નવી દિલ્હી: રાજ્યસભાની (RajyaSabha) ત્રણ રાજ્યોની બેઠકોના ગઇકાલે પરિણામો (Results) જાહેર થયા હતા. તેમાં ત્રણ રાજ્યોની 15 રાજ્યસભા બેઠકોના પરિણામો ખૂબ જ ચોંકાવનારા આવ્યા છે. આ ચૂંટણીમાં જંગી ક્રોસ વોટિંગ (Cross voting) થયું હતું. તેમજ જે પક્ષની જીત નિશ્ચિત જણાતી હતી તેઓ હારી ગયા હતા અને જે પક્ષની હાર નિશ્ચિત જણાતી હતી તેઓ જીત્યા હતા.
ઉત્તર પ્રદેશમાં ભાજપે 10માંથી 8 બેઠકો જીતી હતી. જ્યારે સમાજવાદી પાર્ટીએ બે બેઠકો જીતી હતી. કર્ણાટકમાં કોંગ્રેસે રાજ્યસભાની ત્રણ બેઠકો જીતી હતી, જ્યારે હિમાચલમાં તેને મોટો ફટકો પડ્યો હતો. હિમાચલ સીટ પર કોંગ્રેસના ઉમેદવાર અભિષેક મનુ સિંઘવીને હારનો સામનો કરવો પડ્યો હતો.
યુપીમાં ભાજપનો ઝંડો
યુપીમાં ભાજપના ઉમેદવારોએ રાજ્યસભાની 10માંથી 8 બેઠકો જીતી હતી જ્યારે સમાજવાદી પાર્ટીના બે ઉમેદવારો વિજયી જાહેર થયા હતા. ઉત્તર પ્રદેશમાં 10 બેઠકો માટે કુલ 11 ઉમેદવારો મેદાનમાં હતા. તેમજ સપાએ ત્રણ ઉમેદવારોને મેદાનમાં ઉતાર્યા હતા. ભાજપે શરૂઆતમાં સાત ઉમેદવારોને મેદાનમાં ઉતાર્યા હતા પરંતુ બાદમાં સંજય શેઠના રૂપમાં આઠમો ઉમેદવાર પણ ઉતાર્યો હતો. જેના કારણે ભાજપ માટે ચૂંટણી જરૂરી બની હતી.
આ ઉમેદવારો યુપીમાં જીત્યા
ભાજપના જે 8 ઉમેદવારો જીત્યા તેમાં પૂર્વ કેન્દ્રીય મંત્રી આર.પી.એન. સિંહ, પૂર્વ સાંસદ ચૌધરી તેજવીર સિંહ, પાર્ટીના ઉત્તર પ્રદેશ એકમના મહાસચિવ અમરપાલ મૌર્ય, પૂર્વ રાજ્ય મંત્રી સંગીતા બલવંત (બિંદ), પાર્ટીના પ્રવક્તા સુધાંશુ ત્રિવેદી, પૂર્વ ધારાસભ્ય સાધના સિંહનો સમાવેશ થાય છે. તેમજ સપાએ આગરાના પૂર્વ મેયર નવીન જૈન અને સંજય સેઠ, અભિનેત્રી-સાંસદ જયા બચ્ચન, નિવૃત્ત ભારતીય વહીવટી સેવા (IAS) અધિકારી અને ઉત્તર પ્રદેશના ભૂતપૂર્વ મુખ્ય સચિવ આલોક રંજન અને દલિત નેતા રામજી લાલ સુમનને મેદાનમાં ઉતાર્યા હતા. જેમાંથી આલોક રંજનને હારનો સામનો કરવો પડ્યો હતો.
હિમાચલમાં કોંગ્રેસને મોટો ફટકો
હિમાચલની એક રાજ્યસભા સીટ પર ખૂબ જ રસપ્રદ મુકાબલો હતો. અહીં કોંગ્રેસ અને ભાજપ વચ્ચે મુકાબલો હતો. માનવામાં આવતું હતું કે અભિષેક મનુ સિંઘવી આસાનીથી જીતી જશે. અહીં ભાજપે હર્ષ મહાજનને પોતાના ઉમેદવાર બનાવ્યા હતા. બંનેને 34-34 વોટ મળ્યા હતા. ત્યાર બાદ લોટરી સિસ્ટમ દ્વારા એક સ્લિપ કાઢવામાં આવી અને સ્લિપમાં હર્ષ મહાજનનું નામ આવ્યું. આ ચૂંટણીમાં કોંગ્રેસના છ ધારાસભ્યોએ ક્રોસ વોટિંગ કર્યું હતું.
કર્ણાટકે કોંગ્રેસની લાજ રાખી
કર્ણાટકમાં રાજ્યસભાની ચાર બેઠકો માટે મતદાન થયું. અહીં કોંગ્રેસે ત્રણ બેઠકો જીતી હતી જ્યારે એક બેઠક ભાજપના ફાળે ગઈ હતી. કોંગ્રેસ તરફથી પાર્ટીના ખજાનચી અજય માકન, જીસી ચંદ્રશેખર અને સૈયદ નસીર હુસૈન જીત્યા હતા. તેમજ ભાજપ તરફથી નારાયણ બંડગે જીત્યા હતા. કર્ણાટકની ચાર બેઠકો માટે પાંચ ઉમેદવારો મેદાનમાં હતા. જેમાં જનતા દળ (સેક્યુલર)ના ઉમેદવાર ડી. કુપેન્દ્ર રેડ્ડીનો સમાવેશ થાય છે. આ ચૂંટણીમાં ‘ક્રોસ વોટિંગ’ થયું અને ભાજપના એક ધારાસભ્ય એસ.ટી. સોમશેખરે કોંગ્રેસના અજય માકનને મત આપ્યો જ્યારે અન્ય ધારાસભ્ય એ. શિવરામ હેબ્બર ગેરહાજર રહ્યા હતા.
