પશ્ચિમ બંગાળ (West Bengal)માં બાબુલ સુપ્રિયો (Babul supriyo)ના ફરી ટીએમસી (TMC)માં જોડાવા સાથે જ ઘણા રાજકીય ઉથલપાથલ થઇ રહ્યા છે, ત્યારે હવે ભાજપે (BJP) ઓક્ટોબરમાં યોજાનારી રાજ્યસભાની પેટાચૂંટણી નહીં લડવાનો નિર્ણય કર્યો છે.
પશ્ચિમ બંગાળ વિધાનસભામાં વિપક્ષના નેતા સુવેન્દુ અધિકારી (Suvendu adhikari)એ ટ્વિટ કર્યું હતું કે, “ભાજપ પશ્ચિમ બંગાળમાં યોજાનારી રાજ્યસભા પેટાચૂંટણી માટે કોઈ ઉમેદવારની વરણી કરશે નહીં. પરિણામ પૂર્વનિર્ધારિત છે. અમારું ધ્યાન એ સુનિશ્ચિત કરવા પર છે કે બિન -ચૂંટાયેલા મુખ્યમંત્રી ફરી એક વખત ચૂંટાય. જય મા કાલી. “
તૃણમૂલ કોંગ્રેસે જરૂરી પેટા ચૂંટણી માટે સુષ્મિતા દેવને નામાંકિત કર્યા છે, જ્યારે પશ્ચિમ મિદનાપુર જિલ્લાના સબંગથી વિધાનસભાની ચૂંટણી જીત્યા બાદ ટીએમસી નેતા માનસ ભુનિયાએ રાજ્યસભાની બેઠક ખાલી કરી હતી, જેમણે તાજેતરમાં મમતા બેનર્જીની આગેવાનીવાળી પાર્ટી છોડી દીધી હતી. TMC રાજ્યની 16 માંથી 11 રાજ્યસભા બેઠકો ધરાવે છે, જ્યારે કોંગ્રેસ પાસે બે અને CPI (M) પાસે એક છે અને બાકીની બેઠક હવે ખાલી છે. ગયા સપ્તાહે ટીએમસી નેતા અર્પિતા ઘોષે પાર્ટીના ટોચના નેતાઓના નિર્દેશ પર રાજ્યસભામાંથી રાજીનામું આપ્યું હતું. રાજ્યમાં ભાજપ એકમે 9 ઓગસ્ટના રોજ રાજ્યસભાની પેટા ચૂંટણી પણ લડી ન હતી, જેના કારણે ટીએમસી ઉમેદવાર જવાહર સરકારની ચૂંટણી બિનહરીફ થઈ હતી.
ભાજપ 30 સપ્ટેમ્બરે ભવાનીપુર વિધાનસભાની પેટા ચૂંટણી પર ધ્યાન કેન્દ્રિત કરી રહ્યું છે. મુખ્યમંત્રી મમતા બેનર્જી પોતાના મુખ્યમંત્રી પદને જાળવી રાખવા માટે ભવાનીપુરથી ચૂંટણી લડી રહ્યા છે. બીજી તરફ, ભાજપે યુવા નેતા અને વકીલ પ્રિયંકા તિબ્રેવાલને તેમની સામે ઉભા કર્યા છે. આ બેઠક પર મુખ્ય સ્પર્ધા હવે ભાજપ અને ટીએમસી (TMC) વચ્ચે છે કારણ કે કોંગ્રેસે અહીં પોતાનો ઉમેદવાર ઉતારવાની ના પાડી દીધી છે. તમને જણાવી દઈએ કે મમતા બેનર્જીને વિધાનસભા ચૂંટણીમાં નંદીગ્રામ બેઠક પર ભાજપના શુભેન્દુ અધિકારીએ હરાવ્યા હતા, ત્યારબાદ મમતા બેનર્જી હવે તેમની પરંપરાગત બેઠક ભવાનીપુરથી પેટાચૂંટણી લડી રહ્યા છે.
પ્રિયંકા ટિબરેવાલ ગયા વર્ષે ઓગસ્ટથી પશ્ચિમ બંગાળમાં ભારતીય જનતા યુવા મોરચાના ઉપાધ્યક્ષ છે. હવે તે ભવાનીપુર સીટ પર પશ્ચિમ બંગાળના મુખ્યમંત્રી મમતા બેનર્જીને સ્પર્ધા આપશે. પ્રિયંકા 2014 માં ભાજપમાં જોડાયા અને 2020 માં 6 વર્ષ પછી, તેને બંગાળમાં ભારતીય જનતા યુવા મોરચાના ઉપાધ્યક્ષ બનાવવામાં આવ્યા. પ્રિયંકા ભાજપ પહેલા પણ વિધાનસભાની ઉમેદવાર રહી ચૂકી છે.
