નવા વર્ષના પ્રારંભ સાથે બોલિવૂડના સ્ટાર કિડ્સ ચર્ચામાં છે. વર્ષ 2023માં અનેક સ્ટાર કિડ્સ બોલિવૂડમાં ડેબ્યુ કરવા જઈ રહ્યા છે. આ એવા સ્ટાર કિડ્સ છે જે અગાઉ પણ ચર્ચામાં આવી ચૂક્યા છે. એક તરફ બોલિવૂડ સામે ‘નેપોટિઝમ’ને લઈને દેશમાં બોયકોટનો માહોલ ચાલી રહ્યો છે અને તેમાં આ સ્ટાર કિડ્સ લોન્ચ થવા જઈ રહ્યા છે ત્યારે કેવો રહેશે માહોલ, તેનાં પર ચર્ચા અત્યારથી શરુ થઈ ગઈ છે. આમ તો દર વર્ષે નવી પ્રતિભાઓ ફિલ્મી પડદે પોતાનું નસીબ અજમાવતી હોય છે. આમાં ઘણા સ્ટાર કિડ્સ પણ હોય છે, પણ આ વખતે જે સ્ટાર કિડ્સ આવી રહ્યા છે, તેઓની વાત જરાં જુદી છે!
હિન્દી સિનેમાના 100 વર્ષના ઈતિહાસમાં ઘણા સ્ટાર કિડ્સ લોન્ચ થઈ ચૂક્યા છે અને તેમાંથી માત્ર થોડા જ ફિલ્મ ઈન્ડસ્ટ્રીમાં પોતાનું સ્થાન જમાવી શક્યા હતા. અલબત્ત, સ્ટાર કિડ્સ માટે સફળ થવું અને પરિવારે બનાવેલી ઇમેજને જાળવી રાખવી, એવું બમણું દબાણ હોય છે. આગળ કહ્યું તેમ આજના યુગમાં હિન્દી ફિલ્મ જગતમાં ‘નેપોટિઝમ’ની ખૂબ ચર્ચા છે, ત્યારે આ નવા સ્ટાર કિડ્સ પર તેમના લોન્ચિંગને યોગ્ય સાબિત કરવાનું દબાણ પણ બમણું થઈ જાય છે. આ વર્ષે પણ તે સ્ટાર કિડ્સ પર દબાણ રહેશે, જેમની ફિલ્મોમાં આવવાની વાત કરવામાં આવી રહી છે. કોણ – કોણ છે આ સ્ટાર કિડ્સ? અને કેમ આટલી બધી ચર્ચા છે?
આ લિસ્ટમાં સૌથી પહેલા સુપરસ્ટાર શાહરૂખ ખાનની દીકરી સુહાના ખાનનું નામ છે, જે ફિલ્મ ‘ધ આર્ચી’થી પોતાની એક્ટિંગ કરિયરની શરૂઆત કરી રહી છે. તો ચાલો સૌથી પહેલા વાત કરીએ બોલિવૂડના કિંગખાન શાહરુખ ખાનના કિડ્સની. ‘ધ આર્ચી’થી સુહાના ખાનની ફિલ્મી સફર શરૂ થવાની છે. 22 વર્ષની સુહાના ખાને ન્યૂયોર્કમાં અભ્યાસ કર્યો છે અને ત્યાં ઘણા થિયેટર નાટકોમાં ભાગ લીધો છે. લોન્ચ પહેલા જ સોશિયલ મીડિયા પર તેના લાખો ફોલોઅર્સ છે અને હવે તે હિન્દી સિનેમામાં પગ મૂકવા માટે તૈયાર છે.
આવું જ કાંઈક શ્રીદેવીની નાની દીકરી ખુશી વિશે કહેવાય રહ્યું છે. શ્રીદેવીની મોટી દીકરી જ્હાન્વી કપૂરે હિન્દી સિનેમામાં પોતાનું સ્થાન બનાવી લીધું છે. ત્યારે હવે તેની 22 વર્ષની નાની બહેન ખુશી કપૂર લોન્ચ માટે તૈયાર છે. અલબત્ત, ફિલ્મ ‘ધ આર્ચી’માં સુહાના ખાન સાથે શ્રીદેવીની નાની દીકરી ખુશી કપૂર પણ ડેબ્યૂ કરી રહી છે. જ્હાન્વીની કારકિર્દીની સફળ શરૂઆત બાદ ખુશી પર દબાણ ખુબ જ રહેશે. જોકે, જ્હાન્વી બાદ ખુશીને સિલ્વર સ્ક્રીન પર જોવાની રાહ ઘણાં સમયથી જોવાઈ રહી છે. સુહાનાની જેમ ખુશી પણ સોશિયલ મીડિયા પર સ્ટાર છે અને તેનાં પણ સેંકડો ફોલોઅર્સ છે.
ઝોયા અખ્તરની ફિલ્મ ‘ધ આર્ચી’ સુહાના ખાન અને ખુશી કપૂર ઉપરાંત અમિતાભ બચ્ચનનો પૌત્ર એટલે કે શ્વેતા બચ્ચનનો પુત્ર અગસ્ત્ય નંદા પણ આ ફિલ્મથી અભિનયની શરૂઆત કરશે. બચ્ચન પરિવારની ત્રીજી પેઢી ઝોયા અખ્તરની ફિલ્મ ‘ધ આર્ચી’થી બોલિવૂડમાં પગ મૂકી રહી છે. લાંબા સમયથી એવી અપેક્ષા હતી કે શ્વેતા બચ્ચનની પુત્રી નવ્યા નવેલી નંદા પોતાને અજમાવશે, પરંતુ હાલમાં તેણે સિલ્વર સ્ક્રીનથી અંતર જાળવી રાખ્યું છે. અલબત્ત, 2022માં પોડકાસ્ટ શ્રેણી શરૂ કરીને નવ્યાએ શ્રોતાઓ સાથે સંબંધ સ્થાપિત કર્યો હતો.
‘ધ આર્ચી’ ફિલ્મ થિયેટરને બદલે ઓટીટી પર રિલીઝ થવાની. તેનું ટીઝર 2022માં આવ્યું હતું. ટીઝર જોયા બાદ આ સ્ટાર કિડ્સને સોશિયલ મીડિયા પર ખૂબ ટ્રોલ કરવામાં આવ્યા હતા અને ત્યારબાદ ફરીવાર ‘નેપોટિઝમ’ પર ચર્ચા થઈ હતી. તેથી, આ સ્ટાર કિડ્સ પર પોતાને સાબિત કરવા માટે 2023માં ઘણું દબાણ હશે.
રિપોર્ટ્સ મુજબ, સંગીતકાર રાજેશ રોશનની પુત્રી અને રિતિક રોશનની પિતરાઈ પશ્મિના રોશન પણ ફિલ્મ ‘ઈશ્ક વિશ્ક રિબાઉન્ડ’થી બોલિવૂડમાં ડેબ્યૂ કરવા જઈ રહી છે. પશ્મિના રોશનને તેના પિતરાઈ રિતિક રોશનની ખૂબ નજીક માનવામાં આવે છે. ઈશ્ક વિશ્ક રીબાઉન્ડ એ શહીદ કપૂરની 2003માં લોન્ચ થયેલી ફિલ્મ ઈશ્ક વિશ્કની રિમેક છે. આ ફિલ્મમાં ઉભરતા અભિનેતા રોહિત સરાફ, બાળ કલાકાર જીબ્રાન ખાન અને નૈલા ગ્રેવાલ પણ જોવા મળશે. આ સાથે આ વર્ષે ફિલ્મ ઈન્ડસ્ટ્રીમાં ઘણા કલાકારોને લોન્ચ કરનાર સલમાન ખાનની ભત્રીજી પણ પડદા પર આવવા તૈયાર છે.
સલમાન ખાનની મોટી બહેન અલવીરા અગ્નિહોત્રી અને અભિનેતા અતુલ અગ્નિહોત્રીની પુત્રી અલીઝેહ અગ્નિહોત્રી રાષ્ટ્રીય પુરસ્કાર વિજેતા ફિલ્મ નિર્માતા સૌમેન્દ્ર પાધીની આગામી ફિલ્મમાં જોવા મળશે. વધુ એક સ્ટાર કિડ્સ જે આ વર્ષે ડેબ્યુ કરશે તે છે સંજય કપૂરની દીકરી શનાયા કપૂર. કરણ જોહર ઘણીવાર પોતાના પ્રોડક્શન હાઉસમાંથી સ્ટાર કિડ્સને લોન્ચ કરતા જોવા મળ્યા છે. આ લિસ્ટમાં આલિયા ભટ્ટ, જ્હાન્વી કપૂર, વરુણ ધવન, અનન્યા પાંડે અને ઈશાન ખટ્ટર જેવા નામ સામેલ છે. હવે કરણ સંજય કપૂરની દીકરી શનાયા કપૂરને લોન્ચ કંજરવા જે રહ્યો છે. શનાયા કપૂર ધર્મા પ્રોડક્શનની ફિલ્મ ‘બેધડક’થી ફિલ્મી કરિયરની શરૂઆત કરી રહી છે.
આ ફિલ્મ પૂરી થઈ ગઈ છે, પરંતુ તેની રિલીઝ ડેટ હજુ જાહેર કરવામાં આવી નથી. અલબત્ત, આ તો સ્ટાર કિડ્સની પરદા પર ડેબ્યુની વાત. પરદા પાછળ પણ આ વર્ષે સ્ટાર કિડ્સ લોન્ચ થવા જઈ રહ્યા છે. આમાં શાહરૂખ ખાનના પુત્ર આર્યનનું નામ સૌથી વધુ ફેમસ છે. આર્યન ખાન ડિરેક્ટર તરીકે હિન્દી સિનેમામાં પ્રવેશ કરી રહ્યો છે. જોકે, તેને અભિનેતા તરીકે બોલિવૂડમાં આવવાની અટકળો લગાવવામાં આવી રહી હતી. કરણ જોહરે એમ પણ કહ્યું હતું કે જ્યારે પણ આર્યન એક્ટિંગની દુનિયામાં આવવા માગશે ત્યારે તે લોન્ચ કરશે, પરંતુ આર્યનએ ફિલ્મ ડિરેક્શનમાં આવવાનું નક્કી કર્યું છે. હજુ સુધી આર્યનની ફિલ્મના નામની જાહેરાત કરવામાં આવી નથી, પરંતુ તે ટૂંક સમયમાં જ શૂટિંગ શરૂ કરવાનો છે, એવું સાંભળવા મળે છે. વિશાલ ભારદ્વાજના પુત્ર આસમાન ભારદ્વાજે પણ દિગ્દર્શક તરીકે ફિલ્મોની દુનિયામાં પગ મૂક્યો છે. તેની પહેલી ફિલ્મ ‘કુત્તે’ જાન્યુઆરીમાં રિલીઝ થઈ ગઈ છે.
આ ફિલ્મમાં તબ્બુ, નસીરુદ્દીન શાહ, કોંકણા સેન શર્મા, અર્જુન કપૂર, રાધિકા મદન અને શાર્દુલ ભારદ્વાજ મુખ્ય ભૂમિકામાં છે. દર્શકો આ સ્ટાર કિડ્સને કેવી રીતે જોશે, ફિલ્મ સમીક્ષકો તેમના અભિનય કે દિગ્દર્શન પર કેવી પ્રતિક્રિયા આપશે અને શું આ સ્ટાર કિડ્સ ફિલ્મી દુનિયામાં પોતાની છાપ છોડી શકશે? ફક્ત સમય જ કહેશે, હાલમાં દરેક તેની લોન્ચિંગ ફિલ્મની આતુરતાથી રાહ જોઈ રહ્યા છે. જોવાનું એ છે કે એક બાજુ આમિર, શાહરુખ, અક્ષય કુમાર જેવા અભિનેતાઓ બોયકોટ બોલિવૂડ અને ‘નેપોટિઝ્મ’ વિરુદ્ધનો માહોલ જોઈ રહ્યા છે ત્યારે શું આ સ્ટાર કિડ્સને લોન્ચ કરવા બરાબર ગણાશે? અલબત્ત, ઝોયા અખ્તરની ફિલ્મ ‘ધ આર્ચી’ જેમાં મેક્સિમમ સ્ટાર કિડ્સ છે તેને ઓટીટી પ્લેટફોર્મ પર રિલીઝ કરવામાં આવતી હોવાથી બોયકોટનો માહોલ સહન કરવો પડશે નહીં.
