અમદાવાદ: (Ahmedabad) કોંગ્રેસ નેતા મણિશંકર ઐયરની ટિપ્પણીની મોટી કિંમત ચૂકવ્યા બાદ હવે મધુસૂદન મિસ્ત્રીએ (Madhusudan Mistry) વિવાદિત નિવેદન આપ્યું છે. કોંગ્રેસના વરિષ્ઠ નેતા (Senior Congress Leader) મધુસૂદન મિસ્ત્રીએ રાજીવ ભવનમાં પાર્ટીનો ઢંઢેરો લૉન્ચ કર્યા બાદ એક ટીવી ચેનલને કહ્યું કે તેઓ પીએમ મોદીને ગુજરાત ચૂંટણીમાં તેમની ‘ઓકાત’ બતાવશે. પીએમ નરેન્દ્ર મોદી ગમે તેટલી કોશિશ કરે તેઓ સરદાર પટેલ બની શકતા નથી. મિસ્ત્રીના આ નિવેદન પર ભાજપે વળતો પ્રહાર કર્યો છે. અમદાવાદમાં ભાજપના રાષ્ટ્રીય પ્રવક્તા અને રાજ્યસભાના સાંસદ સુધાંશુ ત્રિવેદીએ કહ્યું કે હું આ નિવેદનની સખત નિંદા કરું છું. તેમણે કહ્યું કે મધુસૂદન મિસ્ત્રીનું આ નિવેદન કોંગ્રેસ પાર્ટીના નેતાઓની વડાપ્રધાન પ્રત્યેની દુશ્મનાવટ દર્શાવે છે. ત્રિવેદીએ કહ્યું કે આ કોઈ નવી વાત નથી. કોંગ્રેસના નેતાઓ વડાપ્રધાન નરેન્દ્ર મોદીનું અપમાન કરતા રહે છે. તે તેમનું અપમાન નથી પરંતુ ગુજરાત અને દેશના બંધારણીય પદનું પણ અપમાન છે.
મિસ્ત્રીએ સ્ટેડિયમના પ્રશ્ન પર કહ્યું..
મધુસૂદન મિસ્ત્રીના પીએમ મોદીને ઓકાત બતાવવા માટેની ટિપ્પણી પર વિવાદ વકર્યો છે. કોંગ્રેસ પાર્ટીએ ગુજરાત ચૂંટણી માટે જાહેર કરેલા જાહેર ઘોષણાપત્રના પેજ નંબર 59 પર વચન આપ્યું છે કે જો સરકાર બનશે તો નરેન્દ્ર મોદી સ્ટેડિયમનું નામ બદલીને સરદાર પટેલ સ્ટેડિયમ રાખવામાં આવશે. પાર્ટીએ ચૂંટણી ઢંઢેરામાં લખ્યું છે કે સરકાર બન્યા બાદ પ્રથમ કેબિનેટમાં આ કામ કરવામાં આવશે. ચૂંટણી ઢંઢેરો જાહેર થયા બાદ જ્યારે કોંગ્રેસના વરિષ્ઠ નેતા મધુસૂદન મિસ્ત્રીને પૂછવામાં આવ્યું કે મેનિફેસ્ટોમાં શા માટે તેનો સમાવેશ કરવામાં આવ્યો છે? તો તેમણે કહ્યું કે આ બાબત વડાપ્રધાન નરેન્દ્ર મોદીને તેમની ઔકાત બતાવશે. તેઓ સરદાર પટેલ ન બની શકે.
ભાજપ કહ્યું- આ અપમાન છે
ભાજપે ફરી એકવાર મધુસૂદન મિસ્ત્રીના નિવેદનને પીએમના અપમાન સાથે જોડી દીધું છે. મિસ્ત્રીનું આ નિવેદન કોંગ્રેસ માટે મુશ્કેલી બની શકે છે. વર્ષ 2017માં કોંગ્રેસના વરિષ્ઠ નેતા મણિશંકર અય્યરે પીએમ નરેન્દ્ર મોદી માટે ‘નીચ’ શબ્દનો ઉપયોગ કર્યો હતો. આ પછી આ નિવેદન કોંગ્રેસ માટે મુસીબત બની ગયું અને તેનાથી પાર્ટીને મોટું નુકસાન થયું હતું.
દરરોજ હું 3 કિલો ગાળો ખાઉં છું
વડાપ્રધાન નરેન્દ્ર મોદીએ આજે તેલંગાણામાં કહ્યું હતું કે તેઓ દરરોજ ત્રણ કિલો ગાળો ખાય છે. તેલંગાણાના મુખ્યમંત્રી કેસીઆર પર કટાક્ષ કરતા મોદીએ કહ્યું કે તેમની પાસે ઘણી ઉર્જા છે તે એટલા માટે કે તેઓ ખૂબ ગાળ ખાય છે. તેમણે કહ્યું કે તેઓ નિરાશા, ડર અને અંધશ્રદ્ધામાં સવાર-સાંજ મોદીને ગાળો આપે છે. તેઓ પાણી પીને ગાળ બોલે છે. આખી જીંદગી આમાં વીતી ગઈ છે. તેમની પાસે અપશબ્દો સિવાય આપવા માટે કંઈ બચ્યું નથી. અસ્વસ્થ થશો નહીં છેલ્લા 20-22 વર્ષથી મેં જાતજાતની ગાળો ખાધી છે.
જણાવી દઈએ કે ગુજરાતમાં 15મી વિધાનસભાની ચૂંટણી બે તબક્કામાં યોજાઈ રહી છે. પ્રથમ તબક્કામાં 89 બેઠકો માટે 1 ડિસેમ્બરે મતદાન થશે. આ સીટો માટે નોમિનેશનની છેલ્લી તારીખ 14 નવેમ્બર છે. તો બીજા તબક્કામાં રાજ્યની 93 બેઠકો માટે 5 ડિસેમ્બરે મતદાન થશે. હિમાચલ પ્રદેશની સાથે 8મી ડિસેમ્બરે મતગણતરી થશે. પ્રથમ તબક્કામાં ગુજરાતના સૌરાષ્ટ્ર, કાઠિયાવાડ અને દક્ષિણ ગુજરાતમાં મતદાન થશે. ઉત્તર ગુજરાત અને મધ્ય ગુજરાતમાં બીજા તબક્કામાં મતદાન થશે.
