કોંગ્રેસ અધ્યક્ષ (Congress President) પદ માટે શશિ થરૂર (Shashi Tharur) અને મલ્લિકાર્જુન ખડગે આમને-સામને છે. આ દરમિયાન શશિ થરૂરે તેમની સાથે પક્ષપાતનો મુદ્દો ઉઠાવ્યો હતો. થરૂરે ગુરુવારે કહ્યું હતું કે તેમના પ્રતિસ્પર્ધી મલ્લિકાર્જુન ખડગેનું અનેક રાજ્ય એકમોમાં સ્વાગત કરવામાં આવે છે અને મોટા નેતાઓ તેમને મળે છે. પરંતુ તેમની સાથે આવો વ્યવહાર કરવામાં આવતો નથી. જો કે તેમણે એમ પણ કહ્યું કે તેઓ ફરિયાદ નથી કરી રહ્યા પરંતુ સિસ્ટમમાં છીંડા છે. કારણકે પાર્ટીમાં 22 વર્ષથી ચૂંટણી (Election) થઈ નથી. થરૂરે એમ પણ કહ્યું કે કેન્દ્રીય ચૂંટણી સત્તામંડળના વડા મધુસૂદન મિસ્ત્રીએ મુક્ત અને નિષ્પક્ષ ચૂંટણી કરાવવાનો પ્રયાસ કર્યો છે.
થરૂર, ખડગે માટે સમાન તક નથી
તેમણે ગુરુવારે દિલ્હી પ્રદેશ કોંગ્રેસ સમિતિના પ્રતિનિધિઓ સાથે બેઠક યોજી અને પોતાના માટે મત માંગ્યા. તેમાં પૂર્વ સાંસદ સંદીપ દીક્ષિત, દિલ્હી મહિલા કોંગ્રેસ અધ્યક્ષ અમૃતા ધવન અને કેટલાક અન્ય પ્રતિનિધિઓ હાજર રહ્યા હતા. જ્યારે તેમની અગાઉની ટિપ્પણી વિશે પૂછવામાં આવ્યું કે બંને ઉમેદવારો માટે સમાન તક નથી. ત્યારે તિરુવનંતપુરમના લોકસભા સભ્ય 66 વર્ષીય થરૂરે પત્રકારોને કહ્યું કે હું મિસ્ત્રી સાહેબ વિરુદ્ધ કંઈપણ બોલવા માંગતો નથી. 22 વર્ષથી ચૂંટણી ન થઈ હોવાથી તંત્રમાં કેટલાક છીંડા છે.
ઘણા વર્ષોથી ચૂંટણીઓ થઈ નથી તેથી જ કેટલીક ભૂલો થઈ છે
થરૂરે કહ્યું કે અમને પ્રતિનિધિઓની પ્રથમ યાદી 30 સપ્ટેમ્બરે આપવામાં આવી. અને પછી એક અઠવાડિયા પહેલા એક યાદી આપવામાં આવી. પ્રથમ યાદીમાં કોઈ ફોન નંબર નહોતો. જો એમ હોય તો હું કેવી રીતે સંપર્ક કરી શકું? પાછળથી ફોન નંબર મેળવ્યો. બે યાદીઓ વચ્ચે કેટલાક તફાવતો હતા. હું એવી ફરિયાદ નથી કરતો કે તે ઈરાદાપૂર્વક થયું છે. સમસ્યા એ છે કે અમારા પક્ષમાં ઘણા વર્ષોથી ચૂંટણીઓ થઈ નથી. તેથી જ કેટલીક ભૂલો થઈ છે. તેમણે કહ્યું કે હું જાણું છું કે મિસ્ત્રીજી મુક્ત અને ન્યાયી ચૂંટણી માટે બેઠા છે. મને તેમની સામે કોઈ ફરિયાદ નથી.
ઘણા મોટા નેતાઓ ખડગે સાહેબનું સ્વાગત કરે છે, મારી સાથે આવું ક્યારેય નથી થયું
થરૂરે કહ્યું કે કેટલાક નેતાઓએ એવા કામ કર્યા છે જેના માટે મેં કહ્યું કે સમાન તક નથી. ઘણા પીસીસી (પ્રદેશ કોંગ્રેસ કમિટી)માં આપણે જોયું કે પીસીસી પ્રમુખ, વિધાનમંડળ પક્ષના નેતા અને ઘણા મોટા નેતાઓ ખડગે સાહેબનું સ્વાગત કરે છે. તેમની સાથે બેસે છે. પીસીસી (પ્રતિનિધિઓ)ને સૂચના આપવામાં આવે છે કે આવો ખડગે સાહેબ આવી રહ્યાં છે. આવું માત્ર એક જ ઉમેદવાર માટે થયું. મારી સાથે ક્યારેય થયું નથી. ઘણી બધી પીસીસીમાં આવી ઘણી ઘટનાઓ બની છે. તેમના કહેવા પ્રમાણે તેઓ ઘણા પીસીસીમાં ગયા પરંતુ પીસીસી પ્રમુખ ઉપલબ્ધ હોતા નથી.
17 ઓક્ટોબરે મતદાન, 19 ઓક્ટોબરે મતગણતરી
થરૂરે કહ્યું કે આ ચૂંટણીમાં દરેક વ્યક્તિએ પોતાની સ્વતંત્ર ઇચ્છાથી મત આપવો જોઈએ કારણ કે તે ગુપ્ત મતદાન છે. જણાવી દઈએ કે કોંગ્રેસ અધ્યક્ષ પદ માટે 17 ઓક્ટોબરે મતદાન થવાનું છે અને 19 ઓક્ટોબરે મતગણતરી થશે. મલ્લિકાર્જુન ખડગે અને શશિ થરૂર અધ્યક્ષ પદ માટે ચૂંટણી લડી રહ્યા છે.
