ભારત અને ચીન વચ્ચે સીધી ફ્લાઇટ્સ ફરી શરૂ કરવા માટે એક કરાર થયો છે. વિદેશ મંત્રાલયે ગુરુવારે એક પ્રેસ રિલીઝમાં આ જાહેરાત કરી. તેના થોડા સમય પછી એરલાઇન ઇન્ડિગોએ 26 ઓક્ટોબરથી બંને દેશો વચ્ચે સીધી ફ્લાઇટ્સ ફરી શરૂ કરવાની જાહેરાત કરી.
ભારત અને ચીન આ મહિનાના અંત (ઓક્ટોબર 2025) સુધીમાં સીધી ફ્લાઇટ્સ ફરી શરૂ કરવા સંમત થયા છે. નાગરિક ઉડ્ડયન મંત્રાલયે જણાવ્યું હતું કે આ વર્ષની શરૂઆતથી બંને દેશોના અધિકારીઓ વચ્ચે ટેકનિકલ ચર્ચાઓ ચાલી રહી છે.
કોલકાતાથી ગુઆંગઝુ માટે દૈનિક નોન-સ્ટોપ ફ્લાઇટ્સ કાર્યરત થશે. એરલાઇને એવી પણ જાહેરાત કરી હતી કે દિલ્હી અને ગુઆંગઝુ વચ્ચે સીધી ફ્લાઇટ્સ ટૂંક સમયમાં શરૂ કરવામાં આવશે. ઇન્ડિગો તેના એરબસ A320neo એરક્રાફ્ટનો ઉપયોગ કરીને આ ફ્લાઇટ્સનું સંચાલન કરશે.
ભારત અને ચીન વચ્ચેની આ સેવા 2020 માં કોવિડ-19 રોગચાળાને કારણે બંધ કરવામાં આવી હતી. ત્યારબાદ ગાલવાન અથડામણને કારણે બંને દેશો વચ્ચેના સંબંધો બગડ્યા હતા. કોવિડ-૧૯ મહામારી પછી બંને દેશોના નાગરિકો થાઈલેન્ડ, સિંગાપોર અથવા મલેશિયા જેવા ત્રીજા દેશો દ્વારા એકબીજાની મુસાફરી કરી રહ્યા છે જેના કારણે મુસાફરીનો સમય અને ખર્ચ બંનેમાં વધારો થયો છે.
તાજેતરના વર્ષોમાં ખાસ કરીને ૨૦૨૫ ની શરૂઆતથી ભારત અને ચીન તેમના સંબંધોને સામાન્ય બનાવવા માટે પગલાં લીધાં છે. વિદેશ મંત્રાલયે જણાવ્યું છે કે આ ભારત-ચીન સંબંધોને ધીમે ધીમે સામાન્ય બનાવવા તરફ એક મોટું પગલું છે. આ ફ્લાઇટ્સ શિયાળાની ઋતુ દરમિયાન કાર્યરત થશે પરંતુ આ એ વાત પર નિર્ભર રહેશે કે બંને દેશોની એરલાઇન્સ તૈયાર થાય અને તમામ નિયમોનું પાલન કરે.
મહિનાઓની ટેકનિકલ ચર્ચાઓ પછી બંને દેશોના હવાઈ સેવા અધિકારીઓએ ઓક્ટોબર ૨૦૨૫ ના અંતથી ભારત અને ચીન વચ્ચે સીધી હવાઈ સેવાઓ ફરી શરૂ કરવાનો નિર્ણય લીધો છે. સીધી ફ્લાઇટ્સ ફરી શરૂ થવાથી ભારતીય અને ચીની વેપારીઓ, વિદ્યાર્થીઓ, પ્રવાસીઓ અને પરિવારો એકબીજાના દેશોમાં સરળતાથી મુસાફરી કરી શકશે. આ બંને દેશો વચ્ચે સાંસ્કૃતિક અને આર્થિક સંબંધોને મજબૂત બનાવશે. આ પગલું બંને દેશો વચ્ચે તણાવ ઘટાડવા અને સંબંધોને સામાન્ય બનાવવા તરફ એક સકારાત્મક પગલું છે.
