા શેર કરવામાં આવી છે. મોટિવેશનલ સ્પીકર વિરુદ્ધ 14 ડિસેમ્બરે કેસ નોંધવામાં આવ્યો છે. મહત્વપૂર્ણ છે કે યુટ્યુબ પર વિવેક બિન્દ્રાના 2.14 કરોડ સબસ્ક્રાઈબર છે. જ્યારે ઇન્સ્ટાગ્રામ પર ફોલોઅર્સની સંખ્યા 3.9 મિલિયન છે. અને X પર પણ 3.73 લાખ લોકો વિવેકને ફોલો કરે છે.
