ભારતમાંથી ઉડાન ભરનાર 6 ફ્લાઈટ તેમજ એક ભારત આવનાર ફ્લાઈટ મળીને કુલ 7 ફ્લાઈટને મંગળવારે બોમ મુકાયાની ધમકી મળતા એવીએશન વિભાગ દોડતું થયું હતું. એર ઈન્ડિયાની ફ્લાઈટમાં બોમ્બ હોવાના સમાચાર સામે આવતાં ખળભળાટ મચી ગયો હતો. બોમ્બની ધમકી બાદ દિલ્હીથી શિકાગો જતી એર ઈન્ડિયાની ફ્લાઈટને કેનેડાના ઈકાલુઈટ એરપોર્ટ પર ડાયવર્ટ કરવામાં આવી હતી. આ જાણકારી એરલાઇનના અધિકારીએ આપી છે. મંગળવારે 7 ફ્લાઈટમાં બોમ્બની ધમકીઓ મળી હતી.
દિલ્હીથી શિકાગો જઈ રહેલા એર ઈન્ડિયાના વિમાનને ઓનલાઈન ધમકી મળ્યા બાદ કેનેડા તરફ વાળવામાં આવ્યું હતું. પ્લેન કેનેડાના ઈકાલુઈટ એરપોર્ટ પર લેન્ડ થયું હતું. અહીં મુસાફરો અને તેમના સામાનની તપાસ કરવામાં આવી હતી. એરલાઈન્સે એક નિવેદનમાં જણાવ્યું હતું કે નિર્ધારિત સુરક્ષા પ્રોટોકોલ મુજબ વિમાન અને મુસાફરોની ફરીથી તપાસ કરવામાં આવી રહી છે. એર ઈન્ડિયાએ મુસાફરોને તેમની મુસાફરી ફરી શરૂ ન થાય ત્યાં સુધી મદદ કરવા માટે એરપોર્ટ પર એજન્સીઓને સક્રિય કરી હતી.
ફ્લાઈટ 24 રડાર મુજબ વિમાને આજે સવારે 3 વાગ્યે દિલ્હીથી ટેકઓફ કર્યું હતું અને સાંજે 4:30 વાગ્યે શિકાગો પહોંચવાનું હતું. દિવસભરમાં 5 ફ્લાઈટ પર ખતરો હોવાના કારણે સુરક્ષા એજન્સીઓએ ઘણા એરપોર્ટ પર આતંકવાદી વિરોધી કવાયત હાથ ધરી હતી. તપાસમાં જાણવા મળ્યું છે કે તમામ ધમકીઓ એક જ વ્યક્તિ દ્વારા સોશિયલ મીડિયા પ્લેટફોર્મ X પર મોકલવામાં આવી હતી. જેના કારણે હજારો મુસાફરોની ફ્લાઈટ પ્રભાવિત થઈ હતી. જોકે બાદમાં આ ધમકીઓ ખોટી હોવાનું બહાર આવ્યું હતું.
તાજેતરમાં ઈન્ડિગોની બે ફ્લાઈટને બોમ્બની ધમકી મળી હતી. આમાં પ્રથમ ફ્લાઈટ મુંબઈથી જેદ્દાહ જઈ રહી હતી, જેનો નંબર 6E56 હતો. બીજી ફ્લાઈટ મુંબઈથી મસ્કત જઈ રહી હતી જેનો ફ્લાઈટ નંબર 6E1275 હતો. બંને ફ્લાઈટની સુરક્ષા તપાસ તાત્કાલિક શરૂ કરવામાં આવી હતી.
ઈન્ડિગોના પ્રવક્તાએ કહ્યું હતું કે મુંબઈથી મસ્કત જતી ફ્લાઈટ 6E 1275ને બોમ્બની ધમકી મળી હતી. જે બાદ ફ્લાઈટને અલગ ખાડીમાં લઈ જવામાં આવી હતી અને સુરક્ષા તપાસ શરૂ કરવામાં આવી હતી. પ્રવક્તાએ કહ્યું કે મુંબઈથી જેદ્દાહ જઈ રહેલી ઈન્ડિગોની બીજી ફ્લાઈટ નંબર 6E 56ને પણ બોમ્બની ધમકી મળી હતી. જે બાદ વિમાનની સુરક્ષાની ચકાસણી કરવામાં આવી હતી.
ઈન્ડિગોની ફ્લાઈટ પહેલા એર ઈન્ડિયાની બીજી ફ્લાઈટને બોમ્બ હોવાની ધમકી મળી હતી, જે બાદ દિલ્હી એરપોર્ટ પર ઈમરજન્સી લેન્ડિંગ કરવામાં આવ્યું હતું. તમને જણાવી દઈએ કે ફ્લાઈટ્સમાં બોમ્બની ધમકીના સમાચાર દરરોજ સામે આવે છે જેના કારણે મુસાફરોને અસુવિધાનો સામનો કરવો પડે છે.
